EKIRAJAAYA 21
¿Kasa aainjünaka süpüla süküjünüin tü pütchi anasükat?
Nuluwataapeena Jehová, najaʼttireerü tü kasa müliakalü atuma wayuu. Naainjeerü tia soʼu palitchon kaʼi. Anasü maʼin tia pütchikat, müsüjeseʼe waküjainjatüin süchiki sümüin wayuu. Nuluwataain Jesús na nikirajüinkana sünain naküjainjatüin süchiki tia pütchikat sainküin tü mmakat süpüshuaʼa (Mateo 28:19, 20). ¿Kasa naaʼinraka na Aküjaliikana pütchi süpüla noonooin sümaa tü nuluwataakalü anain Jesús?
1. ¿Jamüsü watüjaaka saaʼu shikeraajüin maaʼulu tü sümakat Mateo 24:14?
Anuu tü nümakat Jesús süchiki tia: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua» (Mateo 24:14). Naaʼinmaasü maʼin na Aküjaliikana pütchi aʼyatawaakat tia. Aküjashii naya pütchi sainküin mmakat süpüshuaʼa. Alatüsü suulia 1.000 anüiki naküjaka aluʼu shia. Wainma aʼyatawaa sünain tia, nountapejeʼe shia süka nükaalinjain naya Jehová.
2. ¿Kasa aainjünaka süpüla süküjünüin pütchi sümüin wayuu?
Aküjashii waya pütchi eere eein wayuu maʼaka naaʼinrapuʼuin shia na anoujashii namaiwajanakana. Aküjashii waya pütchi sainküin piichi (Aluwataaushikana [Hechos] 5:42, TNM). Sükajee müin sukuwaʼipa, eesü süpüla süküjünüin pütchi sümüin wainma wayuu. Sükajee nnojoliin na wayuukana nepialuʼu, aküjashii waya pütchi eere jouluin wayuu. Wachajaain sukuwaʼipa süpüla waküjain pütchi sümüin wayuu nüchiki Jehová jee süchiki tü kasa naaʼinrajatkat.
3. ¿Jaralii na aküjainjanakana süchiki tü pütchi anasükat?
Napüshuaʼa na anoujashii shiimainshiikana, aküjainjana süchiki tü pütchi anasükat. Waaʼinmaasü maʼin tia, wachajaain sukuwaʼipa süpüla waküjain pütchi namüin na wayuukana napüshuaʼa süka kateerüin noʼu sünainjee (paashajeʼera 1 Timoteo 4:16). Nnojoishii waya achuntuin walawaa saaʼujee waaʼinrüin tia. «Anakaja müleka nnojorule jüchuntüin awalaajünaa saaʼu tü kasa anasü jaaʼinrakat sümüin wayuu» müsü sünüiki tü Bibliakat (Mateo 10:7, 8). Mayaainjeʼe eein wayuu nnojotka aapajeein wanüiki, ayatüshiʼiya waya aküjain pütchi süka waʼwaajüin Jehová jee talatüin naaʼin watuma sünainjee waaʼinrüin tia.
WEKIRAJAA SOOʼOMÜIN
Wekirajaa süchiki tü naaʼinrakat na aküjaliikana pütchi nüchiki Jehová süpüla naküjain pütchi sainküin mmakat süpüshuaʼa jee tü naaʼinrakat Jehová süpüla nükaalinjain naya.
Aküjashii waya pütchi sainküin mmakat süpüshuaʼa: (1) Costa Rica; (2) Estados Unidos; (3) Benín; (4) Tailaindia; (5) Yap (Micronesia); (6) Suecia.
4. Wachajaain sukuwaʼipa süpüla waküjain pütchi eepünaale eein wayuu
Na Aküjaliikana pütchi, nachajaain sukuwaʼipa süpüla naküjain tü pütchi anasükat eepünaale eein wayuu. Jünaja tü VIDEOKOT otta yooto jia süchiki tüü:
¿Kasa ponoko paaʼin sünainjee tü naaʼinrakat na Aküjaliikana pütchi süpüla naküjain pütchi sümüin wayuu?
Jaashajeʼera Mateo 22:39 otta Roma 10:13-15, TNM otta yooto jia süchiki tüü:
¿Kasa waaʼinraka süka alin wapüla wayuu?
¿Jamüshii noʼuluʼu Jehová na aküjakana süchiki tü pütchi anasükat? (Jaashajeʼera süchikuaʼa wetsiikulokot 15).
