EKIRAJAAYA 18
¿Kasa wayaawataka anainjee na anoujashii shiimainshiikana?
Wainma na wayuu anoujakana nünain Cristo naashin, nnojotpejeʼe wanaawain tü nanoujakalü anain jee nnojotsü wanaawain tü nakuwaʼipakat. ¿Jamakaʼa süpüla wayaawatüin saaʼu jaraliin na anoujashii shiimainshiikana?
1. ¿Jamaluʼut tü pütchikat Cristiano?
Tü pütchikat Cristiano, naya na nümaajanakana Cristo maluʼulu jee na oushikajaakana süchiirua nukuwaʼipa (paashajeʼera Aluwataaushikana [Hechos] 11:26). ¿Jamüsü süpüla watüjaain saaʼu jaraliin na nümaajanakana Cristo? «Müleka joonoole sümaa tanüiki waneepia, shiimüinshaana jiain tekirajüin» müshi Jesús (Juan 8:31). Na anoujashii shiimainshiikana, oonooinjana sümaa tü nikirajakalü anain Jesús. Nanouja anainrü tü sümakat tü Bibliakat otta nekirajüin tü sümakat maʼaka naaʼinrüin shia Jesús. Tü nanoujakalü anain na anoujashii shiimainshiikana suluʼujeejatü tü Bibliakat (paashajeʼera Lucas 24:27).
2. ¿Jamüsü watüjaaka saaʼu aijiraain maʼin na anoujashii shiimainshiikana?
«Aaijiraa jia jüpüla maa aka alin jia tapüla» müshi Jesús namüin na nikirajüinkana (Juan 15:12). ¿Jamüsü watüjaaka saaʼu alin nüpüla Jesús na nümaajanakana? Alatitshi nia kaʼi namaa, nütütüleʼerüin naaʼin, nükaalinjain naya jee aapajiraashi nia nikii naaʼu (1 Juan 3:16). «Aishi pia tapüla» nnojoishii müin neʼe na anoujashii shiimainshiikana. Sükajee tü namakat otta tü kasa naaʼinrakat jaʼyasü naaʼu aijiraain maʼin naya.
3. ¿Kasa aʼyatawaa naaʼinmaaka maʼin na anoujashii shiimainshiikana?
Aapüshi Jesús aʼyatawaa namüin na nikirajüinkana. «Juʼuna jüküjaiwa sümüin wayuu süchiki nukuaippa Maleiwa sünain aluwatawaa» müshi nia namüin (Lucas 9:2). Na nikirajüinkana Jesús, nnojoishii naya aküjain neʼe pütchi suluʼupünaa tü aʼwaajüleekat. Aküjashiʼiya naya pütchi eere wainmain wayuu otta nepialuʼupünaa na wayuukana (paashajeʼera Aluwataaushikana 5:42; 17:17). Na anoujashii shiimainshiikana maaʼulu yaa, aküjashii naya pütchi eepünaale eein wayuu napüla. Aishii napüla na wayuukana, makalaka naküjain namüin tü sümakat tü Bibliakat süchiki anainjatüin tü Mmapaʼakat nutuma Maleiwa otta natütüleʼerüin naaʼin sükajee tü sümakat tü Bibliakat (Marcos 12:31).
WEKIRAJAA SOOʼOMÜIN
Wekirajaa sünain kaseerüin wayaawatüin anainjee jaraliin na anoujashii shiimainshiikana. Weʼreerü naatain nakuwaʼipa noulia na nnojoliikana aaʼinrüin tü nümakat Jesús.
4. Nekirajaa anainrü tü sümakat tü Bibliakat
Kojutusü tü Nünüikikat Maleiwa namüin na nikirajüinkana Jesús.
Wainma na anoujakana nünain Cristo naashin, nnojotpejeʼe kojutuin namüin tü sümakat tü Bibliakat. Jünaja tü VIDEOKOT otta yooto jia süchiki tüü:
¿Jamüsü nnojotka nekirajüin tü nikirajakalü anain Jesús na suluʼukana tü wane iküleesiakalüirua?
Tü nikirajapuʼukalü anain Jesús shia tü nümakat Maleiwa. Jaashajeʼera Juan 18:37 otta yooto jia süchiki tüü:
Sünainjee tü nümakat Jesús, ¿jamüsü süpüla wayaawatüin saaʼu jaraliin na anoujashii aaʼinrakana tü sümakat tü Bibliakat?
