Loto wakuwaʼipa sünain kasa süpüshuaʼa

Anasü namüin na wayuukana lotule nakuwaʼipa naʼaleewainyuu, shiaʼaya keeʼireeka naaʼin Jehová tia napüleerua naʼaleewainyuu. Kapüleepejeʼe maʼin süpüla müin wakuwaʼipa süka jouluin maʼin na nnojoliikana lotuin akuwaʼipa. ¿Kasa anasü weʼreetka lotule wakuwaʼipa waneepia?

1. ¿Jamüsü lotuinjatka wakuwaʼipa sünain kasa süpüshuaʼa?

Lotule wakuwaʼipa sümüin wayuu, aishi wapüla Jehová jee kojutushi nia wamüin. Nnojotsü eein wanee kasa eeka süpüla wounjulajüin achiki nuulia Jehová, nütüjaa aaʼu tü jülüjakat waaʼin jee tü waaʼinrakat (Hebreokana 4:13). Nütüjaa aaʼu Jehová lotule wakuwaʼipa jee talatüsü naaʼin sutuma. Anuu sünüiki tü Bibliakat: «Üttüsü naaʼin Jehová nünain chi wayuu emeejüikai, aleewapejeʼe maʼin nia namaa na wayuu lotokana akuwaʼipa» (Proverbios 3:32).

2. ¿Kasa waaʼinrajatka süpüla lotuin wakuwaʼipa sünain kasa süpüshuaʼa?

«Jüküjiraainjatü tü shiimainkat» müshi Jehová wamüin (Zacarías 8:16, 17). ¿Jamüsü süpüla waaʼinrüin tia? Waaʼinrüin shia nnojorüle waküjain waʼalain namüin na wapüshikana, na aʼyataajiraakana wamaa, na wawalayuukana jee namüin na sülaülashiikana mma. Na wayuu lotokana akuwaʼipa, nnojoishii aʼluwajüin jee emeejüin wayuu (paashajeʼera Proverbios 24:28 otta Éfeso 4:28). Nawalaajüin tü nneerü nachekajakat na sülaülashiikana mma (Roma 13:5-7). Loteesü wakuwaʼipa sünain süpüshuaʼa tü kasa waaʼinrakat (Hebreokana 13:18, TNM).

3. ¿Kasa anasü weʼreetka lotule wakuwaʼipa waneepia?

Weʼnnaajünüle sutuma wayuu sünain lotuin wakuwaʼipa waneepia, neʼitaajeerü naaʼin wanain. Sutuma müin wakuwaʼipa, meena aka saaʼin wapüshi na wawalayuukana jee aneerü naaʼin wamaa otta aneerü waaʼin namaʼaya. Lotule wakuwaʼipa soʼuluʼu wayuu, «eesü süpüla kapülain naaʼin tü pütchi wekirajakat anain, tü nüchikikat chi Maleiwa Oʼtteʼerüikai waya» otta keeʼireejeerü naaʼin naʼyataweein nümüin Jehová (Tito 2:10).

WEKIRAJAA SOOʼOMÜIN

4. Anasü nümüin Jehová lotule wakuwaʼipa

Jaashajeʼera Salmo 44:21 jee Malaquías 3:16 otta yooto jia süchiki tüü:

• ¿Eesüche süpüla wounjulajüin süchiki wanee kasa nuulia Jehová? ¿Jamüsü nnojoluinjatka wounjulajüin shia?

• Mayaainjeʼe mmoluin waaʼin saaʼu waküjain süchiki tü waainjalakat, ¿jameerü naaʼin Jehová waküjale shia?

5. Loto wakuwaʼipa waneepia

VIDEO: ¿Kasa talataka atuma waaʼin? Waaʼinrüle waneepia tü anasükat (2:32)

Jaashajeʼera Hebreokana 13:18, TNM otta yooto jia süchiki tü waaʼinrajatkat süpüla lotuin wakuwaʼipa...

• ... namüin wapüshi.

• ... waʼyataaleruʼu jee koleejialuʼu.

• ... sünain waneirua kasa.

6. Eʼreena waya kasa anasü lotule wakuwaʼipa

Eesüjaʼa weʼrüle kasa mojusü sünainjee lotuin wakuwaʼipa, shiapejeʼe anaʼleein lotule wakuwaʼipa. Jaashajeʼera Salmo 34:12-16 otta yooto jia süchiki tüü:

• ¿Kasa anasü weʼreetka lotule wakuwaʼipa?

1. 1. Lotule nukuwaʼipa wanee wayuu sümüin nuʼwayuuse jee müsia shiakat nümüin, aijiraajeena maʼin naya.

2. 2. Lotule wakuwaʼipa waʼyataaleruʼu, aneerü naaʼin chi walaamainkai wamaa.

3. 3. Lotule wakuwaʼipa, aneerü pütchi wachiki natuma na aʼyataakana neʼipajee na sülaülashiikana mma.

WATÜJAAITPAKA AAʼU

Nücheküin Jehová napüleerua naʼaleewainyuu lotuinjatüin nakuwaʼipa sünain süpüshuaʼa tü kasa naaʼinrakat jee tü namakat.

Pusouta shiʼipajee

• ¿Kasa lotuinjatka anain wakuwaʼipa?

• ¿Jamüsü nnojotka süpüla wounjulajüin süchiki wanee kasa nuulia Jehová?

• ¿Jamüsü lotuinjatka pukuwaʼipa waneepia?

PÜNAʼLA SOOʼOMÜIN

¿Kasa naaʼinrajatka na kachonshiikana süpüla naküjain tü shiimainkat na nachonniikana?

Püküja tü shiimainkat (1:44)

¿Kasa anasü neʼreetka na ekeraajakana nanüiki?

Pikeraaja pünüiki, piʼreetka kasa anasü (9:09)

Paashajeʼera süchiki wawalaajüinjatüle tü nneerü nachekajakat na sülaülashiikana mma jaʼitairü mojeerüin sukuwaʼipa natuma

«¿Wawalaajüinjatche tü nneerü nachekajakat wamüin na sülaülashiikana mma?» (Aapiria Wayuu, settienpüroʼu 1, 2011)

¿Jamüsü nuʼwanajaaka nukuwaʼipa mapa wanee wayuu kaʼruwarai?

«Tayaawata aaʼu anamiain Jehová jee nülatirüin waainjala» (Aapiria Wayuu, maayoʼu 1, 2015)