5. Aʼyataajiraashii waya nümaa Maleiwa
Watüjaa aaʼu niain Jehová oʼunirüin sukuwaʼipa tü aküjaakat pütchi. Anuu tü alatakat sümüin wanee wayuu chejeʼewat Nueva Zelanda. Achuntusü shia kaalinwaa nümüin Jehová süpüla shiʼraajüin nukuwaʼipa jee suchuntuin nünülia soʼu tia. Shiasaʼa apünüin oora süchikijee tia, nüntakalaka wanee wawala jee nütaletaka supuettoʼuse shipia süpüla nüküjain pütchi sümüin.
Jaashajeʼera 1 Corinto 3:9, TNM otta yooto jia süchiki tüü:
Sünainjee tü alatakat nümüin chia wawalakai, ¿jamüsü watüjaaka saaʼu nuʼunirüin Jehová sukuwaʼipa tü aküjaakat pütchi?
Jaashajeʼera Aluwataaushikana 1:8 otta yooto jia süchiki tüü:
¿Jamüsü choʼujaaka wamüin nükaalinjain waya Jehová süpüla waküjain pütchi?
¿Pütüjaa aaʼu tüü?
Sünain tü outkajawaakat Wakuwaʼipa otta Waʼyataain nümüin Maleiwa, ekirajünüshii waya sünain jamüinjatüin sukuwaʼipa watuma tü aküjaakat pütchi. Puʼunuichire sünain tia outkajawaakat, ¿jamüsü saaʼin pümüin tü ekirajünakalü anain waya süpüla waküjain pütchi?
6. Aküjashii waya pütchi süka nuluwataain waya Maleiwa
Na nnojoliikana acheküin tü pütchi anasükat nükalioʼu Jesús, nachajaain sukuwaʼipa süpüla nnojoluinjatüin süküjünüin. Nayasaʼa na anoujashiikana, asoutushii suluʼupünaa laülaapia süpüla naküjainjatüin tü pütchi anasükat (Filipos 1:7, TNM). Müsia shia maaʼulu natuma na Aküjaliikana pütchi.a
Jaashajeʼera aluwataaushikana 5:27-42 otta yooto jia süchiki tüü:
¿Jamüshii nnojoluinjanaka wooʼulaain suulia waküjain pütchi? (Jaashajeʼera süchikuaʼa wetsiikulokot 29, 38 otta 39).
EESHII WAYUU EEKAI NASAKIRÜIN: «¿Jamüshii waraittaka na Aküjaliikana pütchi sainküinpünaa miichi?».
¿Jameerü pünüiki pümünüle?
WATÜJAAITPAKA AAʼU
Nuluwataain Jesús na oushikajaakana süchiirua nukuwaʼipa sünain aküjaa tü pütchi anasükat sainküin mmakat süpüshuaʼa. Nükaalinjain naya Jehová süpüla nountuin naaʼinrüin tia.
Pusouta shiʼipajee
¿Kasa aaʼinnaka süpüla süküjünüin süchiki tü pütchi anasükat sainküin mmakat süpüshuaʼa?
¿Kasa waaʼinraka süka alin wapüla na wayuukana?
¿Jamüsü naaʼin wanee wayuu nüküjale süchiki tü pütchi anasükat?
PÜNAʼLA SOOʼOMÜIN
Pünaja süchiki tü naaʼinrakat na wawalayuukana süpüla naküjain pütchi eere jouluin wayuu.
Aküjünüsü pütchi süka kareetachon eere jouluin wayuu chayaa París (5:11)
¿Kasa naaʼinraka na wawalayuukana süpüla naküjain pütchi namüin na wayuu aʼluwataakana noumainpaʼajee sutuma kasachiki?
Aküjünüsü pütchi namüin na wayuu aʼluwataakana noumainpaʼajee sutuma kasachiki (5:59)
Pünaja süchiki wanee misioneera anaka maʼin akuwaʼipa sünain aʼyatawaa waneepia nümüin Jehová.
Nnojotsü eein wanee aʼyatawaa eekai müin aka saaʼin tia (6:29)
Paashajeʼera süchiki waneirua kasa nountaka na wawalayuukana sutuma nakanajüin suluʼupünaa laülaapia.
a Nnojotsü choʼujaain namüin na Aküjaliikana pütchi saapünüin namüin wanee karaloʼuta natuma na sülaülashiikana mma süpüla naküjain pütchi, süka jamüin, nuluwataalain naya Maleiwa.