¿Nayache na anoujashii shiimainshiikana na Aküjaliikana pütchi?

Wayakana aküjaliikana pütchi nüchiki Jehová, watüjaa aaʼu wayain na anoujashii shiimainshiikana. ¿Jamüsü watüjaaka saaʼu tia? Wekirajaa süchiki tü wanoujakalü anain, jamüin «aküjalii pütchi nüchiki Jehová» wamünaka otta jamüin aijiraaka maʼin waya.

1. ¿Kasa kaluʼujeejatka tü nanoujakalü anain?

«Tü pünüiki shiimüinkat» müshi Jesús nümüin Maleiwa (Juan 17:17). Wayakana aküjaliikana pütchi nüchiki Jehová, washatüin nukuwaʼipa Jesús sünain suluʼujeejatüin tü Bibliakat tü wanoujakalü anain. Jamüsüjaʼa soʼu tü juyakat 1870, eeshii waneinnua ekirajaalii sünain tü Bibliakat, nekirajaa maʼin anainrü tü sümakat tü Bibliakat. Nanouja anainrü tü sümakat, jaʼitairü naatain shia suulia tü nanoujakalü anain na suluʼukana tü wane iküleesiakalüirua. Noʼttakalaka sünain aküjaa pütchi sümüin wayuu süchiki tü sümakat tü Bibliakat.a

2. ¿Jamüshii aküjalii pütchi nüchiki Jehová wamünaka?

«Aküjalii pütchi tachiki» müshi Jehová namüin na anoujakana nünain süka naküjain süchiki tü shiimainkat nüchiki (Hebreokana 11:4–12:1). «Aküjalii jia pütchi tachiki» müshi Jehová namüin na anoujashii eejanakana namaiwa (paashajeʼera Isaías 43:10). «Chi lotokoi akuwaʼipa sünain aküjaa nünüiki chi Maleiwakai» müsü tü Bibliakat nüchiki Jesús (Alateetkat Mapeena [Apocalipsis] 1:5). «Aküjalii pütchi nüchiki Jehová» münüshii waya soʼujee tü juyakat 1931, kojutusü wamüin waküjaliin pütchi nüchiki Jehová.

3. ¿Jamüsü watüjaaka saaʼu alin wayuu napüla na Aküjaliikana pütchi maʼaka alin wayuu nüpüla Jesús?

Aishii nüpüla Jesús na nikirajüinkana, müshii aka saaʼin wanee nüpüshi nümüin (paashajeʼera Marcos 3:35). Akaataajaʼa neʼe na Aküjaliikana pütchi paaʼinwajiraashii naya, müshii aka saaʼin napüshi namüin na nawalayuu eekana sainküinpünaa tü mmakat. Müshiijeseʼe «tawala», namüin nümüin wanee wayuu jee sümüin wanee wayuu anoujiraaka wanaa namaa (Filemón 1, 2). Oonooshiʼiya waya sümaa pütchikat tüü: «Anakaja müleka kojutüle wayuu süpüshua jütüma sümaa alin jüpüla na juwalayuukana anoujashiikana wanaa jümaa» (1 Pedro 2:17). Süka aipüraliin wayuu na Aküjaliikana pütchi, watta saalii tü kasa naaʼinrakat napüleerua. Nakaalinjain na nawalayuu eʼrakana müliaa sainküinpünaa tü mmakat.

WEKIRAJAA SOOʼOMÜIN

4. Suluʼujeejatü tü Bibliakat tü wanoujakalü anain

Nüküjatüjülia Jehová shiyaawatünajatüin aaʼu tü sümakat tü Bibliakat. Jaashajeʼera Daniel 12:4 otta yooto jia süchiki tüü:

• ¿Kasa tü atüjaaneetkat maʼin aaʼu ayatüle nekirajaain sünain tü Bibliakat na aʼyataaliikana nümüin Maleiwa?

Wekirajaa süchiki tü naaʼinrakat na ekirajaaliikana sünain tü Bibliakat maʼaka naaʼin Charles Russell süpüla nekirajaain sünain tü Bibliakat. Junaja tü VIDEOKOT otta yooto jia süchiki tüü:

VIDEO: Ayaawatüna aaʼu tü sümakat tü Bibliakat (7:45)

• Suluʼu tü video wanajakat, ¿kasa naaʼinraka Charles Russell otta na eejanakana nümaa süpüla nekirajaain sünain tü Bibliakat?

¿Pütüjaa aaʼu tüü?

Eesü wapansaajüle tü wanoujakalü anain. ¿Jamüsü wapansaajaka shia? Jamüsüjaʼa suwasajaapa aika, wayaawata aaʼu tü kasa nnojotkat weʼrüin sutuma piyuushika. Müsia neʼe sukuwaʼipa nutuma Maleiwa, niyaawatirüin waya tü Nünüikikat shiʼipaʼaya (jaashajeʼera Proverbios 4:18). Mayaainjeʼe nnojoluin suʼwanajaain tü Bibliakat, wapansaajüin tü wanoujakalü anain wayaawataleepa saaʼu tü sümakat.

