Kojuta maʼin wamüin nukuwaʼipa Jeʼwaa

1. (1) ¿Jarat tü nukuwaʼipa Jeʼwaa eekat süpüla wekirajaain anain? (2) ¿Jameerü wakuwaʼipa müleka wekirajaale sünain tü nukuwaʼipakat Jeʼwaa?

JÜLÜJÜLE PAAʼIN tü nukuwaʼipakalüirua Jeʼwaa, ¿jarat antamaataka suluʼumüin pikii? Eesü süntüle suluʼumüin pikii aipüralin nia, lotuin nukuwaʼipa, kekiin nia otta pülain nia. Nnojotpejeʼe shiain neʼe nukuwaʼipain Jeʼwaa tia, eesü waneeirua. Eeshii süpüla waashajaain süchiki pienchisü shikii otta aashajaanüirü achiki suluʼu tü karaloukta weitajakat. Watta saalii tü nukuwaʼipakalüirua Jeʼwaa eeka süpüla wekirajaain anain wamüiwaʼa otta sümaa wapüshi. ¿Jameerü wakuwaʼipa müleka wekirajaale sünain tü nukuwaʼipakat Jeʼwaa? Keeʼireejeerü waaʼin warütkaain nünainmüin otta washatüin tü nukuwaʼipakat (Jos. 23:8; Sal. 73:28).

2. (1) ¿Kasa waaʼinrajatka süpüla kojutüin maʼin wamüin tü nukuwaʼipakat Jeʼwaa? (2) ¿Kasa wekirajaainjatka anain?

² ¿Kasa paaʼinrajatka süpüla kojutüinjatüin maʼin pümüin wanee kasa? Nnojotsü kojutüin wamüin uatuwoʼushi wanee kasa. Müsia neʼe tü nukuwaʼipakat Jeʼwaa. Watüjaainjatü aaʼu palajana kasain sünainpünaain, süchikijee jülüjüinjatü waaʼin jamüin sukuwaʼipa nutuma Jeʼwaa otta aʼyataainjana waya süchiirua weʼitaain shia suluʼu wakuwaʼipa (Éf. 5:1). ¿Kasapülajatü ekirajaayakat tüü otta tü wanee piamasü süchikijeekat? Süpülajatü kojutüinjatüin maʼin wamüin tü nukuwaʼipakat Jeʼwaa. Sünain ekirajaayakat tüü, wekirajaajeerü anain apünüinsü pütchi: 1) ¿Kasa sünainpünaaka tü nukuwaʼipakat Jeʼwaa? 2) ¿Kasa niiʼiyataka aka shia? 3) ¿Kasa waaʼinrajatka süpüla washatüin tü nukuwaʼipakat?

KAMANEESHI JEʼWAA

3, 4. (1) ¿Kasa naaʼinraka wanee wayuu kamaneere nia? (2) ¿Kasa niiʼiyataka aka Jeʼwaa kamaneein nia?

³ ¿Kasa naaʼinraka wanee wayuu kamaneere nia? Nnojoishi wattaluʼuin suulia wayuu, anasü saaʼin wayuu nümaa, jaʼyasü naaʼu kamaneein nia otta niiʼiyatüin shia süka tü nünüikipalakat.

⁴ ¿Kasa niiʼiyataka aka Jeʼwaa kamaneein nia? Mayaainjeʼe niain kakumalain süpüshuaʼa tü kasakalüirua, keeʼireesü naaʼin woʼuraajüin nümüin. Otta watüjaa aaʼu naapüin wanüiki otta nusouktüin shiʼipajee ( paashajeʼera Salmo 145:18 otta Isaías 30:18, 19). Watüjaa aaʼu eein süpüla woʼuraajüin nümüin Jeʼwaa eepünaale waya. Otta watüjaa aaʼu nnojoleenain niyoujain waya sünainjee achuntaa nümüin (Sal. 65:2; Sant. 1:5). Saashin tü Wiwüliakat, müshi aka saaʼin wanee wayuu süka keeʼireein naaʼin warütkaain nünainmüin. Naashin David, niʼrajaain waya Jeʼwaa otta najapuluʼushii waya süka tü najapü nikiakat (Sal. 34:15; 63:8). Naashin Isaías müshi aka naaʼin wanee arüleejüi. Müshi nia nüchiki Jeʼwaa: «Nüpataajeena na anneetchenkana süpüla nutuʼuin naya» (Is. 40:11, NM). Keeʼireesü maʼin naaʼin Jeʼwaa pejein waya nünain. Maʼaka naaʼin wanee anneetchon atunkakai nutuʼu chi arüleejüikai. ¡Kamaneeshi maʼin Jeʼwaa! ¿Kasa waaʼinrajatka süpüla kamaneein waya maʼaka naaʼin Jeʼwaa?

