-
¿Jamüinjatü sukuwaʼipa aluwatawaa nutuma Maleiwa?Anainjatka atuma pukuwaʼipa waneepia. Pütüja sünainjee tü sümakat tü Bibliakat
-
-
EKIRAJAAYA 31
¿Jamüinjatü sukuwaʼipa aluwatawaa nutuma Maleiwa?
Süküjain maʼin tü Bibliakat süchiki sukuwaʼipa aluwatawaa nutuma Maleiwa. Sükajee tia, naaʼinreerü Jehová tü nüchekakat paala süpüleerua tü Mmakat. ¿Jamüinjatü sukuwaʼipa aluwatawaa nutuma Maleiwa? ¿Jamüsü watüjaaka saaʼu nuluwataaichipain? ¿Kasa naaʼinraka maaʼulu? ¿Kaseerü naaʼinraka mapeena? Aküjüneerü tia sünain ekirajaayakat tüü otta sünain tü ekirajaayakat 32 otta 33.
1. ¿Jamüinjatü sukuwaʼipa aluwatawaa nutuma Maleiwa? ¿Jarai chi nüneekakai süpüla nuluwataainjachin?
Nüikaleʼerüin Maleiwa wanee sukuwaʼipa aluwatawaa chaa sirumatuʼu, nia niʼitaaka Jesucristo süpüla nuluwataainjachin (Mateo 4:17; Juan 18:36). «Müichia nnojolin ooʼulaain suulia aluwatawaa» müsü tü Bibliakat nüchiki Jesús (Lucas 1:32, 33). Süka niaichipain Jesús aluwataain nutuma Maleiwa, aluwataajeechi nia saaʼu Mmakat süpüshuaʼa.
2. ¿Jeʼrashii na aluwataainjanakana nümaa Jesús?
Nnojoleechi aluwataain Jesús nümüiwaʼa. Eeshii waneinnua wayuu aluwataainjanakana nümaa chaa sirumatuʼu. Nüneekala naya saʼakajee «eʼirukuukat süpüshua sainküinjee mmakat süpüshua» (Alateetkat Mapeena [Apocalipsis] 5:9, 10). ¿Jeʼrashii naya? Mayaainjeʼe wainmain maʼin na wayuu oushikajaakana süchiirua nukuwaʼipa Cristo soʼu yaajachin nia saaʼu tü Mmakat, nüneeküin neʼe 144.000 wayuu aluwataainjanakana nümaa (paashajeʼera Alateetkat Mapeena [Apocalipsis] 14:1-4). Na wane anoujashiikana, yaajeena kepiain saaʼu tü Mmakat (Salmo 37:29).
3. ¿Jamüsü sülanaʼaleeka sukuwaʼipa aluwatawaa nutuma Maleiwa suulia sukuwaʼipa aluwatawaa sutuma wayuu?
Mayaainjeʼe eein aluwataashii eekai naaʼinreein tü kasa anasükat, nnojotsü nountuin süpüshuaʼa tü kasa keeʼireekat naaʼin. Niasaʼa chi aikalaakai nüchikumüin, eesü nnojorüle kachipünaain naaʼin tü alatakat namüin na wayuu nuluwataakana aaʼu. Nnojotpejeʼe müin nukuwaʼipa Jesús. Nuluwataapa, nnojoleerü jaralüin aikalaain nüchikumüin sünain aluwatawaa. «Nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa eeinjatka süpüla kaʼikat süpüshuaʼa» müsü tü Bibliakat süchiki tia (Daniel 2:44). Nuluwataapa Jesús saaʼu tü Mmakat, nnojoleerü koʼuin nukuwaʼipa sümüin wayuu. Aipürai wayuu nia, kamaneeshi nia, naaʼinrüin tü kasa anasükat. Nikirajeena na wayuukana süpüla aipüraliinjanain naya wayuu, kamaneeinjanain naya jee naaʼinrüinjatüin tü kasa anasükat (paashajeʼera Isaías 11:9).
WEKIRAJAA SOOʼOMÜIN
Wekirajaa sünain jamüin sülanaʼaleeka sukuwaʼipa aluwatawaa nutuma Maleiwa suulialeʼeya sukuwaʼipa aluwatawaa sutuma wayuu.
