EKIRAJAAYA 46
Paapa paaʼin nümüin Maleiwa jee woutiisaa pia
Naapapa naaʼin wanee wayuu nümüin Jehová, nüküjain nümüin niainjachin neʼe nuʼwaajaka nümüiwaʼa otta nüküjain nümüin naaʼinrüinjatüin tü nüchekakat nüpüleerua (Salmo 40:8). Süchikijee tia, woutiisashi nia süpüla sütüjaanüin aaʼu naapüitpain naaʼin nümüin Maleiwa. Nnojotsü eein wanee kasa anaʼleeka maʼin suulia aapaa aaʼin nümüin Maleiwa. Aʼwanajaasü wakuwaʼipa sutuma. ¿Kasa paapeetka anainjee paaʼin nümüin Jehová jee woutiiseechika anainjee pia?
1. ¿Kasa waapüinjatka anainjee waaʼin nümüin Jehová?
Waapüin waaʼin nümüin Jehová sünainjee alin nia wapüla (1 Juan 4:10, 19). «Alinjachi püpüla Jehová chi Pümaleiwasekai, alinjachi nia püpüla süka süpüshuaʼa paaʼin, jaʼyainjatü tia paaʼu otta jülüjainjachi nia paaʼin waneepia» müsü tü Bibliakat (Marcos 12:30, TNM). Atüjaaneechi aaʼu alin Jehová wapüla sükajee tü wamakat jee tü waaʼinrakat. Tia müsü aka saaʼin nukuwaʼipa wanee wayuu sümaa nümüraajüin. Kasaaleechi nia sümaa aire maʼin nüpüla shia. Akaʼaya aire wapüla Jehová, waapeerü waaʼin nümüin jee woutiiseena waya.
2. ¿Kasa anasü neʼreetka nutuma Jehová na wayuu woutiisakana?
Meechi aka naaʼin püshi Jehová pümüin woutiisale pia. Piyaawateerü aaʼu paalin nüpüla jee aleeweechi maʼin pia nümaa (paashajeʼera Malaquías 3:16-18). Akaʼaya napüshuaʼa na anoujashiikana, puwalayuujeena naya süka alin Maleiwa napüla jee alin pia napülaya (paashajeʼera Marcos 10:29, 30). Eesü waneirua kasa paaʼinrajatka süpülapünaa woutiisain pia. Piʼraajüinjatü nukuwaʼipa Jehová, alinjachi nia püpüla otta piʼitaainjatü paaʼin nünain chi Nüchonkai. Süchikijee tia, paapüinjatü pünüiki nümüin Jehová jee woutiisainjachi pia süpüla piʼyataain nümüin süpüla kaʼikat süpüshuaʼa. Paaʼinrüle tia, eesü süpüla katüin poʼu waneepia. «Eeshiijaʼa süpüla juʼttaain sükajee woutiisain jia» müsü tü Bibliakat (1 Pedro 3:21, TNM).
WEKIRAJAA SOOʼOMÜIN
Wekirajaa sünain jamüin paapüinjatka paaʼin nümüin Jehová jee woutiisainjachika pia.
3. Waneeküinjatü jaralinjachin waʼyataain amüin
Soʼu nakalia na israelitakana, eeshii na wayuu anakana amüin naʼwaajüin Jehová sümaa naʼwaajüin Baal. Nnojotpejeʼe anain tia naaʼinrakat. Müshijeseʼe nuluwataanüin Elías nutuma Jehová süpüla nüchiaain naya suulia aaʼinraa tia. Jaashajeʼera 1 Reyes 18:21 otta yooto jia süchiki tüü:
¿Kasa tü naneeküinjatkat na israelitakana naashin Jehová?
Naneeküinjatü na israelitakana jaralinjachin naʼyataain amüin. Müshiʼiya wayakana, waneeküinjatü jaralinjachin waʼyataain amüin. Jaashajeʼera Lucas 16:13 otta yooto jia süchiki tüü:
¿Jamüsü nnojotka sülanaʼaleeinjatüin sujutu wamüin wanee kasa nuulialeʼeya Jehová?
¿Kasa waaʼinrajatka süpüla nütüjaain saaʼu Jehová niain waneeküin süpüla waʼyataain nümüin?
4. Jülüja paaʼin tü naaʼinrakat Jehová püpüleerua
Wainma maʼin tü kasa anasü naapakat Jehová wamüin. ¿Kasakaʼa eein süpüla waapüin nümüin? Jünaja tü VIDEOKOT.
