EKIRAJAAYA 42
Tü sümakat tü Bibliakat süchiki maʼwayuusee jee kaʼwayuusee
Naashin noʼutku na wayuukana kaʼwayuuseinjachi wanee wayuu süpüla talatüin naaʼin. Nnojotpejeʼe müin tia. Eeshii na wayuu kaʼwayuuseshiikana nnojoliika talatüin aaʼin. Nnojotsü mojukuʼu müin naaʼin na nnojoliikana kaʼwayuusein sutuma maʼwayuusein naya. Nnojotsü mojuin saashin tü Bibliakat maʼwayuusere jee kaʼwayuusere wanee wayuu.
1. ¿Kasa anasü eeka sünainjee maʼwayuusein wanee wayuu?
Anuu sünüiki tü Bibliakat: «Müleka nuʼwayuusere tü nümüraajüinkat, nnojotsü mojuin tü naaʼinrakat. Otta müleka ayatüle nia sünain maʼwayuusee, saaʼin tamüin, alanaʼaleesia sünain anain tü naaʼinrakat» (paashajeʼera 1 Corinto 7:32, 33, 38). Maʼwayuusere wanee wayuu, «alanaʼaleesia sünain anain tü naaʼinrakat» saashin tü Bibliakat. Nnojotsü shapaakuʼu müin naaʼin saaʼu tü naapajatkat sümüin nuʼwayuuse. Akaʼaya tü jietkat, nnojotsü shapaakuʼu müin saaʼin naaʼu suʼwayuuse. Nnojotsü kasain ataʼülüin nakuwaʼipa na maʼwayuusekana süpüla naaʼinrüin waneirua kasa. Eesü mapüleere namüin naʼyataainjanain maʼin nümüin Jehová maʼaka saaʼin noʼunajaain suluʼupünaa waneirua mma sünain aküjaa pütchi. Süka maʼwayuusein naya, apütaasü kaʼi napüla süpüla nekirajaain maʼin sünain tü Bibliakat jee süpüla aleewain maʼin naya nümaa Jehová.
2. ¿Kasa anasü eeka sünainjee kasaalüin wanee wayuu suluʼujee laülaapia?
Maʼaka eein kasa anasü eeka sünainjee maʼwayuusein wanee wayuu, eesia kasa anasü eeka sünainjee kaʼwayuusein wanee wayuu. «Anashii piamashii wayuu nuulia waneeshia» müsü tü Bibliakat (Eclesiastés 4:9). Anashii naya piamaleʼeya müleka naaʼinrüle tü sümakat tü Bibliakat. Na wayuu kasaatkana suluʼujee laülaapia, naapüin nanüiki süpüla aijiraainjanain naya, kojutujiraainjanain naya jee naaʼinmajiraainjanain. Makalaka anain naaʼin noulialeʼeya na wayuu kepiajiraakana neʼe sümaa nnojoliin kasaalüin naya. Kachonniipa na kasaatshiikana, anasü naaʼin nachonnii namaa.
3. ¿Jamüsü nünüiki Jehová süchiki sukuwaʼipa kaʼwayuusee?
Anuu nünüiki Jehová wanaa sümaa kasaalüin Adán nutuma sümaa Eva: «Müshijeseʼe nükatalaainjachin maaʼulu yaa wane wayuu shipialuʼujee nii je nipialuʼujee nüshi süpüla waneeshinjachin sünain saʼaniraainjatüin nükuaippa nümüiwa sümaa nuʼwayuuse süpüla paaʼinwajiraainjanain naya» (Génesis 2:24). Nücheka achikit Jehová alinjatüin nüpüla nuʼwayuuse wanee wayuu jee nnojoliinjanain nooʼulaajiraain. Aluʼusaʼa sutumasirüle shia amaʼüjirawaa akuwaʼipaa, eeshii süpüla nooʼulaajiraain. Chi wayuu nnojoikai amaʼüjiraashin nukuwaʼipa, niainjachin aneekaka nuuʼulaainjatüle nuʼwayuuse jee ayatüinjachire nia sümaa (Mateo 19:9).a Nnojotsü nücheküin Jehová piamasüinjatüin nuʼwayuuse wanee wayuu (1 Timoteo 3:2).