4. Anaʼleesia maʼin sukuwaʼipa tü aluwatawaa nüikaleʼerakat Maleiwa
Nia Jesús anaka süpüla aluwatawaa nuulialeʼeya wanee wayuu, jama pülashin nia. Jaashajeʼera Mateo 28:18 otta yooto jia süchiki tüü:
¿Jamüshi niaka Jesús anain maʼin süpüla aluwatawaa nuulialeʼeya wanee wayuu?
Jamüshijaʼa wanee wayuu aluwataashi neʼe saaʼu shiʼipa wanee mma, nnojoishi aluwataain saaʼu Mmaka süpüshuaʼa otta eeshi süpüla nuuʼulaain suulia aluwatawaa. ¿Meetchejeʼeya sukuwaʼipa aluwatawaa nutuma Maleiwa? Jaashajeʼera Daniel 7:14 otta yooto jia süchiki tüü:
¿Kasa anasü weʼreetka sünainjee nnojoleechin nuuʼulaain Maleiwa suulia aluwatawaa?
¿Kasa anasü weʼreetka sünainjee nuluwataajeechin sainküin Mmakat süpüshuaʼa?
5. Anasü shiale eein sukuwaʼipa aluwatawaa nutuma Maleiwa
¿Jamüsü anaka sukuwaʼipa aluwatawaa nutuma Maleiwa suulia sukuwaʼipa aluwatawaa sutuma wayuu? Jünaja tü VIDEOKOT otta yooto jia süchiki tüü:
¿Kasa mojusü eeka sünainjee suluwataain wayuu?
Jaashajeʼera Eclesiastés 8:9 otta yooto jia süchiki tüü:
¿Shiache anaka sukuwaʼipa aluwatawaa nutuma Maleiwa suulialeʼeya sukuwaʼipa aluwatawaa sutuma wayuu? ¿Jamüsü shiaka anain saaʼin pümüin?
6. Namüliajeena waya na wayuu nüneekakana Maleiwa süpüla aluwatawaa
Nümüliajeena waya Jesús süka niʼraajüin tü wakuwaʼipakat jee wayuuin nia paala soʼu yaajachin nia saaʼu tü Mmakat. «Nieechi Jesús amüliajaka waya» müsü tü Bibliakat nüchiki (Hebreokana 4:15). Nüneeküin Jehová 144.000 wayuu tooloyuu otta jieyuu süpüla naluwataainjanain nümaa Jesús. Wayuukana naainnua, saʼakajeejana «eʼirukuukat süpüshua sainküinjee mmakat süpüshua» (Alateetkat Mapeena [Apocalipsis] 5:9).
Niʼraajüin Jesús tü wakuwaʼipakat otta na wayuu aluwataainjanakana nümaa. Süka jamüin, wayuuin paala naya yaaiwaʼaya naya saaʼu tü Mmakat. ¿Akatchinraasüche paaʼin süka müin nakuwaʼipa? ¿Jamüsü sükatchinraaka paaʼin?
Nüneeküin Jehová wayuu tooloyuu sümaa jieyuu saʼakajee eʼirukuukat süpüshuaʼa süpüla naluwataainjanain nümaa Jesús.
7. Anaʼleesia maʼin tü nuluwataakalü anain Maleiwa suulialeʼeya tü suluwataakalü anain wayuu
Na aluwataashiikana, naluwataain na wayuukana sünain aaʼinraa waneirua kasa. Naaʼinrüin tia süpüla nakaalinjain jee naaʼinmajüin naya. Müsia sukuwaʼipa tü naaʼinrakat Maleiwa, eesü tü kasa nuluwataakalü anain na wayuukana otta oonooinjana naya sümaa. Jaashajeʼera 1 Corinto 6:9-11 otta yooto jia süchiki tüü:
¿Jameerü sukuwaʼipa wayuu kojutule sümüin tü nümakat Maleiwa?a
Nuluwataain Maleiwa na wayuukana süpüla wulein nakuwaʼipa, ¿anasüche noonoole na wayuukana sümaa tia pütchikat? ¿Jamüsü anaka saaʼin pümüin?
¿Jamüsü watüjaaka saaʼu eein süpüla neeʼiratüin nakuwaʼipa na wayuu nnojoliikana oonooin paala sümaa tia pütchikat? (Paashajeʼera süchikuaʼa wetsiikulokot 11).
