¿Anasüche nümüin Maleiwa süpüshuaʼa tü miʼiraakat?

Anasü nümüin Jehová talatüle waaʼin jee woutkajaʼawaire süpüla ekawaa jee emiʼijawaa. ¿Anasüche nümüin Maleiwa süpüshuaʼa tü miʼiraakat jee tü saainjakat wayuu shikiira wanee kasa? ¿Kasa waaʼinrajatka süpüla weeʼiyatüin naalin wapüla jee süpüla nütüjaain saaʼu keeʼireein waaʼin talatüin nia watuma?

1. ¿Jamüsü nnojotka anain nümüin Jehová waneirua miʼiraa?

Eesü miʼiraa sünainpünaaka tü kasa naaʼinrapuʼukat na manoujainsaliikana jee nnojotsü pansaain shia sümaa tü sümakat tü Bibliakat. Miʼiraakat tiairua, sünainpünaasü tü aaʼinnakat suluʼu tü iküleesia ekirajakalü alawaa. Eesü sünainpünaale shia tü naaʼinrakat na outshiikana jee tü alawaa aküjünakat sujuʼitüin naaʼin wanee wayuu outapa nia. Eeshii na aainjirakana miʼiraa jee ekawaa shikiira wanee kasa süpüla anainjatüin nakuwaʼipa jee suulia jamajüin naya atumawaa (Isaías 65:11). Nüküjain Jehová namüin na aʼyataashiikana nümüin nooʼulaainjanain suulia aaʼinraa tü kasa mojusü yarüttakalü atuma naaʼin (2 Corinto 6:17, 18).a

2. ¿Jamüsü naaʼin Jehová sutuma tü miʼiraa aainjünakat süpüla kojutuin atumawaa wanee wayuu?

Nüküjain wamüin Jehová nnojoluinjatüin weʼitaain waaʼin nünain wanee wayuu süka wayuuin neʼe nia (paashajeʼera Jeremías 17:5). Eesü waneirua miʼiraa aaʼinnaka süpüla kojutuin atumawaa na sülaülashiikana mma jee waneinnua wayuu. Eesü saainjünüle miʼiraa shikiira sükatalaain wanee mma suulia wane mma, kojutuin atumawaa tü banderakat otta himno nacional (1 Juan 5:21). Eetaasü joo tü miʼiraa naainjakat na poliitikokana jee na wayuukana süpüla wanaawainjatüin saaʼin wayuu sümaa tü namakat. Kojutule maʼin atumawaa wanee wayuu jee wanee organización nnojotka wanaawain aaʼin sümaa tü keeʼireekat naaʼin Maleiwa, ¿jamüsü naaʼin sutuma tia?

3. ¿Kasa niyoutaka anainjee Maleiwa wanee miʼiraa?

Nnojo «jiperüin sümaa maaʼin jaaʼin sünain emiʼijaa» müsü tü Bibliakat (1 Pedro 4:3). Wainma na wayuu maaʼinkana aaʼin jee maapülinkana sünain waneirua miʼiraa. Ayateere aleewain waya nümaa Jehová, wayoutuinjatü tü kasa yarütteetka atuma wakuwaʼipa.

WEKIRAJAA SOOʼOMÜIN

4. Piyouta tü miʼiraa mojukat noʼuluʼu Jehová

Paashajeʼera Éfeso 5:10 otta yooto jia süchiki tüü:

• ¿Kasa waaʼinrajatka süpüla wayaawatüin saaʼu anale süpüla waaʼinrüin wanee miʼiraa?

• ¿Kasa miʼiraa aaʼinnaka eere kepiain pia?

• ¿Anasüche noʼuluʼu Jehová tia miʼiraakat?

¿Anasüche noʼuluʼu Maleiwa waaʼinrüle miʼiraa shikiira ekeraajaa ouyasee? Nnojotsü ashajünüin suluʼu tü Bibliakat süchiki naaʼinrüin miʼiraa shikiira ekeraajaa ouyasee na wayuu aʼwaajakana nia. Shia ashajünaka neʼe süchiki piamasü miʼiraa aaʼinnaka shikiira ouyasee natuma na wayuu nnojoliikana aʼwaajüin Maleiwa. Jaashajeʼera Génesis 40:20-22 otta Mateo 14:6-10. Süchikijee, yooto jia süchiki tüü:

• ¿Kasa alataka sünain tia piamasükat miʼiraa?

• Sünainjee tü paashajeʼerüitpakat, ¿anasüche noʼuluʼu Jehová waaʼinrüle miʼiraa shikiira ekeraajaa ouyasee?

Mayaainjeʼe piyaawatüitpain saaʼu tia, eesü jülüjale paaʼin tüü: «¿Mojusüche maʼin nümüin Jehová taaʼinrüle miʼiraa shikiira ekeraajaa ouyasee jee toʼunule sünain wanee miʼiraa nnojotka pansaain sümaa tü sümakat tü Bibliakat?». Jaashajeʼera Éxodo 32:1-8. Süchikijee, jünaja tü VIDEOKOT otta yooto jia süchiki tüü:

VIDEO: Miʼiraa nnojotka anain noʼuluʼu Maleiwa (5:07)

• ¿Jamüsü wayaawatüinjatka saaʼu tü anakat noʼuluʼu Jehová?

