EKIRAJAAYA 35
Jülüjainjatka waaʼin waaʼinrajatpa wanee kasa
Watta saalii tü kasa waaʼinrajatkat soʼukaiwai. Maʼaka saaʼin jalainjanain kepiain waya, tü wepijaainjatkalü aaʼu jee kaʼwayuuseinjanale waya. Anale sukuwaʼipa tü waaʼinrajatkat, aneerü wakuwaʼipa jee müsia talateerü naaʼin Jehová watuma.
1. ¿Kasa paaʼinrajatka süpüla pansaain tü püneekakat sümaa tü sümakat tü Bibliakat?
Süpülapünaa paaʼinrüin wanee kasa, puchunta kaalinwaa nümüin Jehová. Pikirajaa sünain tü Bibliakat süpüla piyaawatüin saaʼu anale jee mojule wanee kasa (paashajeʼera Proverbios 2:3-6). Eesü piyaawatamaatüle saaʼu wanee kasa nuluwataakalü anain Jehová. Piyaawatamaatüle saaʼu, paaʼinramaatüinjatü shia.
¿Jama nnojorüle piyaawatüin saaʼu wanee kasa nuluwataakalü anain Jehová? Nüküjeerü shia pümüin, jama niain «chi oʼunirakai pia suluʼupünaa tü wopu anasükat» (Isaías 48:17). Sünainjee waneirua pütchi suluʼuka tü Bibliakat, piyaawateerü aaʼu anale jee mojule wane kasa. Pünteerü anain tia pikirajaapa sünain tü Bibliakat. Piyaawatapa saaʼu tü anakat noʼuluʼu Jehová, pütüjaajeerü aaʼu tü paaʼinrajatkat süpüla talatüin naaʼin pümaa.
2. ¿Kasa jülüjainjatka paaʼin paaʼinrajatpa wanee kasa?
«Chi wayuu eekai kekiin maʼin, jülüjasü naaʼin tü naaʼinrajatkat» müsü tü Bibliakat (Proverbios 14:15). Süpülapünaa waaʼinrüin wanee kasa, jülüjainjatü waaʼin tü anakat noʼuluʼu Jehová. Anasü püsakirüle paaʼin sünain tüü: «¿Jaratche tü pütchi suluʼukat tü Bibliakat tayaawateetka atuma tü anakat noʼuluʼu Jehová? ¿Jimateetche taaʼin sutuma tü taaʼinrajatkat? ¿Jameetche naaʼin na waneinnua sutuma? ¿Talateetche naaʼin Jehová sutuma tia?» (Deuteronomio 32:29).
Nia neʼe chi Maleiwakai aküjaka wamüin kasain anain jee kasain mojuin. Weʼraajüle tü nuluwataakalü anain, tü pütchi wayaawateetkalü anainjee tü anakat noʼuluʼu jee woonoole sümaa, aneerü waaʼin. Tü waaʼinkat shia aküjaka wamüin kasain anain jee kasain mojuin (Roma 2:14, 15). Anale maʼin tü waaʼinkat, aneerü maʼin sukuwaʼipa tü waaʼinrakat.
WEKIRAJAA SOOʼOMÜIN
Wekirajaa sünain piamasü kasa jülüjainjatka waaʼin süpülapünaa waaʼinrüin wanee kasa. Tüü shia tü pütchi wayaawateetkalü anainjee tü anakat noʼuluʼu Jehová jee müsia anale waaʼin sutuma.
3. Paaʼinra tü sümakat tü Bibliakat
Süpülapünaa paaʼinrüin wanee kasa, jülüjeesü paaʼin tü pütchi piyaawateetkalü anainjee tü anakat noʼuluʼu Jehová. Jünaja tü VIDEOKOT otta yooto jia süchiki tüü:
¿Kasa waneeküinjatka süka waaʼin wamüiwaʼa?
¿Jamüsü nuuʼulaaka Jehová waneeküin süka waaʼin wamüiwaʼa tü waaʼinrajatkat?
¿Kasa nükaalinjaka aka waya Jehová süpüla wayaawatüin saaʼu anale jee mojule wanee kasa?
Wekirajaa sünain wanee pütchi wayaawateetka anainjee anale noʼuluʼu Jehová wanee kasa. Jaashajeʼera Filipos 1:10, süchikijee, yooto jia süchiki tü kasa anasü jaaʼinrajatkat maʼaka saaʼin...
... jaashajeʼerüin tü Bibliakat soʼukaiwai.
... anainjatüin jukuwaʼipa sümüin juʼwayuuse, anainjatüin nepijia jüchonnii jee anainjatüin jukuwaʼipa namaa na kachooinkana jia.
... waneepiainjanain jia sünain tü outkajawaakat.
4. Ekirajaainjana waya süpüla wayaawatüin saaʼu anale tü waaʼinrajatkat
«Anuu tü paaʼinrajatkat» sümüle tü Bibliakat wamüin, wayaawatamaatüin tü waaʼinrajatkat. ¿Jama nnojorüle süküjain tü Bibliakat tü waaʼinrajatkat? Jünaja tü VIDEOKOT otta yooto jia süchiki tüü:
¿Kasa saaʼinraka tü wawalakat süpüla anainjatüin noʼuluʼu Jehová tü saaʼinrakat otta anainjatüin saaʼin sutuma tü süneekakat?