5. Waküjain tü shiimainkat nüchiki Jehová

VIDEO: Eʼnnaajünüshii waya sünainjee nünülia Maleiwa (2:40)

• ¿Jamüshii «aküjalii pütchi nüchiki Jehová» wamünaka?

«Aküjaliinjana pütchi tachiki» ¿jamüshi nümaka Jehová namüin na aʼyataaliikana nümüin? Shia süka nayaawatüin saaʼu na wayuukana niain chi Maleiwa shiimainshikai otta süka wainmain tü alawaa aküjünakat nüchiki. Wekirajaa süchiki piamasü alawaa aküjünaka nüchiki Jehová.

Noʼutku na suluʼukana tü wane iküleesiakalüirua, nekirajüin wayuu süpüla naʼwaajüin Maleiwa sükajee ayaakuaa. Jaashajeʼera Levítico 26:1 otta yooto jia süchiki tüü:

• Saashin tia wetsiikulokot, ¿anasüche nümüin Jehová waʼwaajüle nia sükajee wanee ayaakuaa?

Noʼutku na shikiipüʼükana tü wane iküleesiakalüirua, nekirajüin na wayuukana sünain niainya neʼe Jesús chi Maleiwakai. Jaashajeʼera Juan 20:17 otta yooto jia süchiki tüü:

• Saashin tia wetsiikulokot, ¿niachejeʼeya neʼe Jesús chi Maleiwakai?

• Nuluwataain Jehová na Aküjaliikana pütchi süpüla naküjain tü shiimainkat nüchiki otta nüchiki chi Nüchonkai, ¿jamüsü paaʼin sutuma tia?

6. Aijiraashii maʼin waya

Saashin tü Bibliakat, choʼujaashii na wawalayuukana wamüin maʼaka choʼujaain wamüin watüna sümaa wasaʼa. Jaashajeʼera 1 Corinto 12:25, 26, TNM otta yooto jia süchiki tüü:

• ¿Kasa naaʼinrajatka na anoujashii shiimainshiikana neʼrüle müliain na waneinnua?

• Sünainjee tü pütüjaaitpakalü aaʼu, ¿kasa naaʼinraka na Aküjaliikana pütchi süpüla neeʼiyatüin naalin napülajiraa?

Wanaa sümaa sülatüin kasa mojusü namüin na Aküjaliikana pütchi, chamaatüshii na nawalayuukana sünain akaalinjaa naya. Anuu wanee süpüshi tü naaʼinrakat. Jünaja tü VIDEOKOT. Süchikijee, yooto jia süchiki tüü:

VIDEO: Tü aaʼinnakat süchikijee tü wawaikat Matthew chaa Haití (5:29)

• ¿Kasa naaʼinraka na aküjaliikana pütchi nüchiki Jehová süpüla nakaalinjain na nawalayuukana süchikijee tü wawaikat Matthew?

WATÜJAAITPAKA AAʼU

Wayakana aküjaliikana pütchi nüchiki Jehová, waya na anoujashii shiimainshiikana. Sainküinshii waya mmakat süpüshuaʼa, suluʼujeejatü tü Bibliakat tü wanoujakalü anain otta waküjain sümüin wayuu tü shiimainkat nüchiki Jehová.

Pusouta shiʼipajee

• ¿Jamüshii «aküjalii pütchi nüchiki Jehová» wamünaka?

• ¿Kasa waaʼinraka süpüla sütüjaanüin aaʼu aijiraain waya?

• ¿Nayache na Aküjaliikana pütchi na anoujashii shiimainshiikana? ¿Jamüsüjaʼa saaʼin pümüin?

PÜNAʼLA SOOʼOMÜIN

Pünaja sooʼomüin nachiki na Aküjaliikana pütchi.

Na aküjaliikana pütchi nüchiki Jehová naaʼinrüin tü nekirajakalü achiki. Shiʼipa 1: Nayaawatüitpa saaʼu tü shiimainkat (1:00:53)

Pünaja süchiki wanee alawaa ekirajünaka anain wayuu otta kasain naaʼinrüin na Aküjaliikana pütchi süpüla shiyaawatünüin aaʼu tü shiimainkat.

Kojutusü nünülia Maleiwa natuma na aʼyataaliikana nümüin (7:08)

Anuu süpüshi tü kasa pütüjaweekalü aaʼu nachiki na aküjaliikana pütchi nüchiki Jehová.

«Süsakirawaika anain wayuu nachiki na aküjaliikana pütchi nüchiki Jehová» (Pütchi suluʼuka jw.org)

Aaʼinrapuʼushi kasa mojusü Stephen sutuma üttüin naaʼin nanain na wulekana ata. Paashajeʼera süchiki jamüin niiʼirataka nukuwaʼipa sünainjee niʼrüin nakuwaʼipa na Aküjaliikana pütchi.

«Amojüjaasü maʼin tü takuwaʼipakat shiʼipaʼaya» (Pütchi suluʼuka Aapiria Wayuu, 2015)