PÜTCHI SÜNAINKA SÜTA TÜ REWIISÜTAKAT | ¿CHOʼUJAASÜCHE LOTUIN WAKUWAʼIPA?
¿Choʼujaasüche lotuin wakuwaʼipa?
Aʼyataapuʼushi Hitoshi sünain akumajaa tü karaloukta sünneetsemaajatkat wanee konpainyiia chaa Japón. Soʼu wanee kaʼi, nünaʼlaa amüinrü wanee sükaraloukse tü konpainyiiakat nümaa chi nülaamainkai. «Pukumaja sukuwaʼipa süpüla nnojoluinjatüin püshajüin tü shiimainkat sünain türa karalouktakat», müshi chi nülaamainkai Hitoshi nümüin. «Nnojo, anoujashi taya, nnojotsü süpüla taaʼinrüinjatüin tia», nümaka Hitoshi. «Tojuteechi pia suulia piʼyataain nnojorüle paaʼinrüin tü tamakat pümüin», nümaka chi nülaamainkai nümüin. Ojutünüshijeseʼe nia mapa suulia niʼyataain.
Mapa süchikijee tia, achajaashi nia aʼyatawaa. Akaisaʼa nüpüleeruaanüin aaʼin süpüla nüküjüinjachin alawaa eepünaale nuchuntüin aʼyatawaa, mojusüjeseʼe naaʼin sutuma tia. Soʼu wanee kaʼi, oʼunüshi Hitoshi sünain eʼrajawaa wanee aʼyatawaa, nüküjakaʼa nümüin chi wayuu naashajaakai amaa chayaa nnojoluin süpüla nüküjüin alawaa. «¿Kasakai wayuu pia nnojoika süpüla paaʼinrüin tia?», nümaka chia wayuukai nümüin. «Ayataʼaya müin pia lotuin pukuwaʼipa. Pünteerü anain wanee aʼyatawaa eekai anain», münüshi sutuma nüpüshi otta naʼaleewainyuu shiiʼiree natütüleʼerüin naaʼin. Anuu nünüiki Hitoshi: «¿Nnojottaaka anain taküjüle süchiki tü tanoujakalü anain?, maa müsü taaʼin taleʼeruʼu».
Sutuma tü alatakat nümüin Hitoshi, weʼrüin sünain wattain naalii na mojutkana amüin na lotokana akuwaʼipa sünain süpüshuaʼa kasa. «Wayakana aʼyataakana sünain oikkawaa jee ayaʼlajaa wanee kasa, nnojoleerü anain waʼyataain lotule wakuwaʼipa sünain süpüshuaʼa kasa», eeshii na makana anüikiya. Anuu sünüiki wanee wayuu chejeʼewat Sudáfrica: «Aküjülii alawaa napüshuaʼa na taʼyanaajiraakana amaa. Napüleerua aaʼinrü maʼin taya shiiʼiree tashatüin nakuwaʼipa».
Joutshii na alaayuukana sainküin mmakat süpüshuaʼa. Robert Feldman, nia wanee psicólogo aʼyataai suluʼu tü eʼikülee miyoʼu chakat Massachusetts. Nikirajaa anainrü nakuwaʼipa na aküjakana alawaa. Naashin niakai, sünainjee sien wayuu yootoka soʼu poloo minuuto, eesü aipirua shikii wayuu aküjaka alawaa. «Eeyaai weʼitaain sünain müin sukuwaʼipa tia. Nnojoliaasü aküjüin saʼalain wayuu weinshi waaʼinruʼu», müshi Robert Feldman. Nnojotsü jaralüin acheküin süküjünüin alawaa sümüin, ¿jamakaʼa joutka na alaayuukana?
¿Jamüshiiche nakooʼomüinraaka na keejiakana amüin aküjaa alawaa? ¿Jamüshiiche nakooʼomüinraaka na keejiakana amüin aʼluwajaa? ¿Jamüsüche sukuwaʼipa wayuu sainküin mmakat sutuma jouluin na nnojoliikana lotuin akuwaʼipa? ¿Kasaka waaʼinrüinjatüin suulia anajüin wamüin ashataa nakuwaʼipa?