¿Jamüsü nnojotka anain wamüle nümüin wanee wayuu niainjachin aneeküin wooʼopünaa tü waaʼinrajatkat? Jaashajeʼera Hebreokana 5:14 otta yooto jia süchiki tüü:
Mayaainjeʼe eein süpüla wasakirüin na waneinnua sünain tü waaʼinrajatkat, ¿jamüshii wayainjanaka aneeküin süka waaʼin wamüiwaʼa tü waaʼinrajatkat?
¿Kasa wekirajaainjatka anain süpüla wayaawatüin saaʼu anale tü waaʼinrajatkat?
Sutuma wanee maapa, wayaawateerü aaʼu jalapünaainjanain waya, akaʼaya sutuma tü waaʼinkat, wayaawateerü aaʼu tü waaʼinrajatkat anale jee mojule shia.
5. Nnojo paaʼinrüin wanee kasa mojeetka atumaa naaʼin na waneinnua
Sutuma naatawalin wakuwaʼipa, naatawaisü tü waaʼinrakat. ¿Kasa waaʼinrajatka süpüla nnojoluin waaʼinrüin wanee kasa mojeetka atuma naaʼin na waneinnua otta süpüla nnojoluin mojuin waaʼin sutuma tü naaʼinrakat? Wekirajaa süchiki piamasü sukuwaʼipa.
Palajatka sukuwaʼipa: Eesü wanee wawala kamalainka amüin ashajawaa jee sükolojooka suluʼumüin wanee outkajaalee, shiasaʼa suluʼu tia outkajaaleekat, mojusü namüin na wawalayuukana ashajawaa.
Jaashajeʼera Roma 15:1, 2 otta 1 Corinto 10:23, 24 otta yooto jia süchiki tüü:
Sünainjee tü sümakat tü kojuyasükat wetsiikulo, ¿kasache eeka süpüla saaʼinrüin tia wawalakat? ¿Kasache eeka süpüla paaʼinrüin mojule namüin na wawalayuukana wanee kasa anaka pümüin?
Chiiruaajatka sukuwaʼipa: Eetaashi wanee wawala ayaawatakai saaʼu nnojoluin mojuin asaa yootchon asüüshi. Niʼitaaka suluʼu naaʼin nnojolinjachin nüsüin. Nuunejaanaka sünain wanee ekawaa jee niʼraka waneinnua wawalayuu sünain asaa.
Jaashajeʼera Eclesiastés 7:16 otta Roma 14:10 otta yooto jia süchiki tüü:
Sünainjee tü sümakat tia piamasükat wetsiikulo, ¿kasaje naaʼinraka chi wawalakai? ¿Kasaje paaʼinraka piʼrüle wanee wawala aaʼinrakai wanee kasa mojuka saaʼin pümüin?
Tü paaʼinrajatkat süpüla püneeküin tü anakat noʼuluʼu Jehová
1. Puchunta nümüin Jehová süpüla pütüjaain saaʼu tü paaʼinrajatkat (Santiago 1:5).
2. Pikirajaa sünain tü Bibliakat jee sünain waneirua karaloʼuta ashajünaka suluʼujee süpüla pütüjaain saaʼu anale shia noʼuluʼu Jehová. Eesia süpüla paashajaain namaa na wawalayuu laülaakana aaʼin sünain anoujaa.
3. Jülüja paaʼin jameerüin paaʼin sutuma tü paaʼinrakat jee müsia naaʼin na waneinnua.
EESHII WAYUU EEKAI NAMÜIN: «Paaʼinra tü paaʼinreekat, jamajatkai shia sümüin wayuu».
¿Jamüsü anaka jülüjale waaʼin jameerüin naaʼin Maleiwa jee müsia naaʼin na waneinnua sutuma tü waaʼinrajatkat?
WATÜJAAITPAKA AAʼU
Süpüla wayaawatüin saaʼu anale noʼuluʼu Jehová tü waaʼinrajatkat, ekirajaainjana waya palajana süchiki jameerüin naaʼin sutuma otta jameerüin naaʼin na waneinnua.
Pusouta shiʼipajee
¿Kasa paaʼinrajatka süpüla talatüin naaʼin Jehová pümaa?
¿Kasa paaʼinrajatka süpüla anain paaʼin sutuma tü püneekakat?
¿Kasa paaʼinrajatka süpüla nnojoluinjatüin mojuin naaʼin na waneinnua putuma?
PÜNAʼLA SOOʼOMÜIN
¿Kasa paaʼinrajatka süpüla aleewain maʼin pia nümaa Jehová?
«Kojuta watuma Maleiwa sükajee tü waaʼinrakat» (Aapiria Wayuu, aaʼuriiroʼu 15, 2011)
Pünaja süchiki tü naaʼinrakat Jehová süpüla nüchiaain waya.
Pünaja nüchiki wanee wayuu ooʼulaakai suulia ashaitaa futbol süpüla niʼyataainjachin nümüin Maleiwa.
Pikirajaa sünain tü paaʼinrajatkat süpüla talatüin naaʼin Jehová putuma jaʼitairü nnojoluin süshajünüin suluʼu tü Bibliakat.