EKIRAJAAYA 40
Waaʼinrajatka süpüla wulein wakuwaʼipa noʼuluʼu Maleiwa
Jülüjataa paaʼin tü saaʼinrakat wanee wayuu yapaka atuma süchon süpülapünaa nuʼunuin sünain koleejia. Jülüjasü saaʼin noʼoojule, wulere nüsheʼin jee anale niyolojo. Nnojoleechi ayuulin nia sünainjee tia jee atüjaaneerü aaʼu alin nia napüla na wayuu kachooinkana nia. Müshia Jehová, keeʼireesü naaʼin wulein watapaʼa jee wakuwaʼipa süka Washin nia. Aneena waya wulere wakuwaʼipa jee aneerü sünüiki wayuu nüchiki.
1. ¿Kasa waaʼinrajatka süpüla wulein waya otta tü kasa eekat wamaʼana?
«Wuleinjatü jukuwaʼipa» müshi Jehová (1 Pedro 1:16, TNM). Süpüla wulein waya, wuleinjatü watapaʼa otta wakuwaʼipa. Oʼoojowalinjana waya, wuleinjatü washeʼin, wepiapaʼa, weʼejena otta wuleinjatü watuma tü Piichi Outkajaaleekat. Keisarale waya, aneerü sünüiki wayuu nüchiki Jehová (2 Corinto 6:3, 4, TNM).
2. ¿Kasa wayoutajatka süpüla wulein wakuwaʼipa?
«Anakajaʼa wooʼulaale suulia tü yarüttakat atüma waaʼin, tü mojukat atüma wakuaippa» müsü tü Bibliakat (2 Corinto 7:1). Nnojoishii waya sünainpünaain tü kasa mojeetkalü atuma wakuwaʼipa otta tü mojeetkalü atuma tü jülüjakat waaʼin. Wachajaain sukuwaʼipa süpüla anainjatüin nümüin Jehová tü jülüjakat waaʼin, müsüjeseʼe nnojoluin jülüjain waaʼin kasa yarüttüsü (Salmo 104:34). Wanee kasa waaʼinrajatka süpüla wulein wakuwaʼipa, shia nnojoliinjanain waashajaain süka pütchi yarüttüsü (paashajeʼera Colosas 3:8).
¿Kasa maa yarüttaka atuma wakuwaʼipa? Eesü waneirua kasa yarüttaka atuma wakuwaʼipa, maʼaka saaʼin akamüjaa tabaco, akünüjaa süpana coca, asajaa wunuʼu sümaa nnojoluin ayuulin waya jee akamüjaa droga. Wayoutuin tia süka kojutuin wamüin katüin woʼu nutuma Maleiwa otta süka nnojoleenain ayuulin waya sutuma. Wanee kasa naaʼinrajatka wanee wayuu süpüla wulein nukuwaʼipa shia nüchecherüinjatüin naaʼin suulia nümülejüin nükorolo jee nünajüin shiyaakua wayuu masheʼinsat (Salmo 119:37, Éfeso 5:5, TNM). Eesüjaʼa kapüleere nümüin wanee wayuu nuuʼulaain suulia tü kasa yarüttüsü kiʼrakalü anain nia. Nükaalinjeechipejeʼe nia Jehová (paashajeʼera Isaías 41:13).
WEKIRAJAA SOOʼOMÜIN
Wekirajaa sünain kojuteechin Jehová atumawaa wulere waya, tü kasa eekat wamaʼana jee wulere wakuwaʼipa. Otta wekirajaa sünain tü naaʼinrajatkat wanee wayuu süpüla nuuʼulaain suulia tü kasa mojusü kiʼrakalü anain nia.
