Tü sümakat tü Bibliakat süchiki tü asüüshikat

Sainküin tü mmakat, eeshii na wayuu asawaikana namaa naʼaleewainyuu. Eeshii na nnojorüleekana asüin. Eetaashii na asakana sünainmüinreʼeya nepeʼrüin. ¿Jamüsü sünüiki tü Bibliakat süchiki tü asüüshikat?

1. ¿Mojusüche asaa yootshi?

Nnojotsü mojuin tü asüüshikat saashin tü Bibliakat. Süküjain talatüin naaʼin wanee wayuu sutuma tü wiinokot otta süpüshin tü kasa anasü naapakat Jehová wamüin (Salmo 104:14, 15). Süküjainya tü Bibliakat nachiki waneinnua wayuu anoujakana nünain Jehová asapuʼukana wiino (1 Timoteo 5:23).

2. ¿Jamüsü sünüiki tü Bibliakat nümüin wanee wayuu eekai nüsüinjachin?

Tü mojukat nümüin Jehová shia nipeʼrüle wanee wayuu otta nüsüire maʼin (Galacia 5:21). «Nnojo namaain pia na asüliikana maʼin wiino» müsü tü Bibliakat (Proverbios 23:20). Müleka wasüinjanale wamüiwaʼa jee namaa na waneinnua, nnojotsü alataleeinjatüin watuma tü wasüinkat. Sülataleere watuma, nnojoleerü watüjaain saaʼu tü waaʼinrakat jee tü wamakat jee nnojoleerü wayaawatüin saaʼu tü wakuwaʼipakat. Nnojoluinjana waya asüin maʼin süka eein süpüla ayuulin waya sutuma. Isale wachiki wachecherüin waaʼin suulia jeʼtsüinjatüin tü wasüinkat, anakajaʼa wooʼulaale suulia asaa.

3. ¿Jamüshi nnojoluinjachika wayoujain wanee wayuu nüsüle jee nnojorüle nüsüin?

Waneeküinjatü süka waaʼin wamüiwaʼa wasüinjanale jee nnojoluinjanale wasüin. Nnojoishi wayoujainjachin wanee wayuu eekai nüsüin sümaa niyaawatüin saaʼu nüsüin. Müleka nnojorüle nüsüin wanee wayuu, nnojotsü wapüleeruaainjatüin naaʼin shiiʼiree nüsüin (Roma 14:10). Nnojoishii waya asüinjanain nnojorüle anain shia namüin na waneinnua (paashajeʼera Roma 14:21). «Tü kasa anakat süpüla jaaʼinrüin, shiainjatü tü jalouikat sümüin wayuu wainma, nnojotsü shiainjatüin neʼe tü akaaliijiakat jia jümüiwa» müsü tü Bibliakat namüin na anoujashiikana (paashajeʼera 1 Corinto 10:23, 24).

WEKIRAJAA SOOʼOMÜIN

4. Püsüinjachire jee nnojolinjachire püsüin

¿Jamüsü nünüiki Jesús süchiki tü asüüshikat? Süpüla pütüjaain saaʼu tia, wekirajaa sünain tü naaʼinrakat Jesús soʼu wiinojaain nutuma tü wüinkat. Jaashajeʼera Juan 2:1-11 otta yooto jia süchiki tüü:

• ¿Kasa watüjaka sünainjee tü nümakat Jesús süchiki tü asüüshikat otta nachiki na asakana?

• Süka nnojoluin mojuin naashin Jesús tü asüüshikat, ¿kasa jülüjainjatka naaʼin wanee anoujashi nüsüinjachire?

Nüsüle wanee anoujashi, nnojotsü naaʼinrakuʼu nümüinjatüin tia waneepia. Jaashajeʼera Proverbios 22:3 otta jikirajaa süchiki anale asaa wanaa sümaa:

• Chupeerüin wanee wayuu.

• Ipuoluin wanee wayuu.

• Süpülajünüin nuulia tü yootshikat nutuma wanee tottoolu.

• Isain nüchiki niyaawatüin saaʼu jeʼtsüinjatüin nüsüin.

• Süpülajünüin tü asüüshikat natuma na sülaülashiikana mma.

• Wamaain wanee wayuu ooʼulaakai suulia asaa süka nüsüipuʼuin nümaiwa.

¿Anasüche weitajüle asüüshi shikiira kasaalüü jee sünain waneirua jutkatirawaa? Süpüla pütüjaain saaʼu tü jülüjainjatkat waaʼin, jünaja tü VIDEOKOT.

