EKIRAJAAYA 47
¿Kettaashiche pia süpüla woutiisaa?
Piʼraajüitpa nukuwaʼipa Jehová sünainjee pikirajaain sünain tü Bibliakat. Eesüjaʼa paaʼinrüitpale tü pikirajaakalü anain. Mayaainjeʼe müin shia, eesü eere tü kasa ataʼülakat pukuwaʼipa suulia paapüin paaʼin nümüin Jehová jee woutiisain pia. Sünain ekirajaayakat tüü, wekirajaweerü anain tü naaʼinrakat waneinnua wawalayuu alatakana süchikumüin tü kasa ataʼülakat nakuwaʼipa suulia woutiisain naya otta wekirajaweerü anain tü paaʼinrajatkat süpüla puuntuin woutiisain pia.
1. ¿Pütüjaainjatche aaʼu süpüshuaʼa tü sümakat tü Bibliakat süpüla woutiisain pia?
Süpüla woutiisain pia, pütüjaainjatü aaʼu tü shiimainkat (1 Timoteo 2:4). Nnojotsü choʼujaain pütüjaain saaʼu süpüshuaʼa tü sümakat tü Bibliakat. Jaʼitakajaʼa wayakana anoujashiikana, nnojotsü watüjaain saaʼu süpüshuaʼa tü sümakat tü Bibliakat, makalaka ayatüinjanain waya ekirajaain (Colosas 1:9, 10). Süpülapünaa woutiisain pia, piyaawatüinjatü saaʼu tü pikirajaaitpakalü anain palajana suluʼujee tü Bibliakat. Pütüjaweere saaʼu kettaale pia süpüla woutiisaa, paashajaa namaa na laülaashiikana suluʼu tü outkajaaleekat süpüla nakaalinjain pia.
2. ¿Kasa paaʼinrajatka süpülapünaa woutiisain pia?
«Jiyaawajaa jümata suulia jaainjala otta juuyantaa jümata nünainmüin Maleiwakai» müsü tü Bibliakat (paashajeʼera Aluwataaushikana [Hechos] 3:19). Shia paaʼinrajatka tia süpülapünaa woutiisain pia. Piyaawajaale suulia paainjala, mojusü maʼin paaʼin sutuma tü kasa mojusü paaʼinrapuʼukat jee puchuntuin nümüin Jehová nülatirüin puulia paainjala. Piyoutamaatüinjatü tü kasa nnojotkalü anain noʼuluʼu Maleiwa jee paaʼinrajatü tü anakat nümüin. Outkajaʼawalinjachi pia jee aküjainjachi pia pütchi namaa na wawalayuukana.
3. ¿Jamüsü nnojoluinjatka jülüjain paaʼin iseerüin püchiki woutiisain pia?
Eeshii na makana iseerüin nachiki nekeraajüin nanüiki nümüin Jehová. Süka waleʼeruʼuin tü kaainjalaakat, eejeerü kasa nnojotka anain watuma. Alatüsü tia namüin waneinnua wayuu anoujashii saashajaakana achiki tü Bibliakat. Soto paaʼin nütüjaain saaʼu Jehová waleʼeruʼuin tü kaainjalaakat (paashajeʼera Salmo 103:13, 14). Talateechi nia pümaa püchajaale sukuwaʼipa süpüla paaʼinrüin tü nüchekakat püpüleerua. Jülüja paaʼin nükaalinjeechin pia Jehová. Nüküjainjeseʼe wamüin «nnojolüin kasain asütajatüin joo waalii nüpüla» (paashajeʼera Roma 8:38, 39).
WEKIRAJAA SOOʼOMÜIN
Wekirajaa süchiki piamasü kasa paaʼinrajatka süpüla puuntuin woutiisain pia: piʼraajüinjatü maʼin nukuwaʼipa Jehová jee paapaainjatü sümaa tü nümakat pümüin.
4. Piʼraajüinjatü maʼin nukuwaʼipa Jehová
¿Jamüsü piʼraajüinjatka maʼin nukuwaʼipa Jehová süpülapünaa woutiisain pia? Choʼujaasü piʼraajüin maʼin nukuwaʼipa Jehová süpüla alin nia püpüla jee paaʼinrüin tü nuluwataakalü anain pia. Jünaja tü VIDEOKOT süpüla jütüjaain saaʼu müin nakuwaʼipa waneinnua ekirajaalii sünain tü Bibliakat. Süchikijee, yooto jia süchiki tüü:
Sünainjee tü piʼrakat suluʼu tü videokot, ¿kasa naaʼinraka na ekirajaashiikana sünain tü Bibliakat süpüla woutiisain naya?