Na aluwataashiikana, naluwataain na wayuukana sünain aaʼinraa waneirua kasa süpüla nakaalinjain jee naaʼinmajüin naya. Anaʼleepejeʼe maʼin tü nuluwataakalü anain Maleiwa. Naaʼinreein tia süpüla naaʼinmajüin otta nükaalinjain wayuu.
EESHII WAYUU EEKAI NAMÜIN: «¿Jamüinjatü sukuwaʼipa aluwatawaa nutuma Maleiwa?».
¿Jameerü pünüiki namüin?
WATÜJAAITPAKA AAʼU
Nüikaleʼerüitpa Maleiwa sukuwaʼipa wanee aluwatawaa chaa sirumatuʼu jee aluwataajeechi nia chejee yaa saaʼu tü mmakat.
Pusouta shiʼipajee
¿Jeʼrashii na wayuu nüneekakana Maleiwa süpüla aluwatawaa nümaa Jesús?
¿Jamüsü anaka sukuwaʼipa aluwatawaa nutuma Maleiwa suulia sukuwaʼipa aluwatawaa sutuma wayuu?
¿Kasa naaʼinrajatka na nuluwataainjanakana aaʼu Maleiwa?
PÜNAʼLA SOOʼOMÜIN
Paashajeʼera tü nikirajakalü anain Jesús süchiki sukuwaʼipa aluwatawaa nutuma Maleiwa.
¿Jamüshii noonooka na Aküjaliikana pütchi sümaa nünüiki Maleiwa suulialeʼeya nanüiki na aluwataashiikana?
Paashajeʼera tü sümakat tü Bibliakat nachiki na 144.000 wayuu nüneekaka Jehová süpüla aluwatawaa nümaa Jesús.
«¿Jaralii na chainjanakana chaa iipünaa?» (Pütchi suluʼuka jw.org)
Paashajeʼera süchiki tü sümakat wanee wayuu püreesaka jee ayaawataka saaʼu niain neʼe Maleiwa aaʼinreechika tü kasa anasükat.
-
-
Nüikaleʼerüitpa Maleiwa sukuwaʼipa wanee aluwatawaaAnainjatka atuma pukuwaʼipa waneepia. Pütüja sünainjee tü sümakat tü Bibliakat
-
-
EKIRAJAAYA 32
Nüikaleʼerüitpa Maleiwa sukuwaʼipa wanee aluwatawaa
Nüikaleʼerüin Maleiwa sukuwaʼipa wanee aluwatawaa chaa sirumatuʼu soʼujee juyakat 1914. Soʼujeʼereʼeya juyakat tia, eʼitaanüsü sükalia süpüla sajaʼttinnüin sukuwaʼipa aluwatawaa sutuma wayuu. ¿Jamüsü watüjaaka saaʼu tia? Wekirajaa sünain tü süküjatüjütkalia tü Bibliakat, tü alatakat sainküinpünaa tü Mmakat jee sukuwaʼipa wayuu soʼujeʼereʼeya tü juyakat 1914.
1. ¿Kasa süküjatüjütkalia tü Bibliakat?
Suluʼu tü karaloʼutakat Daniel, aküjünüsü süchiki nuʼttuinjachin Maleiwa sünain aluwatawaa sülatapa «tü akaratshikat kaʼi» (Daniel 4:16, 17). Kojuya juya süchikijee tia, nüküjain Jesús wanaawain tü akaratshikat kaʼi sümaa «tü kaʼi aapünakat namüin [na gentiilekana] nutuma Maleiwa süpüla aluwatawaa» jee nüküjain nnojoyülüin ajaʼttüin tü akaratshikat kaʼi soʼu tia (Lucas 21:24). Wekirajaa sünain sajaʼttüin sükalia tü akaratshikat kaʼi soʼu tü juyakat 1914.
2. ¿Jamüsü sukuwaʼipa tü Mmapaʼakat jee sukuwaʼipa wayuu soʼujee tü juyakat 1914?