VIDEO: ¿Anasüche weitajüle asüüshi shikiira kasaalüü? (2:41)

Jaashajeʼera Roma 13:12, 13 otta 1 Corinto 10:31, 32. Süchikijee jaashajeʼerüin tia wetsiikulokalüirua yooto jia süchiki tüü:

• ¿Kasa pütchi jülüjainjatka paaʼin süpüla anain tü paaʼinrajatkat noʼuluʼu Jehová jee talatüin nia sümaa pukuwaʼipa?

5. Piyaawata saaʼu püsüin müleka püsüinjachire

Püsüinjachire yootshi süka nnojoluin mojuin shia noʼuluʼu Jehová, soteesü paaʼin shiain mojuin nümüin sülanaʼaleere tü asüüshikat. ¿Jamüsü mojuka nümüin Jehová tia? Jaashajeʼera Oseas 4:11, 18 otta yooto jia süchiki tüü:

• ¿Kasa alateetka nümüin wanee wayuu sülanaʼaleere nutuma tü nüsüinkat?

¿Kasa waaʼinrajatka süpüla nnojoluinjatüin sülanaʼaleein watuma tü wasüinkat? Wayaawatüinjatü saaʼu müleka isale wachiki wachecherüin waaʼin suulia tia. Jaashajeʼera Proverbios 11:2 otta yooto jia süchiki tüü:

• ¿Jamüsü anaka piyaawatüle saaʼu püsüin müleka püsüinjachire?

6. Puuʼulaʼaleʼeya suulia asaa

VIDEO: «Talerajüin tü takuwaʼipapuʼukat» (6:32)

• ¿Kasa alataka nümüin Dimitri sutuma nüsülin maʼin?

• ¿Ooʼulaʼaleeshiche nia uwatuwoʼushi?

• ¿Kasa naaʼinraka süpüla nuuʼulaʼaleeinjachin suulia asaa?

Jaashajeʼera 1 Corinto 6:10, 11 otta yooto jia süchiki tüü:

• ¿Mojusüche maʼin tü epeʼruwaakat? ¿Jamüsü mojuka shia?

• ¿Jamüsü watüjaaka saaʼu eein süpüla nunouteʼerüin nukuwaʼipa wanee wayuu eekai nüsüipuʼuin maʼin nümaiwa?

Jaashajeʼera Mateo 5:30 otta yooto jia süchiki tüü:

• «Anasüje neʼe amüloulire puulia waneesia pajapü», müshi Jesús. Tü nikirajeekalü achiki Jesús yala shia nuuʼulaʼaleeinjachin wanee wayuu suulia wanee kasa mojusü kiʼraka anain nia süpüla anain nukuwaʼipa noʼuluʼu Maleiwa. Müleka puuʼulaweere suulia asaa, ¿kasa paaʼinrajatka?a

Jaashajeʼera 1 Corinto 15:33, TNM otta yooto jia süchiki tüü:

• ¿Kaseerü paaʼinraka müleka namaale pia na wayuu asüliikana maʼin?

WATÜJAAITPAKA AAʼU

Tü asüüshikat shia süpüshi wanee kasa talataka atuma naaʼin wanee wayuu süka süpüshin tü kasa anasü naapakat wamüin Jehová. Mojupejeʼe nümüin tü epeʼruwaakat otta nüsüire maʼin wanee wayuu.

Pusouta shiʼipajee

• ¿Jamüsü sünüiki tü Bibliakat süchiki tü asüüshikat?

• ¿Kasa alateetka nümüin wanee wayuu nüsüire maʼin?

• ¿Jamüshi nnojoluinjachika wayoujain wanee wayuu nüsüle jee nnojorüle nüsüin yootshi?

PÜNAʼLA SOOʼOMÜIN

¿Kasa jülüjainjatka naaʼin na jimaʼaliikana jee na majayünnüükana nasüinjanale yootshi?

Jalia pia suulia tü yootshikat (2:31)

Paashajeʼera süchiki tü paaʼinrajatkat süpüla puuʼulaʼaleein suulia tü asüüshikat.

«Tü paaʼinrajatkat süpüla puuʼulaʼaleein suulia tü asüüshikat» (Aapiria Wayuu, eneeroʼu 1, 2010)

¿Anasüche naaʼinrüle na anoujashiikana tü kanüliakat brindis?

«Süsakiraka anain wayuu» (Aapiria Wayuu, peʼureeroʼu 15, 2007)

Paashajeʼera nüchiki wanee wayuu eʼnnaajünakai maʼin sümaa nüsüipuʼuin maʼin. Ooʼulaʼaleeshia nia suulia asaa mapa.

«Sunouteʼerüin nakuwaʼipa tü Bibliakat» (Aapiria Wayuu, maayoʼu 1, 2012)