Jaashajeʼera Roma 12:2 otta yooto jia süchiki tüü:
¿Wainmajüsüche paaʼin saaʼu tü pikirajaakalü anain suluʼu tü Bibliakat? ¿Nekirajüinche tü shiimainkat nüchiki Jehová na aküjaliikana pütchi nüchiki Jehová?
Wainmajüle paaʼin saaʼu tia, ¿kasa eeka süpüla paaʼinrüin?
5. Pülata süchikumüin tü kasa ataʼülakat pukuwaʼipa
Wainma tü kasa alatakat wamüin sünainjee waapüin waaʼin nümüin Jehová jee woutiisain waya. Anuu tü alatakat sümüin wanee wayuu. Jünaja tü VIDEOKOT. Süchikijee, yooto jia süchiki tüü:
¿Kasa suuʼulaaka Narangerel süpüla shiʼyataainjatüin nümüin Jehová?
¿Kasa saaʼinraka tü wawalakat süka alin Jehová süpüla?
Jaashajeʼera Proverbios 29:25 jee 2 Timoteo 1:7 otta yooto jia süchiki tüü:
¿Kasa yalayalaka atuma waaʼin süpüla walatüin süchikumüin wanee kasa?
6. Piʼitaa paaʼin sünain nükaalinjeechin pia Jehová
Nükaalinjeechi pia Jehová süpüla paaʼinrüin tü nüchekakat püpüleerua. Jünaja tü VIDEOKOT otta yooto jia süchiki tüü:
¿Jamüshi nnojoika woutiiseein chi wayuu weʼrakai suluʼu tü videokot?
¿Kasa akatchinraka naaʼin süpüla niʼitaainjatüin naaʼin nünain Jehová?
Jaashajeʼera Isaías 41:10, 13 otta yooto jia süchiki tüü:
¿Jamüsü pütüjaaka saaʼu pikeraajeerüin tü pümakat nümüin Jehová?
7. Kojuta pümüin alin pia nüpüla Jehová
Jülüjale paaʼin alin pia nüpüla Jehová, kojuteerü tia pümüin jee aʼyataweejeerü paaʼin nümüin. Jaashajeʼera Salmo 40:5 otta yooto jia süchiki tüü:
¿Kasa kojutuka maʼin pümüin sünainjee tü kasa anasü naapakat Jehová pümüin?
Aishi Jehová nüpüla Jeremías, chi nünüikimaajachikai otta kojutusü nümüin tü nünüikikat. Alanaʼaleesia sujutu nümüin aʼyatawaa nümüin Maleiwa. «Talatüsü maʼin taaʼin sutuma tü pünüikikat; eʼnnaajünüshi taya sükajee tü pünüliakat piakai Jehová» müshi nia (Jeremías 15:16). Pusouta shiʼipajee tüü:
¿Jamüsü anaka niʼnnaajünüle wanee wayuu sükajee nüküjalin pütchi nüchiki Jehová?
¿Woutiiseeshi pia süpüla püküjalin pütchi nüchiki Jehová?
¿Kasa ataʼülaka pukuwaʼipa suulia woutiisain pia?
¿Kasa paaʼinrajatka süpüla puuntuin woutiisain pia?
EESHII WAYUU EEKAI NAMÜIN: «Wainmajüsü taaʼin suulia woutiisaa, jama kaainjaraleere taya».
¿Müsüche tü jülüjakat paaʼin?
WATÜJAAITPAKA AAʼU
Pülateerü achikumüin tü kasa ataʼülakat pukuwaʼipa suulia woutiisaa, nükaalinjeechi pia Jehová.
Pusouta shiʼipajee
¿Pütüjaainjatche saaʼu süpüshuaʼa tü sümakat tü Bibliakat süpüla woutiisain pia?
¿Kasa paaʼinrajatka süpülapünaa woutiisain pia?
¿Jamüsü nnojoluinjatka jülüjain paaʼin iseerüin püchiki woutiisain pia?
PÜNAʼLA SOOʼOMÜIN
Paashajeʼera süchiki kasain woutiisain anainjee pia.
«¿Keraashiche pia süpüla woutiisaa?» (Aapiria Wayuu, maatsoʼu 2020)
Paashajeʼera süchiki tü paaʼinrajatkat süpüla pülatüin süchikumüin tü kasa ataʼülakat pukuwaʼipa.
«¿Eesü wane kasa nnojotka woutiiseein aaʼujee taya?» (Aapiria Wayuu, maatsoʼu 2019)
Pünaja süchiki tü naaʼinrakat wanee wayuu süpüla nülatüin süchikumüin tü kasa ataʼülakat nukuwaʼipa suulia woutiisain nia.
Wainmajüsü naaʼin paala Ataa suulia woutiisain nia. Pünaja süchiki kasain woutiisain anainjee nia mapa.