«¿Püma wamüin kasoʼuleerüin alatüin tü makat, kaseerüin wayaawatüin akajee yaaichipain pia otta sülüʼülaain sükalia süpüla sajaʼttajatüin tü kasa alatakat sainküin mma?» müshii nümüin Jesús na nikirajüinkana (Mateo 24:3, TNM). Nüküjakalaka Jesús namüin sülatajatüin wainma kasa nuʼttapa sünain aluwatawaa chaa iipünaa. Nüküjain jouluinjatüin atkawaa, jamü jee sukutkujaainjatüin tü mmakat (paashajeʼera Mateo 24:7). Süküjatüjülia tü Bibliakat müliainjatüin maʼin wayuu sünainjee nakuwaʼipa na wayuukana «sülüʼütpa sükalia sajaʼttüinjatüin tü kasa mojusükat» (2 Timoteo 3:1-5, TNM). Soʼujee nüikaleʼerüin Maleiwa sukuwaʼipa wanee aluwatawaa, aʼwanajaasü maʼin sukuwaʼipa tü mmapaʼakat jee nakuwaʼipa na wayuukana.
3. ¿Jamüsü mojuka maʼin sukuwaʼipa tü mmapaʼakat soʼujee nüikaleʼerüin Maleiwa sukuwaʼipa aluwatawaa?
Süchikijee nüikalaain Jesús sünain aluwatawaa nutuma Maleiwa, eejatü wanee atkawaa chayaa iipünaa, Jesús nümaa Satanás jee na yolujaakana, nükanajuuka Satanás. «Ojutünüichipa nia yaa mmaluʼumüin namaa na aapiee nümaajanakana» müsü tü Bibliakat süchiki tia (Alateetkat Mapeena [Apocalipsis] 12:9, 10, 12). Jashichishi maʼin Satanás süka nütüjaain saaʼu najaʼttinneechin soʼu palit kaʼi. Eʼrüsü maʼin sümüliala wayuu nutuma yaa saaʼu tü Mmakat. Müsüjeseʼe mojuin maʼin sukuwaʼipa tü mmapaʼakat. Nuluwataapeena Jesús nutuma Maleiwa yaa saaʼu tü Mmakat, najaʼttireerü süpüshuaʼa tü kasa mojusü alatakat maaʼulu.
WEKIRAJAA SOOʼOMÜIN
Wekirajaa sünain kasain wayaawatüin anainjee nüikaleʼerüin Maleiwa sukuwaʼipa wanee aluwatawaa soʼujee tü juyakat 1914 otta wekirajaa sünain kasain waaʼinrajatüin süka watüjaaitpain saaʼu tia.
4. Süküjatüjülia tü Bibliakat kasain alatajatüin soʼu tü juyakat 1914
Aʼlapüjaashi Nabucodonosor nutuma Maleiwa. Niʼrüin nüʼlapüinruʼu tü kasa alatajatkat. Tü niʼrakat nüʼlapüinruʼu sümaa tü nüküjakat Daniel nümüin, sünainpünaasü tü alatajatkat nümüin soʼunnaa nuluwataain jee sünainpünaasü shia tü aluwatawaa nüikaleʼerüinjatkat Maleiwa (jaashajeʼera Daniel 4:17).a
Jaashajeʼera Daniel 4:20-26, süchikijee, jikirajaa sünain tü pütchi kanüliakat «Wunuʼu nüʼlapüjaaka amaa Nabucodonosor otta sukuwaʼipa Aluwatawaa nutuma Maleiwa» jee jusouta shiʼipajee tü asakinnakalü anain:
(1) ¿Kasa niʼraka Nabucodonosor nüʼlapüinruʼu? (Jaashajeʼera süchikuaʼa wetsiikulokot 20 jee 21).
(2) ¿Kasa alatajatka nümüin chi wunuʼukai? (Jaashajeʼera süchikuaʼa wetsiikulokot 23).
(3) ¿Kasa alatajatka sajaʼttapa «tü akaratshikat kaʼi»? (Jaashajeʼera süchikuaʼa wetsiikulokot 26).
Wunuʼu nüʼlapüjaaka amaa Nabucodonosor otta sukuwaʼipa aluwatawaa nutuma Maleiwa
TÜ SÜKÜJATÜJÜTKALIA TÜ BIBLIAKAT (Daniel 4:20-36)
Sukuwaʼipa aluwatawaa
(1) Wanee wunuʼu miyoʼushaata
Nnojoipünaashi aluwataain
(2) «Jushotta chira wunuʼukai» otta juuʼulaa «sülatüin akaratshi kaʼi»
Aluwataashi nüchikuaʼa
(3) «Aluwataweechi pia püchikuaʼa»
Palajatka shikeraajia:
(4) ¿Jara kayaawaseka chi wunuʼukai? (Jaashajeʼera süchikuaʼa wetsiikulokot 22).