3. Wulere waya otta tü kasa eekat wamaʼana, kojuteechi Jehová atumawaa
Waashajeʼerapa süchiki tü nuluwataakalü anain Jehová na israelitakana, wayaawatüin saaʼu nücheküin Jehová wuleinjanain waya jee müsia tü kasa eekat wamaʼana. Jaashajeʼera Éxodo 19:10 otta 30:17-19 otta yooto jia süchiki tüü:
Sünainjee tü sümakat tia wetsiikulokot, ¿kasa waaʼinrajatka süpüla wulein waya naashin Jehová?
¿Kasa waaʼinrawalinjatka süpüla wulein waya jee tü kasa eekat wamaʼana?
Wainma tü kasa waaʼinrajatkat süpüla wulein waya jee tü kasa eekat wamaʼana. Eeshii süpüla wulein waya jaʼitainna washirüin jee maʼletsein waya. Jünaja tü VIDEOKOT otta yooto jia süchiki tüü:
¿Jamüshi kojuteechika Jehová atumawaa wulere waaʼawalia, wakaraloʼutse otta weʼejena waküjapa pütchi?
4. Puuʼulaa suulia tü kasa mojusü kiʼrakalü anain pia
Nükaalinjeena waya Jehová süpüla wooʼulaain suulia tü kasa mojusü kiʼrakalü anain waya.
Pükamüjüire, püsajüle wunuʼu süpüla anain paaʼin sümaa nnojoluin ayuulin pia jee pükamüjüle droga, eesüjaʼa kapüleere pümüin puuʼulaain suulia tia. Puuʼulaajeerü tia, jülüjale paaʼin mojeerüin pukuwaʼipa sutuma. Jaashajeʼera Mateo 22:37-39, TNM otta yooto jia süchiki jamüin sumojujaajeetka nukuwaʼipa wanee wayuu...
... nümaa Jehová naaʼinrüle tia.
... sümaa nüpüshi jee namaa na waneinnua.
Jülüja paaʼin tü paaʼinrajatkat süpüla puuʼulaain suulia tü kasa mojusü kiʼrakalü anain pia.a Jünaja tü VIDEOKOT.
Jaashajeʼera Filipos 4:13, TNM otta yooto jia süchiki tüü:
¿Jamüsü nuunteetka wanee wayuu nuuʼulaain suulia tü kasa mojusü kiʼrakalü anain nia nuʼuraajawaire, nikirajaʼawaire sünain tü Bibliakat jee nuʼunawaire sünain tü outkajawaakat?
5. Püchechera paaʼin suulia paaʼinrüin jee jülüjain paaʼin kasa yarüttüsü
Jaashajeʼera Colosas 3:5, TNM otta yooto jia süchiki tüü:
¿Jamüsü watüjaaka saaʼu yarüttüin nümüin Jehová nünajüle wanee wayuu shiyaakua wayuu masheʼinsat, nuluwanaajüle mensaje süchiki amaʼüjirawaa akuwaʼipaa jee nümülejüle nükorolo?
¿Anasüche tü nuchuntakat wamüin Jehová süpüla wuleinjatüin wakuwaʼipa? ¿Jamüsü anaka shia saaʼin pümüin?
Anuu tü eekat süpüla paaʼinrüin süpüla püchecherüin paaʼin suulia jülüjain paaʼin kasa yarüttüsü. Jünaja tü VIDEOKOT.
Nüküjain Jesús tü waaʼinrajatkat süpüla wooʼulaain suulia tü kasa mojusü kiʼrakalü anain waya. Jaashajeʼera Mateo 5:29, 30, TNM otta yooto jia süchiki tüü:
Nnojotsü maluʼuluin nünüiki Jesús woʼyotooinjatüin wajapü jee wayuʼluinjatüin woʼu, shia nüküjeeka achiki tü waaʼinrajatkat süpüla wooʼulaain suulia aaʼinraa kasa mojusü. ¿Kasa waaʼinrajatka süpüla nnojoluin jülüjakuʼu müin waaʼin kasa yarüttüsü?b
Kojutusü nümüin Jehová, püchecherüle paaʼin suulia jülüjain paaʼin kasa yarüttüsü. Jaashajeʼera Salmo 103:13, 14 otta yooto jia süchiki tüü:
¿Püchechereetche paaʼin sutuma tia pütchikat suulia paaʼinrüin kasa yarüttüsü? ¿Jamüsü püchechereetka paaʼin?
