EKIRAJAAYA 45
Nnojo sünainpünaain waya poliitika jee atkawaa
Nüküjain Jesús namüin na nikirajüinkana nnojoliinjanain wanaawain naya namaa na manoujainsaliikana (Juan 15:19). Nnojoliinjana waya sünainpünaain poliitika jee atkawaa. Kapüleejeetpejeʼe wamüin waaʼinrüin tia otta meeʼerapaleena waya sünainjee. ¿Kasa waaʼinrajatka süpüla nnojoliinjanain waya sünainpünaain poliitika jee süpüla woonooinjanain waneepia sümaa nünüiki Jehová?
1. ¿Kojutuinjanache wamüin na sülaülashiikana mma?
Wayakana anoujashiikana, kojutushii wamüin na sülaülashiikana mma. «Anakaja müleka jaaʼinrüle tü nuluwataakat anain César» müshi Jesús. Shiaʼaya waaʼinraka tü nümakat Jesús, oonooshii waya sümaa tü naluwataakalü anain waya na sülaülakana mma. Nachekajüle wamüin wanee kasa wawalaajüin shia (Marcos 12:17). Süküjain tü Bibliakat nuuʼulaain Jehová naluwataain na sülaülashiikana mma (Roma 13:1). Nnojoliipejeʼe nayain alanaʼaleein ojutu wamüin nuulialeʼeya Maleiwa. Watüjaa aaʼu nunouteʼereerüin Jehová sukuwaʼipa tü kasa mojusü alatakat sümüin wayuu.
2. ¿Kasa waaʼinrajatka süpüla nnojoliinjanain sünainpünaain waya poliitika jee atkawaa?
Nnojoishii waya sünainpünaain poliitika maʼaka nnojoluin naaʼinrüin shia Jesús. Wanaa sümaa neʼrüin na wayuukana naaʼinrüin Jesús kasa pülasü, neʼitaweein nia süpüla nuluwataain saaʼu tü Mmakat. Oʼunapajeʼe Jesús noulia (Juan 6:15). ¿Jamüshi nuʼunaka noulia? «Waneʼeya sümüin sukuaippa tü taluwataayakat, nnojotsü müin aka nakuaippa na sülaülashiikana mma» müshi Jesús mapa (Juan 18:36). Wayakana anoujashiikana, nnojoishii waya oʼunuin sünain atkawaa süpüla woʼutuin naaʼin na waneinnua (paashajeʼera Miqueas 4:3). Mayaainjeʼe kojutuin wamüin tü banderakat, nnojoishii waya sünainpünaain tü kasa aaʼinnakat sümüin. Sünainpünaale waya, waʼwaajüin shia nuulialeʼeya Maleiwa (1 Juan 5:21). «Anashi chira wayuukai süpüla nuluwataain waaʼu» nnojoishii müin waya nüchiki wanee wayuu süka niain neʼe chi Maleiwakai anaka süpüla aluwatawaa waaʼu.
WEKIRAJAA SOOʼOMÜIN
Wekirajaa süchiki waneirua kasa ooʼulakeetka waaʼin süpüla sünainpünaain waya poliitika jee atkawaa. Otta wekirajaa süchiki tü paaʼinrajatkat süpüla talatüin naaʼin Jehová putuma.
3. Wayakana anoujashiikana, nnojoishii waya sünainpünaain poliitika jee atkawaa
Müsü wakuwaʼipa maʼaka saaʼin nukuwaʼipa Jesús otta na nikirajüinkana. Jaashajeʼera Roma 13:1, 5-7 otta 1 Pedro 2:13, 14. Süchikijee, jünaja tü VIDEOKOT otta yooto jia süchiki tüü:
¿Jamüshii kojutuinjanaka wamüin na sülaülashiikana mma?
Püküja süchiki waneirua kasa waaʼinrajatka woonoole sümaa nanüiki na sülaülashiikana mma.
Jamüsüjaʼa peʼipaajiraale piamasü mma jee namataale na kepiakana pejepünaa sünain: «Nnojoishii waya sünainpünaain tia atkawaakat». Aluwataapejeʼe naya nneerü otta katkousü namüin na atkaajiraakana. ¿Shiimainchejeʼe nnojoluin naya sünainpünaain tia atkawaakat sutuma naaʼinrüin tia? Jaashajeʼera Juan 17:16. Süchikijee, jünaja tü VIDEOKOT otta yooto jia süchiki tüü:
¿Kasa naaʼinraka wanee wayuu nnojoire nia sünainpünaain atkawaa?