(5) ¿Joujachi ooʼulaain suulia aluwatawaa? (Jaashajeʼera Daniel 4:29-33).
(6) ¿Kasa alataka nümüin süchikijee «tü akaratshikat kaʼi»? (Jaashajeʼera Daniel 4:34-36).
PALAJATKA SHIKERAAJIA
Sukuwaʼipa aluwatawaa
(4) Nabucodonosor chi aluwataakai saaʼu Babilonia
Nnojoipünaashi aluwataain
(5) Amamainnajaashi Nabucodonosor süchikijee juyaka 606 sü.w.b Nnojoipünaashi nia aluwataain soʼu akaratshi juya
Aluwataashi nüchikuaʼa
(6) Anashi nüchikuaʼa Nabucodonosor jee aluwataashi nia nüchikuaʼa
Chiiruaajatka shikeraajia:
(7) ¿Jaralii na kayaawasekana chi wunuʼukai? (Jaashajeʼera 1 Crónicas 29:23).
(8) ¿Joujana ooʼulaain suulia aluwatawaa? ¿Jamüsü watüjaaka saaʼu nnojoluin naluwataain soʼu yaajachin Jesús Mmapaʼa? (Jaashajeʼera Lucas 21:24).
(9) ¿Jalajachi jee joujachi aikalaain nüchikuaʼa chi aluwataainjachikai nutuma Maleiwa?
CHIIRUAAJATKA SHIKERAAJIA
Sukuwaʼipa aluwatawaa
(7) Na israelita nüneekakana Maleiwa süpüla aluwatawaa saaʼu Israel
Nnojoipünaashi aluwataain
(8) Ajaʼttinnüsü Jerusalén soʼu tü juyakat 607 sü.w. Nnojoliinnapa aluwataain na israelitakana soʼutpünaa 2.520 juya
Aluwataashi nüchikuaʼa
(9) Aikalaashi Jesús sünain aluwatawaa chaa iipünaa nutuma Maleiwa soʼu tü juyakat 1914
¿Jeʼra maʼin sükalia tü akaratshikat kaʼi?
Waʼwanaajireʼerüle wanee wetsiikulo sümaa wane wetsiikulo, wayaawateerü aaʼu jamaluʼuluin shia. Jamüsüjaʼa suluʼu Alateetkat Mapeena, ashajünüsü süchiki sülatajatüin 1.260 kaʼi süpüla shikeraajüin apünüin juya shiatapünaamüin (Alateetkat Mapeena 12:6, 14). Wayaawajüle piantua 1.260 kaʼi, eejeerü 2.520 kaʼi. Tia shia tü akaratshikat kaʼi. Saashajaale tü Bibliakat süchiki wanee kaʼi, eesü waneere juya (Ezequiel 4:6). Müsia neʼe sukuwaʼipa tü akaratshi kaʼi sümakat tü karaloʼutakat Daniel, 2.520 juya.
5. Aʼwanajaasü maʼin sukuwaʼipa tü Mmapaʼakat soʼujee tü juyakat 1914
¿Jamüinjatü sukuwaʼipa tü Mmapaʼakat naashin Jesús süchikijee nüikalaain sünain aluwatawaa? Jaashajeʼera Lucas 21:9-11 otta yooto jia süchiki tüü:
Sünainjee tü sümakat tia pütchikat, püküja tü piʼrüitkalü alatüin jee tü paapüitkalü achiki.
Nüküjain chi aluwataaushikai Pablo jamüinjatüin sukuwaʼipa wayuu sülüʼütpa sükalia sajaʼttajatüin sukuwaʼipa aluwatawaa sutuma wayuu. Jaashajeʼera 2 Timoteo 3:1-5, TNM otta yooto jia süchiki tüü:
¿Müsüche piʼrüin sukuwaʼipa wayuu maaʼulu yaa?
6. Waaʼinrajatka süka watüjaaitpain saaʼu nüikaleʼerüin Maleiwa sukuwaʼipa wanee aluwatawaa
Jaashajeʼera Mateo 24:3, 14 otta yooto jia süchiki tüü:
¿Kasa aʼyatawaa aaʼinnaka süka nüikaleʼerüitpain Maleiwa sukuwaʼipa wanee aluwatawaa?