KAMANEEINJANA MAʼIN NA LAÜLAASHIIKANA

5. ¿Jamüshi kamaneeinjachika maʼin wanee laülaashi?

⁵ Asakinnüshii jekenainka kojuyashii wawalayuu sainküinpünaa mmaka, anuu tü asakinnakalü anain naya: «¿Jarat tü akuwaʼipaa kamalainkat maʼin pümüin nünainjee wanee laülaashi?». Kojuya na makana: «Kamaneere nia». Kamaneeinjana napüshuaʼa na anoujüshiikana, akanasaʼa nayainjanain kamaneein maʼin na laülaashiikana (Is. 32:1, 2). Müsü wanee wawala wanaa sümaa saashajaain süchiki jamüin choʼujaaka kamaneein wanee laülaashi: «Süpüla niʼraajünüinjachin maʼin wanee laülaashi, kamaneeinjachi nia palajana». ¿Shiimainchejeʼeya tia? ¿Kasa naaʼinrajatka wanee wayuu süpüla kamaneein nia?

6. ¿Kasa naaʼinrajatka wanee laülaashi süpüla kamaneein nia?

⁶ Süpüla kamaneeinjachin wanee wayuu, kapülainjatü naaʼin nakuwaʼipa na waneeinnua. Nnojoleerü jaralüin motuin aaʼin tü naainjakat wanee laülaashi napüleerua na nuwalayuukana; jaʼitakajeʼe na tepichikana neʼrüin tia (Mar. 10:13-16). Müsü nünüiki Carlos, polooirü piama nuuyase: «Teʼrüin na laülaashiikana soʼuluʼu tü outkajaaleekat sünain kulematüin naya sümaa nasaküin na antapaatakana. Kamalainsü maʼin tamüin tü naainjakat». «Kamaneeshi taya», nnojoishi müinjachin neʼe wanee laülaashi, niiʼiyatüinjatü tia süka nukuwaʼipa (1 Juan 3:18). ¿Jamüinjatü sukuwaʼipa nutuma?

7. ¿Jamüshi yootoko pia sümaa wayuu sutuma pünain tü karaloukta sünüliamaajatkat tü outkajawaakat miyoʼu? ¿Kasa shikirajaka anain waya tia?

⁷ Jülüjataa waaʼin tü alatakat nümüin wanee wawala oʼunakai sünain wanee outkajawaa miyoʼu apünüinka kaʼi. Katünasüluʼushi nia otta eejatü nünain tü karaloukta sünüliamaajatkat tü outkajawaakat, makat mayaa: «Sünta tü puluwataayakat». Naashajeʼeraka shia chi shiyuransekai tü katünasükat. «Kasataalejeseʼe süntüin, acheküshii yootuin waya süchiki tia», nümakalaka nümüin chi wawalakai. Yootiraaka chi wawalakai nümaa otta nüpütaka nüpüla wanee rewiisüta. ¿Yootuichi pia sümaa wayuu sutuma pünain tü karaloukta sünüliamaajatkat tü outkajawaakat miyoʼu? ¿Jamüsü sülataka tia? Süka müin pümakai aaʼin namüin na wayuukana: «Jalaichi paashajaaiwa tamaa. Püsakira jalamüinjachin taya». Sükajee wanain tia karalouktakat, neʼrüin na wayuukana yooteein waya namaa süchiki tü wanoulakat. Müinjatia jukuwaʼipa jiakana laülaashiikana, neʼrüinjatüin na wawalayuukana yooteein jia namaa. Müinjana jümakai aaʼin sükajee jukuwaʼipa: «Jalaichi paashajaaiwa tamaa». ¿Kasa jaainjüinjatka süpüla neʼrüin na wawalayuukana yooteein jia namaa?