¿Kaseerü paaʼinraka naluwataale pia na sülaülashiikana mma sünain aaʼinraa wanee kasa mojuka noʼuluʼu Maleiwa? Jaashajeʼera Aluwataaushikana [Hechos] 5:28, 29. Süchikijee, jünaja tü VIDEOKOT otta yooto jia süchiki tüü:
Naluwataale waya na sülaülashiikana mma sünain aaʼinraa wanee kasa mojuka nümüin Maleiwa, ¿jarai chi woonooinjachikai amaa anüiki?
Püküja süchiki wanee kasa naluwataaka anain na sülaülashiikana mma nnojotka woonooinjatüin amaa.
4. Nnojo sünainpünaain pia poliitika jee atkawaa sükajee tü jülüjakat paaʼin jee tü paaʼinrakat
Jaashajeʼera 1 Juan 5:21. Süchikijee, jünaja tü VIDEOKOT otta yooto jia süchiki tüü:
¿Jamüshi nnojoika sünainpünaain poliitika Ayenge jee nnojoika sünainpünaain nia saludo a la bandera?
¿Anasüche tü naaʼinrakat?
Püküja süchiki waneirua kasa sünainpünaajeenaka atuma waya poliitika. Jünaja tü VIDEOKOT otta yooto jia süchiki tüü:
«Kasataalejeseʼe nayain akanajüin» ¿jamüsü nnojoluinjatka müin waaʼin wanajüle na ashaitüliikana fútbol?
¿Kasa waaʼinrajatka süpüla nnojoliinjanain waya sünainpünaain poliitika mayaainjeʼe eein süpüla anain jee mojuin wakuwaʼipa sünainjee tü naaʼinrakat wanee poliitiko?
¿Jamüshii sünainpünaajeenaka waya poliitika jülüjale maʼin waaʼin tü weʼrakat suluʼu noticia jee tü namakat na waneinnua?
Atüjaana aaʼuchii waya nnojoliin sünainpünaain poliitika sükajee tü kasa jülüjakat waaʼin otta tü waaʼinrakat.
EESHII WAYUU EEKAI NASAKIRÜIN: «¿Jamüshi nnojoika pia sünainpünaain saludo a la bandera? ¿Jamüshi nnojoika piiʼirajüin himno nacional?».
¿Jameerü pünüiki namüin?
WATÜJAAITPAKA AAʼU
Wayakana anoujashiikana, nnojoishii waya sünainpünaain poliitika jee atkawaa. Atüjaana aaʼu tia sükajee tü waaʼinrakat, tü jülüjakat waaʼin otta tü waashajaakalü achiki.
Pusouta shiʼipajee
¿Kasa waaʼinrajatka naluwataale waya na sülaülashiikana mma?
¿Jamüshii nnojoliika sünainpünaain waya poliitika?
Püküja süchiki waneirua kasa sünainpünaajeenaka atuma waya poliitika.
PÜNAʼLA SOOʼOMÜIN
¿Kasa wayoutaka süpüla nnojoliinjanain sünainpünaain waya poliitika?
¿Kasa naaʼinrajatka na wayuu kachonshiikana süpüla nnojoliinjanain sünainpünaain nachonnii saludo a la bandera otta eeʼirajaa himno nacional?
Nnojo sünainpünaain waya aʼwaajaa bandera otta eeʼirajaa himno nacional (4:25)
¿Anasüche watkaale süchiirua kojutuinjatüin atumawaa tü woumainkat?
«Tü kasa isakat süchiki wayuu, nnojotsü kapüleein nümüin Maleiwa» (5:19)
¿Kasa waaʼinrajatka süpüla nnojoliinjanain sünainpünaain waya poliitika jee atkawaa waneekajatpa wanee aʼyatawaa?
«Asoutena waya nümüin Maleiwa saaʼu tü waaʼinrakat» (Aapiria Wayuu, maatsoʼu 15, 2006)