¿Kasa tü paaʼinrajatkat süpüla püküjain pütchi?
Nüikaleʼerüitpa Maleiwa sukuwaʼipa wanee aluwatawaa chayaa iipünaa jee alüʼütsü nükalia süpüla nuluwataainjachin saaʼu tü Mmakat süpüshuaʼa. Jaashajeʼera Hebreokana 10:24, 25 otta yooto jia süchiki tüü:
¿Kasa tü waaʼinrajatkat wapüshuaʼa «süka sülüʼülüin nükalia chi Senyotkai süpüla nüleʼejüinjachin nüchikua»?
¿Kasaje paainjaka pütüjaale saaʼu eein wanee kasa akaalinjeetka wayuu jee kateetka atuma soʼu?
EESHII WAYUU EEKAI NASAKIRÜIN: «¿Jamüsü naküjaka maʼin süchiki tü juyakat 1914 na aküjaliikana pütchi nüchiki Jehová?».
¿Jameerü pünüiki püsakinnüle?
WATÜJAAITPAKA AAʼU
Sünainjee tü süküjatüjütkalia tü Bibliakat otta tü alatakat sainküin Mmakat, wayaawata aaʼu nüikaleʼerüin Maleiwa sukuwaʼipa wanee aluwatawaa. Watüjaa aaʼu shiimain tia, müshiijeseʼe waküjain pütchi süchiki otta woutkajaain namaa na wawalayuukana.
Pusouta shiʼipajee
¿Kasa tü alatakat süchikijee sajaʼlajaain tü akaratshikat kaʼi aküjünaka anülia suluʼu tü karaloʼutakat Daniel?
¿Jamüsü pütüjaaka saaʼu nüikaleʼerüin Maleiwa sukuwaʼipa wanee aluwatawaa soʼujee tü juyakat 1914?
¿Kasa paaʼinrajatka süka pütüjaaitpain saaʼu nüikaleʼerüin Maleiwa sukuwaʼipa wanee aluwatawaa?
PÜNAʼLA SOOʼOMÜIN
Na wayuu ashajakana süchiki kasa alatüirü, nashajüin suʼwanajaain maʼin sukuwaʼipa wayuu soʼujee tü juyakat 1914. Paashajeʼera süchiki tia.
«Sükalioʼu suʼwanajaain maʼin sukuwaʼipa wayuu» (¡Eeja Waaʼin!, aaʼuriiroʼu 2007)
Paashajeʼera nüchiki wanee wayuu anoutaaka akuwaʼipa sünainjee tü sümakat Mateo 24:14.
«Kamalainshaatasü tamüin ashaitaa béisbol» (Aapiria Wayuu, nuum. 3, 2017)
¿Jamüsü watüjaaka saaʼu sünainpünaain tü aluwatawaa nüikaleʼerüinjatkat Maleiwa tü ashajünakat suluʼu Daniel kapiitulo 4?
Ajaʼlajaasü tü akaratshikat kaʼi soʼu tü juyakat 1914, ¿jamüsü watüjaaka saaʼu tia?
a Sünain ekirajaayakat tüü, paashajeʼera tü piamasükat pütchi yalaka sajaʼttiamüin tü pütchikat «Pünaʼla sooʼomüin».
b sü.w. süpülapünaa wakalia maluʼulu. Jee so.w. soʼu wakalia maluʼulu.
-
-
Tü eejeetkat sutuma nüikaleʼerüin Maleiwa sukuwaʼipa wanee aluwatawaaAnainjatka atuma pukuwaʼipa waneepia. Pütüja sünainjee tü sümakat tü Bibliakat
-
-
EKIRAJAAYA 33
Tü eejeetkat sutuma nüikaleʼerüin Maleiwa sukuwaʼipa wanee aluwatawaa
Nüikaleʼerüitpa Maleiwa sukuwaʼipa wanee aluwatawaa chaa iipünaa. Alüʼütsü sükalia süpüla nunouteʼerüin sukuwaʼipa tü kasa mojusü eekat saaʼu tü Mmakat. Wekirajaa sünain tü kasa anasü eejeetkat nutuma Maleiwa nuluwataapa saaʼu tü Mmakat.