8. ¿Kasa naainjüinjatka na laülaashiikana süpüla yootuin naya namaa na waneeinnua? ¿Jamüsü naaʼin na wawalayuukana saainjünüle tia namüin?

⁸ Naatawai sukuwaʼipa nasakia na wayuukana sainküinpünaa tü mmakat, iraʼaya eekai nukulemeraain namüin na antakana, iraʼaya eekai naapüin najapü otta iraʼaya eekai «jamayaa pia», nümüin. ¿Jaralii asaküinjanaka palajana? Wanaa sümaa nuutkajaain Jesuu namaa na nikirajüinkana, arütkaashi nia nanainmüin sünain naashajaain namaa (Mat. 28:18). Naainjüinjatü tia na laülaashiikana; arütkaainjana nanainmüin na waneeinnua sünain naashajaain namaa. ¿Jamüsü naaʼin na wawalayuukana saainjünüle tia namüin? Müsü wanee pürekutsoot mekiisatka shikii mekiisatmüin suuyase: «Anasü taaʼin sutuma teʼrüin nakulemeraain tapanapa otta nasaküin taya na laülaashiikana tantapa sünainmüin tü outkajawaakat». Sümataalaka joo wanee wawalaya: «Talatsü maʼin taaʼin sutuma nasaküin taya na laülaashiikana tantapa sünainmüin tü outkajawaakat».

KAMANEESHII SÜMAA NNOJOLIIN WATTALUʼUIN NAYA

9, 10. (1) ¿Kasa washatüinjatka anain nukuwaʼipa Jeʼwaa? (2) ¿Kasa naaʼinrajatka na laülaashiikana süpüla nnojoliin wattaluʼuin naya noulia na nawalayuukana?

⁹ Nnojotsü süpüla yootuin wamaa wanee wayuu müleka wattaluʼule waya suulia. Nia washatüinjachika akuwaʼipa Jeʼwaa süka nnojolin «wattain [nia] woulia waneʼewai wakua» (Aluw. 17:27). Nnojoishii wattaluʼuin na laülaashiikana noulia na nawalayuukana müleka nachajaale sukuwaʼipa süpüla yootuin naya namaa süpülapünaa jee süchikijee tü outkajawaakat. Naainjüinjatü tia naka na tepichikana otta na miyoʼuyuukana. Müshi wanee pürekutsoot: «Tasakinnüle nutuma wanee laülaashi sünain jamüin takuwaʼipa otta jülüjüle naaʼin tanüiki, aishijaʼa taya nüpüla». Anuu sünüiki wanee wawala jaʼraliirü shikii suuyase sünain anoujaa: «Yootule tamaa na laülaashiikana süchikijee tü outkajawaakat, neeʼiyatüin tamüin kojutüin taya namüin».

¹⁰ Watüjaa aaʼu wainmain tü kasa naainjüinjatkat na laülaashiikana. Nnojoliipejeʼe motuinjanain naaʼin na nawalayuukana.

NNOJOTSÜ KOʼUIN NUKUWAʼIPA JEʼWAA SÜMÜIN WAYUU

11, 12. (1) ¿Kasa naaʼinraka chi wayuu nnojoikai koʼuin akuwaʼipa sümüin wayuu? (2) ¿Kasa niiʼiyataka aka Jeʼwaa nnojoluin koʼuin nukuwaʼipa sümüin wayuu?