Sünainjee tü kasa naaʼinrakat Jehová püpüleerua, ¿jamüsü pütüjaaka saaʼu alin pia nüpüla? Jaashajeʼera Salmo 104:14, 15 jee 1 Juan 4:9, 10 otta yooto jia süchiki tüü:
Wainma maʼin tü kasa anasü naapakat Jehová wamüin, ¿jarat tü kojutukat maʼin pümüin?
Sünainjee tü kasa naaʼinrakat Maleiwa püpüleerua, ¿jeʼtsüinjatü naalin püpüla?
Süsülajünüle wamüin wanee kasa talataka amaa waaʼin, wachajaain sukuwaʼipa süpüla weeʼiyatüin sujutu nümüin chi asülajakai shia wamüin. Jaashajeʼera Deuteronomio 16:17 otta yooto jia süchiki tüü:
¿Kasa paapeetka nümüin Jehová saaʼujee tü kasa naaʼinrakat püpüleerua?
5. Wainmeerü kasa piʼraka piʼyataale nümüin Jehová
Wainma na wayuu talateenakana aaʼin naashin neʼnnaajünüle maʼin, nekirajaale suluʼu eʼikülee miyoʼu jee wainmale maʼin nneerü namaʼana. ¿Shiimainchejeʼe tia? Jünaja tü VIDEOKOT otta yooto jia süchiki tüü:
Mayaainjeʼe kamalain maʼin ashaitaa fútbol nümüin chi wayuu weʼrakai suluʼu tü videokot, ¿jamüshi nuuʼulaaka suulia?
Shia nüneekaka niʼyataainjachin nümüin Jehová suulia ashaitaa fútbol. ¿Anasüche tü naaʼinrakat? ¿Jamüsü anakaʼa shia?
Wainma maʼin tü kasa nuuntakat Pablo süpülapünaa nunoujain nünain Cristo. Jamüshijaʼa nia, ekirajaashi sünain nakuwaʼipa na judíokana nümaa wanee wayuu eʼnnaajünakai maʼin. Nuuʼulaapejeʼe süpüshuaʼa tia süka niʼyataainjachin nümüin Maleiwa. ¿Mojusüche naaʼin süchiirua tü kasa nuuʼulaakat? Jaashajeʼera Filipos 3:8 otta yooto jia süchiki tüü:
«Müitpa aka saaʼin wane shiʼyarüla mma tamüin», ¿jamüshi nümaka Pablo sümüin süpüshuaʼa tü kasa nuuʼulaakat süpüla nunoujain?
¿Kasa anasü niʼraka sünainjee müin nukuwaʼipa?
¿Aneetche pukuwaʼipa piʼyataale nümüin Jehová suulia kachiiruain paaʼin wainma kasa?
Alanaʼaleesia maʼin tü kasa naapaakat Jehová nümüin Pablo suulia tü kasa nuuʼulaakat.
EESHII WAYUU EEKAI NAMÜIN: «Tatüjaa aaʼu shiimain tü wekirajaakalü anain, nnojoipejeʼe taya kettaain süpüla woutiisaa».
¿Anasüche saaʼin pümüin woutiisale pia süpüla piʼyataain nümüin Jehová? ¿Jamüsü anaka tia?
WATÜJAAITPAKA AAʼU
Waapüin waaʼin nümüin Jehová jee woutiisashii waya süka alin nia wapüla.
Pusouta shiʼipajee
¿Jamüshi alinjachika wapüla Jehová süka süpüshuaʼa waaʼin jee niainjachika neʼe wawaajüin?
¿Kasa anasü neʼreetka nutuma Jehová na wayuu woutiisakana?
¿Paapeein paaʼin nümüin Jehová sümaa woutiiseein pia?
PÜNAʼLA SOOʼOMÜIN
Pünaja süchiki jamüin saapaka saaʼin nümüin Jehová wanee wayuu eeʼirajüt jee nüchiki wanee wayuu ashaitüi woola.
Paashajeʼera sooʼomüin süchiki jamüin waapüinjatka waaʼin nümüin Jehová.
«¿Jamüsü waapüinjatka waaʼin nümüin Jehová?» (Aapiria Wayuu, eneeroʼu 15, 2010)
Talatüsü naaʼin na wayuu aapakana naaʼin nümüin Jehová. Anuu süchiki tia suluʼu tü video jayeechimaajatkat.
Sünain tü pütchikat «Kakaliairü tatüjaweein aaʼu kasapülajanain eeka waya» paashajeʼera süchiki wanee wayuu ayaawataka saaʼu kasain anaʼleein maʼin süpüla saaʼinrüin.
«Sunouteʼerüin nakuwaʼipa tü Bibliakat» (Aapiria Wayuu, nowienpüroʼu 1, 2012)