1. ¿Kaseerü naaʼinraka Maleiwa süpüla nnojoluin müliain wayuu jee süpüla jimatüin saaʼin?
Najaʼttireena Jesús soʼunnaa Armagedón na wayuu mojulaashiikana otta tü sukuwaʼipakat aluwatawaa sutuma wayuu (Alateetkat Mapeena [Apocalipsis] 16:14, 16). Soʼu tia, ekeraajeerü tü sümakat tü Bibliakat, tü makat mayaa: «Soʼu palitchon kaʼi nnojoleechi eein chi mojulaashikai» (Salmo 37:10). Nuluwataapa Jesús saaʼu tü Mmakat, nnojoleerü müliain wayuu atumawaa jee jimateerü saaʼin (paashajeʼera Isaías 11:4).
2. ¿Jameerü sukuwaʼipa wayuu saaʼinnapa tü keeʼireekat naaʼin Maleiwa yaa Mmapaʼa?
Nuluwataapa Jesús nutuma Maleiwa, «nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29). Aneerü maʼin kepiaa suluʼu wanee mma anasü eere anamiain wayuu, alin napüla Jehová jee aijiraain naya. Nnojoleerü ayuulin wayuu jee kateerü soʼu waneepia.
3. ¿Kaseerü eeka nutuma Maleiwa najaʼttirapa Jesús na mojulaashiikana?
Najaʼttirapa Jesús na mojulaashiikana, aluwataajeechi nia soʼu 1.000 juya. Aluwataajeechi nia namaa na 144.000 aneekuushikana süpüla taashin natuma wayuu suulia kaainjalaa otta süpüla anain maʼin naya. Sajaʼttapa tü miitkat juya, aneerü tü Mmakat jee aneerü nakuwaʼipa na wayuukana süka noonoojeenain sümaa tü nuluwataakalü anain Jehová. Naapeerü Jesús süchikuaʼa nümüin Jehová tü aluwatawaa naapakat paala nümüin. Kojuteerü maʼin nünülia Jehová sutuma wayuu (Mateo 6:9, 10, TNM). Sütüjaweerü aaʼu wayuu anain maʼin nukuwaʼipa Jehová sünain aluwatawaa jee sünain aaʼinmajaa tü nupueulosekat. Nnojoleechi eein Satanás, na yolujaakana namaa na nnojoliikana anain amüin niainjachin Jehová aluwataain (Alateetkat Mapeena 20:7-10). Nnojoleerü kasain amojujuin sukuwaʼipa tü kasa eejeetkat nuluwataapa Jesús nutuma Maleiwa, eejeerü shia süpüla kaʼikat süpüshuaʼa.
WEKIRAJAA SOOʼOMÜIN
Wekirajaa sünain jamüin wanoujainjanaka sünain shikeraajeerüin tü nüchekakat Maleiwa wapüleerua. Naaʼinreerü tia sükajee tü sukuwaʼipakat aluwatawaa nutuma.
4. Aluwataajeechi Maleiwa, nnojoleena nayain na wayuu aluwataashiikana
«Aluwataashii na wayuukana saaʼu wayuu süpüla namojujüin neʼe sukuwaʼipa» (Eclesiastés 8:9). Nunouteʼereerü Maleiwa süpüshuaʼa tü kasa mojusü eekat natuma na wayuu aluwataashiikana.
Jaashajeʼera Daniel 2:44 jee 2 Tesalónica 1:6-8 otta yooto jia süchiki tüü:
¿Kaseerü naaʼinraka Jehová nümaa Jesús naka na aluwataashiikana jee naka na wanaawakana aaʼin namaa?
Sünainjee tü pütüjaaitpakalü aaʼu nüchiki Jehová nümaa Jesús, ¿jamüsü pütüjaaka saaʼu aneerüin natuma tü naaʼinreetkat jee nnojoleerüin koʼuin nakuwaʼipa sümüin wayuu?
5. Nia anaka maʼin Jesús süpüla aluwatawaa
Süka niain aneekünüin Jesús süpüla aluwatawaa nutuma Maleiwa, wainmeerü tü kasa anasü naaʼinreetkat süpüleerua wayuu. Jünaja tü VIDEOKOT. Weʼreerü yala tü naaʼinreetkat Jesús süpüla nükaalinjain na wayuukana. Naaʼinreerü shia sükajee tü nüpülainkat Maleiwa jee süka alin maʼin nüpüla na wayuukana.