WEKIRAJAA SOOʼOMÜIN
Wekirajaa süchiki tü paaʼinrajatkat süpüla talatüin paaʼin jee talatüin naaʼin Jehová putuma jaʼitaichi maʼwayuusein jee kaʼwayuusein pia.
4. Pajayata maiwaʼaya pia maʼwayuusein
Nnojotsü mojukuʼu müin naaʼin Jesús sutuma maʼwayuusein nia. Talatüsü naaʼin (Mateo 19:11, 12, TNM). Jaashajeʼera Mateo 4:23 otta yooto jia süchiki tüü:
Sutuma maʼwayuusein Jesús, ¿kasa naaʼinraka süpüla niʼyataain nümüin chi Nüshikai jee nükaalinjain na waneinnua?
Eesü süpüla talatüin naaʼin na wawalayuu maʼwayuusekana najayatüle maiwaʼaya maʼwayuusein naya maʼaka naaʼinrüin shia Jesús. Jünaja tü VIDEOKOT otta yooto jia süchiki tüü:
¿Kasa paaʼinrajatka süpüla pajayatüin maiwaʼaya pia maʼwayuusein?
¿Pütüjaa aaʼu tüü?
Nnojotsü süküjain tü Bibliakat jeʼrainjatüin nuuyase wanee wayuu süpüla kasaalüin nia. Nnojotpejeʼe anain saashin tü Bibliakat kaʼwayuusere wayuu tepichijaiwaʼaya naya. Nooʼulaainjatü sülatüin paala noulia suchuntaain maʼin naaʼin ainkawaa suulia mojujain nakuwaʼipa (1 Corinto 7:36).
5. Jülüjainjatka paaʼin kaʼwayuusere pia
Nnojotsü ashaitaain tü kaʼwayuuseekat. Makalaka jülüjainjatüin paaʼin jaralüinjatüin tü puʼwayuuseinjatkat süka pümaainjatüin shia waneepia. Paashajeʼera Mateo 19:4-6, 9 otta yooto jia süchiki tüü:
¿Jamüsü jülüjainjatka maʼin naaʼin wanee anoujashi jaralüinjatüin nuʼwayuusein?
Pünteerü anain suluʼu tü Bibliakat tü jülüjainjatkat paaʼin nünain wanee wayuu puʼwayuuseinjachikai jee sünain wanee wayuu puʼwayuuseinjatkat. Püchajaa na aikana apüla Jehová.b Jaashajeʼera 1 Corinto 7:39 otta 2 Corinto 6:14. Süchikijee yooto jia süchiki tüü:
Kaʼwayuuseere wanee anoujashi, ¿jamüsü nüneeküinjatka wanee wayuu anoujiraaka wanaa nümaa?
Kaʼwayuusere wanee wayuu eekai manoujain, ¿jameetche nukuwaʼipa sutuma tia?
Kapüjiraale wanee püliikü nümaa wanee paaʼa toolo, mülieerü maʼin naaʼin piamaleʼeya. Meeria nukuwaʼipa wanee anoujashi kasaarüle nia sümaa wayuu eekai manoujain, mülieerü maʼin naaʼin otta mojeerü nakuwaʼipa.
6. Kojuta pümüin sukuwaʼipa kaʼwayuusee maʼaka kojutuin shia nümüin Jehová
Ooʼulaajiraapuʼushii na israelitakana suulia naʼwayuuse sünainjee naaʼinreein tü keeʼireekat naaʼin namüiwaʼa. Jaashajeʼera Malaquías 2:13, 14, 16 otta yooto jia süchiki tüü:
¿Jamüsü mojuka nümüin Jehová nuuʼulaale nuʼwayuuse wanee wayuu sünainjee wanee kasa nnojotka mojuin saashin tü Bibliakat?
Kawalaʼatale nutuma wanee wayuu nuʼwayuuse jee nooʼulaajiraale, mülieerü maʼin saaʼin nuʼwayuuse otta nachonnii.
