Washata nakuwaʼipa na nünüikimaajanakana Maleiwa: Nahúm
1. ¿Kasa aashajaanaka achiki suluʼu tü karalouktakat Nahúm?
1 Shiʼnnüle süchikanain tü pueulokot Nínive, atüjaana aaʼu nüchekajüin Jeʼwaa neʼrala wayumüin na niʼipolokana maʼaka nüküjüin shia Nahúm. Nnojoishi eeichin wanee niʼipolo Maleiwa eekai ekaayaain nümaa (Nah. 1:2, 6). Wekirajaale sünain tü pütchi nüshajakat Nahúm, sükaaliinjeena waya süpüla watüjüin aküjaa pütchi.
2. ¿Kasa waashajaaka achiki wanaa sümaa waküjüin pütchi?
2 Waashajaa süchiki kasa anasü. Mayaainjeʼe saashajaanüin achiki suluʼu tü karalouktakat Nahúm sajaʼttinnüinjatüin Nínive, tü pueulo chajatkat Asiria (Nah. 1:1; 3:7). Eesü wanee pütchi atütüleʼeraka saaʼin tü nupueulosekat Jeʼwaa. «Amüliajüi wayuu» maluʼulu tü nünüliakat Nahúm. Nüküjüin Nahúm namüin na judíokana najaʼttinnüinjanain na neʼipolokona. Jee müsia nüküjüin müin Jeʼwaa maʼaka saaʼin wanee ounjulaayaa namüin na judíokana suʼunnaa müliaa (Nah. 1:7). Wanaa sümaa waküjüin pütchi, aashajaainjana waya süchiki kasa anasü sümaa waküjüin namüin na wayuukana nachajaainjachin Jeʼwaa (Nah. 1:15).
3. ¿Kasa waashajaainjatka achiki sümüin wayuu maʼaka naainjüin shia Nahúm?
3 Kayaawaseinjatü wanüiki sünain aküjaa pütchi. Eesü wanee kasa naainjaka Jeʼwaa: nüshajirüin Nahúm süchiki Tebas (No-amón) wanee pueulo chajatka Egipto, ajaʼttinnüsü shia natuma na asiriokana. Tia, süpülajatü sütüjaanüin aaʼu tü alatajatkat sümüin tü pueulokot Nínive (Nah. 3:8-10). Waashajaapa süchiki nükalia Maleiwa, waküjüinjatü süchiki tü pütchi ekeraajüitpakat suluʼujee tü Wiwüliakat süpüla sütüjaanüin aaʼu nikeraajüin Jeʼwaa süpüshuaʼa tü nümakat. Jamüsüjaʼa soʼu juyaka 632 süpülapünaa wakalia, aʼaleewajaashii na babiloniajeʼewaliikana namaa na medokana shikiira Nínive. Asetüsü tü süchikat Tigris sutuma shiʼitüin maʼin juya suʼunnaa tia. Sujuichijaaka süsepü Nínive otta sajaʼttinnaka. Ekeraajüsü süpüshuaʼa tü nümakat Jeʼwaa süchiki Nínive (Nah. 1:8; 2:6).
4. ¿Jamüsü pansaainjatka wanüiki sünain aküjaa pütchi?
4 Pansaainjatü wanüiki sünain aküjaa pütchi. Pansaasü sümaa anain maʼin süshajia tü pütchi suluʼukat tü karalouktakat Nahúm (Nah. 1:14; 3:1). Müshiʼiya wayakana, pansaainjatia wanüiki süpüla sütüjaanüin aaʼu kasain waashajaain achiki (1 Cor. 14:9). Wantapa shipialuʼumüin wayuu, waküja sümüin jamüin wantaka sümaʼanamüin. Otta müsia wakaaliinja na ekirajaakana sünain tü Wiwüliakat süpüla kanoulain maʼin naya nünain Jeʼwaa, kojutüin namüin tü Wiwüliakat otta süpüla neʼrüinjatüin aneerüin nakuwaʼipa naaʼinrüle tü nekirajaakalü anain (Roma 10:14, NM).
5. ¿Kasa watüjaaka aaʼu nüchiki Maleiwa sutuma tü nüshajakat Nahúm?
5 Nütüjaa aaʼu Nahúm sünain nikeraajüinjatüin Jeʼwaa tü nümakat. Atüjaana aaʼu müinya shia sünainjee tü karaloukta nünüliamaajatkat. Suʼunnaa waʼatapajüin sajaʼttinnüin tü kasakalüirua, amülialaasü waaʼin sutuma tü nümakat Jeʼwaa: «Müiria nnojoluin müliain wayuu piantua» (Nah. 1:9, NM).