¹¹ Tü wanee nukuwaʼipakat Jeʼwaa shia nnojolin koʼuin nukuwaʼipa sümüin wayuu. ¿Kasa naaʼinraka chi wayuu nnojoikai koʼuin akuwaʼipa sümüin wayuu? Wanaawasü wayuu nümüin otta nnojotsü mojuin nünüiki süpülapünaa niʼraajüin shia. Niiʼiyatüin tia sükajee piamasü kasa: tü jülüjakat naaʼin süchiki wayuu otta tü naaʼinrakat sümüin. ¿Jamüsü choʼujaaka maʼin tia? Shia süpüla naaʼinrüinjatüin kasa anasü sümüin süpüshuaʼa wayuu sümaa nnojoluin koʼuin nukuwaʼipa sümüin. Saashin tü pütchi ashajünakat süka Griego, chi eekai nnojolin koʼuin nukuwaʼipa sümüin wayuu, nnojoishii nüneeküin na wayuukana sünainjee noʼupünaa (Aluw. 10:34). Shia jülüjaka naaʼin tü sukuwaʼipakat wayuu suulia tü kasa sümaʼanakat.

¹² Nia anaka süpüla washatüin akuwaʼipa Jeʼwaa süka nnojolin koʼuin nukuwaʼipa sümüin wayuu. Saashin tü Wiwüliakat nnojotsü koʼuin nukuwaʼipa Maleiwa sümüin wayuu. Niiʼiyatüin tia sükajee tü naaʼinrakat sümüin wayuu (paashajeʼera Aluwataaushikana 10:34, 35 otta Deuteronomio 10:17, NMa). Naainjüin tia Jeʼwaa nükalioʼu Moisés sümüin nüchonnii Zelofehad.

13, 14. (1) ¿Kasa alataka sümüin nüchonnii Zelofehad? (2) ¿Kasa niiʼiyataka aka Jeʼwaa nnojoluin koʼuin nukuwaʼipa sümüin wayuu?

¹³ Nalüʼütpa na israeliitakana süpüla nekerotuin suluʼumüin tü mma aapünajatkat namüin, nnojotsü aawanneein napüla jaʼraishii jieyuu tü mma nüpatsekat chi nashikai. Natüjaa saapünajatüin namüin tü mma nüpatsekat chi nashikai (Núm. 26:52-55). Saashin tü pütchi aapünakat nümüin Moisés, niainjachi kamüinka tü mmakat chi toolokoi. Shiasaʼa müin ouktüin neʼe Zelofehad sümaa machoin nia tooloyuu (Núm. 26:33). ¿Aapüneerü shia sümüin nüpüshi chi nashikai? ¿Saapünataajeetpa sümüin tü nüchonniikalüirua?

¹⁴ Antüsü tia jieyuukalüirua nümaʼanamüin Moisés sünain maa nümüin: «Ane jamüinjachi neʼe meʼraajuuka washi saʼaka nüpüshi sutuma machoin nia tooloyuu. Anashii kapatsere waya putuma wanaajiraa sümaa nüpüshi chi washikai». ¿Kasa naainjaka Moisés? Nnojoishi müin nia: «Nnojotsü kasain jüchuntüinjatüin süka lototujülüinya tü nuluwataakalü anain Maleiwa». Nüküja achikirü Moisés nümüin Jeʼwaa tü alatakat sümüin tü jieyuukalüirua (Núm. 27:2-5, NM). ¿Jamüsü nünüiki Jeʼwaa shiʼipajee tia? Müshi nia: «Lotusü sünüiki tü nüchonniikat Zelofehad. Anashii kapatsere naya putuma wanaajiraa sümaa nüpüshi chi wayuu kachonkai naya. Paawala namüin tü nüpatsekat chi nashikai». Sünainjee tü alatakat sümüin tia jieyuukalüirua, müshi Jeʼwaa nümüin Moisés: «Nünaajaale wanee wayuu sümaa machoin nia tooloyuu, jaapüinjatü tü nüpatsekat sümüin tü nüchonniikalüirua» (Núm. 27:6-8, NM; Jos. 17:1-6). Sülatüle tia piantua, atüjaanüitpa aaʼu jamüin nünüiki Jeʼwaa süchiki tü aainjünajatkat.

15. (1) ¿Kasa naainjaka Jeʼwaa namüin napüshuaʼa na aʼyataakana nümüin? (2) Püküja süchiki waneeirua aküjalaa eeʼiyataka nnojoluin koʼuin nukuwaʼipa Jeʼwaa sümüin wayuu.