Jünaja tü VIDEOKOT otta yooto jia süchiki tüü:
Kaʼwayuusere pia wanee wayuu manoujainka, ¿kasa paaʼinrajatka süpüla talatüin paaʼin sümaa?
7. Kaʼwayuusere pia, paaʼinra tü nümakat Jehová
Eeshii na kapüleekana amüin naaʼinrüin tü nümakat Jehová süchiki tü kaʼwayuuseekat.c Nükaalinjapejeʼe Jehová na oonookana sümaa nünüiki. Jünaja tü VIDEOKOT.
Jaashajeʼera Hebreokana 13:4 otta yooto jia süchiki tüü:
¿Kapüleesüche oonowaa sümaa tü nümakat Jehová namüin na kaʼwayuuseshiikana? ¿Jamüsü nnojotka kapüleein shia?
Nuchuntuin Jehová nümüin wanee anoujashi nüshajirüinjatüin nünülia laülaapialuʼu kaʼwayuusere nia. Naaʼinrüinjatü tiaʼaya nuuʼulaajiraainjachire sümaa nuʼwayuuse. Süka jamüin, suchuntunuin tia suluʼu wainma mma. Jaashajeʼera Tito 3:1 otta yooto jia süchiki tüü:
Kaʼwayuusere pia, ¿püshajirüitpache pünülia suluʼu laülaapia sümaa saapünüin pümüin wanee karaloʼuta?
EESHII WAYUU EEKAI NASAKIRÜIN: «¿Jamüshi kasaaluinjachika wanee wayuu? Nnojotsü sukuwaʼipain wayuu tia».
¿Jamüsüjaʼa pünüiki süchiki tia?
WATÜJAAITPAKA AAʼU
Nnojotsü mojuin maʼwayuusere jee kaʼwayuusere wanee wayuu. Naaʼinrüle tü nümakat Jehová, eesü süpüla talatüin naaʼin jee anain nukuwaʼipa.
Pusouta shiʼipajee
¿Kasa eeka süpüla najayatüin wanee wayuu maiwaʼaya maʼwayuusein nia?
¿Jamüsü süküjaka tü Bibliakat kasaalüinjachin wanee wayuu sümaa wanee wayuu anoujiraaka wanaa nümaa?
Saashin tü Bibliakat, ¿kasa nuuʼulaajiraainjachika anainjee wanee wayuu suulia nuʼwayuuse?
PÜNAʼLA SOOʼOMÜIN
¿Jamüshi kasaalüinjachika wanee wayuu sümaa eekai sunoujain?
Anuu piamasü video aküjaka süchiki amüraajirawaa otta süchiki kaʼwayuusee. Sünainjee tia, pütüjaajeerü aaʼu tü anakat süpüla paaʼinrüin.
Anuu nüchiki wanee wawala eʼitaakai naaʼin sünain wainmain kasa naapaka Jehová nümüin suulia tü nuuʼulaakat.
Süpülapünaa nuuʼulaajiraain wanee anoujashi suulia nuʼwayuuse, ¿kasa jülüjainjatka naaʼin palajana?
«Kojuta wamüin sukuwaʼipa kaʼwayuusee» (Aapiria Wayuu, tisienpüroʼu 2018)
a Sünain tü nootakat 4, puusüteerü anain sooʼomüin pütchi süchiki tü nükatajiraainjatkalü anainjee wanee wayuu suulia nuʼwayuuse (nnojorüle sutumasirüin shia amaʼüjirawaa akuwaʼipaa).
b Suluʼu waneirua mma, eeshii na wayuu aneekakana naʼwayuuse nachonnii. Jülüjapejeʼe naaʼin aire Jehová nüpüla chi wayuu naneekakai jee süpüla tü wayuu naneekakat. Alanaʼaleesia maʼin tia suulialeʼeya nneerü jee washirüü.
c Kepiajiraale pia sümaa wanee jierü sümaa nnojolin kasaalüin pia sümaa, püneeküinjatü süka paaʼin pümüiwaʼa kasaalüinjachire pia sümaa jee puuʼulaainjachire suulia.