• ¿Kasa waaʼinrajatka süpüla wayaawatüin saaʼu tü anakat noʼuluʼu Jehová?

¿Kasa wayaawateetka aaʼujee anale wanee miʼiraa noʼuluʼu Maleiwa?

• ¿Pansaasüche shia sümaa tü sümakat tü Bibliakat? Süpüla watüjaain saaʼu, ekirajaainjana waya süchiki jaralüin aaʼinrapuʼuin shia jee kasapülajatüin shia.

• ¿Niache alanaʼaleeka ojutu atumawaa wanee wayuu, wanee organización, tü banderakat sümaa himno nacional? Nia kojutuleeka maʼin wamüin Jehová suulialeʼeya wanee kasa. Weʼitaain waaʼin sünain nunouteʼereerüin tü kasa mojusü alatakat saaʼu tü mmakat.

• ¿Pansaasüche sümaa tü sümakat tü Bibliakat tü aaʼinnakat sünain tia miʼiraakat? Choʼujaasü wuleinjatüin wakuwaʼipa waneepia noʼuluʼu Maleiwa.

5. Pükaalinja na waneinnua süpüla kojutuin namüin tü punoujakalü anain

VIDEO: Püküja süchiki tü punoujakalü anain sümaa kojutuin wayuu pümüin (2:01)

Jaashajeʼera Mateo 7:12 otta yooto jia süchiki tüü:

• «Nnojo sünainpünaain pia tia miʼiraakat, mojusü tia» ¿müinjanache waya nümüin wanee wapüshi saashin tia wetsiikulokot?

• Mayaainjeʼe nnojoluin sünainpünaain pia wanee miʼiraa namaa na püpüshikana, ¿kasa paaʼinrajatka süpüla piiʼiyatüin nojutu pümüin sümaa alin naya püpüla?

6. Keeʼireesü naaʼin Jehová talatüinjanain waya

Anasü nümüin Jehová jutkatiraale waya namaa wapüshi jee waʼaleewainyuu. Jaashajeʼera Eclesiastés 8:15 otta yooto jia süchiki tüü:

• ¿Jamüsü watüjaaka saaʼu keeʼireein naaʼin Jehová talatüinjanain waya saashin tia wetsiikulokot?

Nücheka achikit Jehová jutkatiraain waya namaa na waneinnua. Jünaja tü VIDEOKOT süpüla jütüjaain saaʼu tü naaʼinrakat na wawalayuukana napüleerua na antakana wattajee.

VIDEO: Kamaneeshii na wawalayuukana namüin na antakana wattajee sünain tü outkajawaakat miyoʼu (5:40)

Jaashajeʼera Galacia 6:10 otta yooto jia süchiki tüü:

• ¿Choʼujaasüche waaʼinrüin wanee miʼiraa süpüla weeʼiyatüin wamanee namüin na waneinnua?

• ¿Kasa talataka atuma paaʼin?, ¿püsülajüle süka sümajuushin pümüin shiataapa süka püsülajüin süka paaʼin?

• Wainma na wawalayuu aaʼinrakana kasa napüleerua nachonnii süpüla nasülajüin kasa namüin. Kachonle pia, ¿kasa eeka süpüla paaʼinrüin napüleerua?

WATÜJAAITPAKA AAʼU

Keeʼireesü naaʼin Jehová woutkajaain namaa wapüshi jee waʼaleewainyuu. Nnojotpejeʼe anain nümüin sünainpünaain waya miʼiraa mojuka noʼuluʼu.

Pusouta shiʼipajee

• ¿Kasa jülüjainjatka waaʼin süpüla watüjaain saaʼu anale wanee miʼiraa noʼuluʼu Jehová?

• ¿Kasa waaʼinrajatka süpüla nayaawatüin saaʼu wapüshi jee waʼaleewainyuu jamüin nnojoliika sünainpünaain waya wanee miʼiraa?

• ¿Jamüsü watüjaaka saaʼu keeʼireein naaʼin Jehová talatüinjanain waya jee woutkajaainjanain namaa na waneinnua?

PÜNAʼLA SOOʼOMÜIN

Paashajeʼera süchiki waneirua miʼiraa nnojotka naaʼinrüin na anoujashiikana.

«¿Jamüshii nnojoliika sünainpünaain waneirua miʼiraa na Aküjaliikana pütchi?» (Pütchi suluʼuka jw.org)

Anuu süchiki pienchisü kasa wayaawateetka aaʼujee mojuin nümüin Maleiwa waaʼinrüle miʼiraa shikiira ekeraajaa ouyasee.

«¿Jamüshii nnojoliika naaʼinrüin miʼiraa shikiira ekeraajaa ouyasee na Aküjaliikana pütchi?» (Pütchi suluʼuka jw.org)

Anuu nachiki waneinnua tepichi aikana apüla Jehová. Nayoutuin wanee miʼiraa süka mojuin shia nümüin.

Kojutushi pia noʼuluʼu Jehová (11:35)

Wainma na wawalayuu nnojoliikana sünainpünaain tü miʼiraa aainjünakat tisienpüroʼu, ¿talatüsüche naaʼin sutuma nnojoluin naaʼinrüin tia?

«Nanta anainrü wanee kasa anaʼleesia maʼin» (Aapiria Wayuu, tisienpüroʼu 1, 2012)