¹⁵ ¡Shiimainjaʼaya maʼin nnojoluin koʼuin nukuwaʼipa Jeʼwaa sümaa kamaneein nia! Tü naainjakat Jeʼwaa sümüin tia jieyuu müliajachenka aaʼin, wanaawasü sümaa tü naainjakat napüleerua na wanee israeliita washinnuukana (Sal. 68:5). Shiiʼiyatüin tia, wanaawain tü naainjakat Jeʼwaa namüin napüshuaʼa na aʼyataakana nümüin. Nnojotsü koʼuin nukuwaʼipa sümüin wayuu (1 Sam. 16:1-13; Aluw. 10:30-35, 44-48).

WASHATA NUKUWAʼIPA JEʼWAA

16. Nnojotsü koʼuin nukuwaʼipa Jeʼwaa, ¿kasa waaʼinrajatka süpüla washatüin nukuwaʼipa?

¹⁶ ¿Kasa waaʼinrajatka süpüla washatüin nukuwaʼipa Jeʼwaa? Soto waaʼin eein piamasü kasa sünainpünaaka akuwaʼipaakat tia. Nnojoluinjatü koʼuin wakuwaʼipa otta weeʼiyatüinjatü shia sükajee tü jülüjakat waaʼin süchiki wayuu otta tü waainjakat sümüin. Anasü wamüin weʼraajünüle sünain nnojoluin koʼuin wakuwaʼipa sümüin wayuu. Akatsaʼa eein süpüla alin wamüin süküjünüle wamüin koʼuin wakuwaʼipa sümüin wayuu. ¿Kasa waaʼinrajatka watüjaweere saaʼu wanaawain wamüin wayuu süpüshuaʼa? Wanaa sümaa nütüjaweein aaʼu Jesuu jamüin sünüiki wayuu nüchiki yalapünaa, nüsakirüin na naʼaleewainkana: «¿Jarai taya saashin tü wayuukolüirua?» (Mat. 16:13, 14). Waainja tü naainjakat Jesuu, wasakira na shiimainkana waʼaleewain sünain weʼraajünüle sünain nnojoluin koʼuin wakuwaʼipa sümüin wayuu. ¿Kaseerü waainjaka nüküjüle wamüin chi waʼaleewainkai koʼuin wakuwaʼipa sümüin wayuu sutuma naatain weʼiruku, woumain otta tü watüjakalü apüleerua? Wachunta nümüin Jeʼwaa süpüla nnojoluinjatüin koʼuin wakuwaʼipa sümüin wayuu (Mat. 7:7; Col. 3:10, 11).

17. ¿Kasa weeʼiyataka aka nnojoluin koʼuin wakuwaʼipa sümüin wayuu?

¹⁷ Washatüin nukuwaʼipa Jeʼwaa wanaa sümaa wakaaliinjüin otta kojutüin watuma napüshuaʼa na wawalayuukana. Wounejaainjana napüshuaʼa na wawalayuukana; jaʼitairü naatain noumain woulia, mojuin naya, mooʼutshiin naya otta ouktüin naʼwayuuse (paashajeʼera Galacia 2:10 otta Santiago 1:27). Waküja pütchi sümüin wayuu süpüshuaʼa; nnojo koʼuin wakuwaʼipa sümüin wayuu naataka oumain. Talatsü maʼin waaʼin sutuma süshajünüin suluʼu 600 anüikii tü karaloukta weitajakat. ¡Shiimainjaʼaya maʼin nnojoluin koʼuin nukuwaʼipa Jeʼwaa sümüin wayuu!

18. ¿Kaseerü piiʼiyataka aka kojutüin pümüin kamaneein otta nnojoluin koʼuin nukuwaʼipa Jeʼwaa sümüin wayuu?

¹⁸ Jülüjüle waaʼin sünain kamaneein maʼin Jeʼwaa otta nnojoluin koʼuin nukuwaʼipa sümüin wayuu, kojutshi maʼin nia wamüin. Otta keeʼireesü waaʼin müinjatüin wakuwaʼipa namaa na wawalayuukana otta na wayuu waküjakana amüin pütchi.