Tü kasa pülasü naaʼinrapuʼukat Jesús soʼu yaajachin nia saaʼu tü Mmakat, naaʼinreerü shia nuluwataapeena saaʼu tü Mmakat. Sünainjee tü aküjünakat suluʼu tü wane süpanakat, ¿jarat tü piʼreekat ekeraajüin? Jaashajeʼera süpüshuaʼa tü wetsiikuloirua eere süküjünüin süchiki tia.
YAAIWAʼAYA JESÚS MMAPAʼA...
NULUWATAAPA JESÚS SIRUMATUʼUJEE...
... niimaleʼerüin tü wawaikat (Marcos 4:36-41)
... nnojoleerü eein wawai jee nnojoleerü asetüin palaa (Isaías 35:1, 2)
... nikirüin wainma wayuu (Mateo 14:17-21)
... nnojoleerü eein jamü (Salmo 72:16)
... anasü wayuu nutuma (Lucas 18:35-43)
... aneerü wayuu nutuma (Isaías 33:24)
... nüsoʼireʼerüin naaʼin na outushiikana (Lucas 8:49-55)
... nüsoʼireʼereerü naaʼin na wayuu outuinnapakana jee müiria nnojoluin eein outaa (Alateetkat Mapeena 21:3, 4)
6. Aneerü maʼin wakuwaʼipa sutuma tü aluwatawaa nüikaleʼerakat Maleiwa
Sükajee tia sukuwaʼipakat aluwatawaa, nikeraajeerü Maleiwa tü nüchekakat süpüleerua wayuu. Kepieena naya yaa saaʼu tü Mmakat otta aneerü maʼin shia. Jünaja tü VIDEOKOT süpüla jütüjaain saaʼu tü naaʼinrakat Jehová süpüleerua wayuu nükajee Jesús.
Jaashajeʼera Salmo 145:16 otta yooto jia süchiki tüü:
¿Jamüsü paaʼin süka pütüjaain saaʼu nikeraajeerüin Jehová «süpüshuaʼa tü kasa anasü keeʼireekat saaʼin wayuu»?
EESHII WAYUU EEKAI NAMÜIN: «Eere wanee aluwataai anashi, anoutaajeerü sukuwaʼipa tü mmapaʼakat».
¿Kasa nunouteʼereetka Maleiwa saaʼu tü Mmakat isaka nachiki na wayuu aluwataashiikana?
WATÜJAAITPAKA AAʼU
Nikeraajeerü Maleiwa süpüshuaʼa tü kasa nüchekakat süpüleerua wayuu. Anashaateerü sukuwaʼipa tü Mmakat, nnojoleerü wayuu mojulaasü, nayeena neʼe eeka na wayuu anamia aʼwaajakana Jehová süpüla kaʼikat süpüshuaʼa.
Pusouta shiʼipajee
¿Kaseerü naaʼinraka Maleiwa süpüla kojutuin nutuma nünülia?
¿Jamüsü watüjaaka saaʼu nikeraajeerüin Maleiwa süpüshuaʼa tü nüchekakat wapüleerua?
Saʼakajee tü kasa naaʼinreetkat Maleiwa, ¿jarat tü piʼreetkat maʼin amüin?
PÜNAʼLA SOOʼOMÜIN
Paashajeʼera süchiki kasain wayu Armagedón
Paashajeʼera süchiki tü kasa alatajatkat soʼu tü kaʼi eere müliain maʼin wayuu (Mateo 24:21).
«¿Kasa wayu tü müliaa miyoʼusükat?» (Pütchi suluʼuka jw.org)
Jülüja paaʼin jameerüin pukuwaʼipa sümaa püpüshi soʼunnaa tü aluwatawaa eeinjatkat nutuma Maleiwa.
Sünain tü pütchikat «Wainma kasa tatüjaweeka aaʼu», paashajeʼera nüchiki wanee wayuu mojukai amüin tü naainjakat na poliitikokana. Anapejeʼe naaʼin nütüjaapa saaʼu tü sümakat tü Bibliakat.
«Sunouteʼerüin nakuwaʼipa tü Bibliakat» (Aapiria Wayuu, eneeroʼu 1, 2012)
-