Nnojo yüülain paaʼin, ayata püchecherüin paaʼin suulia
«Taaʼinrüin shia süchikuaʼa, isasü tachiki tooʼulaain suulia» müle pünüiki, jülüjataa paaʼin nukuwaʼipa wanee wayuu ayoujiraai. Müleka nüshanaale, nnojoishi nia akanajuuin, atamaashi nia jee awataashi nüchikuaʼa. Nnojoishi pia mepireein paaʼinrüle süchikuaʼa tü kasa mojusü kiʼrakalü anain pia, eesü süpüla püchecherüin paaʼin suulia. Jülüja paaʼin tü kasa puuntuitkat otta nnojo yüülain paaʼin. Wainmainna na wayuu ountakana nooʼulaain suulia tia. Nükaalinjeechi pia Jehová süpüla puuʼulaain suulia tü kasa mojusü kiʼrakalü anain pia.
EESHII WAYUU EEKAI NAMÜIN: «Kiʼrashi taya sünain, isasü tachiki tooʼulaain suulia».
¿Jarat tü wetsiikulo paashajeʼereetka nümüin chi wayuu makai anüiki süpüla niyaawatüin saaʼu nükaalinjeechin nia Jehová?
WATÜJAAITPAKA AAʼU
Wulere waya, tü jülüjakat waaʼin jee tü wakuwaʼipakat, talateerü naaʼin Jehová watuma.
Pusouta shiʼipajee
¿Jamüshii wuleinjanaka waya jee jülüjainjatka waaʼin kasa anasü?
¿Kasa waaʼinrajatka süpüla wulein waya otta tü kasa eekat wamaʼana?
¿Kasa waaʼinrajatka süpüla wulein wakuwaʼipa jee süpüla jülüjain waaʼin kasa anasü?
PÜNAʼLA SOOʼOMÜIN
Mayaainjeʼe maʼletsein waya, ¿kasa waaʼinrajatka süpüla wulein waya?
Paashajeʼera süchiki tü paaʼinrajatkat süpüla puuʼulaain suulia akamüjaa.
«¿Kasa naaʼinrajatka wanee wayuu süpüla nuuʼulaain suulia akamüjaa?» (¡Eeja Waaʼin!, maayoʼu 2010)
Paashajeʼera süchiki tü kasa mojusü eekat sünainjee anajaa shiyaakua wayuu masheʼinsat jee amaʼüjiraasü sukuwaʼipa.
«¿Anasüche anajaa shiyaakua wayuu masheʼinsat?» (Aapiria Wayuu, akoosütoʼu 2013)
Paashajeʼera süchiki tü naaʼinrakat wanee wayuu süpüla nuuʼulaain suulia anajaa shiyaakua wayuu masheʼinsat jee amaʼüjiraasü sukuwaʼipa.
a Süpüla puuʼulaain suulia tü kasa mojusü kiʼrakalü anain pia, paashajeʼera tü pütchikat «¿Kasa naaʼinrajatka wanee wayuu süpüla nuuʼulaain suulia akamüjaa?» sünain tü kanüliakat «Pünaʼla sooʼomüin».
b Süpüla pütüjaain saaʼu tü naaʼinrajatkat wanee wayuu süpüla nuuʼulaain suulia nümülejüin nükorolo, paashajeʼera tü karaloʼutakat Tü natüjaweekalü aaʼu na jimaʼaliikana otta na majayünnüükana (shiʼipa 1), ekirajaaya 25, tü kanüliakat «¿Tounteetche tooʼulaain suulia tamülejüin takorolo?».