5. Aküjashii naya pütchi süchiki tü sümakat tü Bibliakat
Aküjashii pütchi na nikirajüinkana Jesús.
Süpülapünaa nuʼunuin Jesús chaa sirumatuʼumüin, aapüshi nia aʼyatawaa namüin na nikirajüinkana. Ayatayülia aaʼinnüin tia maaʼulu yaa. Jaashajeʼera Mateo 28:19, 20 otta Aluwataaushikana 1:8 otta yooto jia süchiki tüü:
¿Jalamüinsü maʼin aküjünüin süchiki tü pütchi anasükat?
6. Naaʼinrüin tü nekirajakalü achiki
Eeshi wanee wayuu kanüliakai Tom, niyaawata aaʼu jaraliin na anoujashii shiimainshiikana, ¿kasa niyaawataka anainjee naya? Jünaja tü VIDEOKOT otta yooto jia süchiki tüü:
Suluʼu tü video wanajüitpakat, ¿jamüshi nujuʼitaka Tom suulia tü iküleesia kaluʼujachikat nia?
¿Jamüsü niyaawataka saaʼu shiain tü shiimainkat tü nüntakalü anain?
Alanaʼaleesia maʼin tü waaʼinrakat suulia tü wamakat. Jaashajeʼera Mateo 7:21 otta yooto jia süchiki tüü:
Naashin Jesús, ¿jamüsü anaka maʼin waaʼinrüle tü nüchekakat Maleiwa suulia «anoujashi taya» wamüin neʼe?
7. Aijiraashii maʼin naya
Aijiraashii na nikirajüinkana Jesús.
¿Jamüshii aijiraaka maʼin na anoujashii shiimainshiikana mayaainjeʼe eein süpüla jamajüin naya sünainjee tia? Jünaja tü VIDEOKOT otta yooto jia süchiki tüü:
Suluʼu tü video wanajüitpakat, ¿jamüshi nusoutaka Lloyd naaʼu Johansson mayaainjeʼe eein süpüla nuʼutunuin aaʼin saaʼujee tia?
¿Naaʼinrüinche tia Lloyd süka niain napüshi na anoujashii shiimainshiikana?
Jaashajeʼera Juan 13:34, 35 otta yooto jia süchiki tüü:
¿Kasaje naaʼinraka na nikirajüinkana Jesús (na anoujashii shiimainshiikana) süpüla nakaalinjain wanee wayuu naatakai eʼiruku jee anüiki?
¿Kasaje naaʼinraka soʼunnaa wanee kasachiki?
EESHII WAYUU EEKAI NAMÜIN: «Wainma na anoujakana nünain Cristo naashin. ¿Jaraliikaʼa maʼin na anoujashii shiimainshiikana?».
Süpüla niyaawatüin saaʼu wanee wayuu jaraliin na anoujashii shiimainshiikana, ¿jarat tü wetsiikulo anakat süpüla paashajeʼerüin nümüin?
WATÜJAAITPAKA AAʼU
Na anoujashii shiimainshiikana naaʼinrüin tü sümakat tü Bibliakat, aijiraashii maʼin naya sümaa nakaalinjiraain otta naküjain süchiki tü pütchi suluʼukat tü Bibliakat.
Pusouta shiʼipajee
¿Kasa nanoujaka anain na anoujashii shiimainshiikana?
¿Kasa wayaawataka anainjee nakuwaʼipa?
¿Jeʼtsü tü aʼyatawaa naaʼinmaakat maʼin?
PÜNAʼLA SOOʼOMÜIN
Pikirajaa sooʼomüin nachiki waneinnua wayuu ashatakana nukuwaʼipa Jesús jee aaʼinrakana tü nikirajakalü anain.
Anuu süchiki wanee wayuu monjapuʼuka, naʼakaitpa shia na anoujashii shiimainshiikana.
Pünaja süchiki tü naaʼinrakat na anoujashii shiimainshiikana süpüla nakaalinjain na nawalayuu alatakana amüin kasa mojusü.
Nakaalinjain na nawalayuu müliakana sutuma wawai (shiʼipa neʼe) (3:57)
Nüküjain Jesús tü nakuwaʼipainjatkat na nikirajüinkana. Paashajeʼera süchiki müinya nakuwaʼipa na anoujashii namaiwajanakana otta na anoujashii shiimainshiikana maaʼulu yaa.
«¿Kasa wayaawataka anainjee na anoujashii shiimainshiikana?» (Aapiria Wayuu, maatsoʼu 1, 2012)