¿Jamüsü joutka tü üttaakalü aaʼin?

Joutsü maʼin tü üttaakalü aaʼin sainküin mma. Süpüla watüjaain saaʼu jamüin makaʼa tia, wayaawatüinjatü aaʼu palajana kasain wayu tü üttaakalü aaʼin, jamakuwaʼipalüin üttüin saaʼin wayuu otta jamüin nakooʼomüinraakana na wayuu üttakana aaʼin.

¿Kasa wayu tü üttaakalü aaʼin?

Shia nülerajüle maʼin wanee wayuu na waneinnua otta nüʼleejüle maʼin naya sümaa suluʼuin shia naaʼin waneepia.

¿JAMAKUWAʼIPAT SÜPÜLA ÜTTÜIN NAAʼIN WANEE WAYUU?

Wainma kasa eeka süpüla üttüin atuma naaʼin wanee wayuu. Eeshii na üttakana aaʼin nanain na waneinnua sutumajee naatain nakuwaʼipa, nnojotsü shiain sutuma tü naaʼinrakat. «Wayuu kaainjarannuu, malasü shiairua», eeshiijaʼa namüle. Eesüjaʼa jülüjale naaʼin nayain kasirüin tü kasa mojusü alatakat. Otta eeshii na üttakana aaʼin nanain na waneinnua sutuma saainjünüin kasa mojusü namüin.

¿JAMÜSHII NAKOOʼOMÜINRAAKA NA ÜTTAKANA AAʼIN?

Eesü üttüle naaʼin wanee wayuu nünain wane mayaainjeʼe nnojoluin niʼraajüin nia. Eesüjaʼa nnojorüle anain tü jülüjakat naaʼin wanee wayuu nachiki waneinnua wayuu sutuma tü jülüjakat naaʼin naʼaleewainyuu jee nüpüshi. Sutuma tia wainma wayuu üttakana aaʼin sünain wayuu sutuma wanaawain neʼe tü jülüjakat naaʼin namaa na waneinnua.

Wayaawatüitpa aaʼu jamüin nakooʼomüinraakana maʼin na wayuu üttakana aaʼin. Süpüla wasünneʼerüin suluʼujee waaʼin tü üttaakalü aaʼin, watüjaainjatü aaʼu jamakuwaʼipalüin shia. Süküjeerü tia tü Bibliakat.

SÜKÜJAIN TÜ BIBLIAKAT JAMAKUWAʼIPALÜIN SHIA

Piamasü jatü leeyataka sümaa shiiʼiyatüin jamüin nakooʼomüinraakana na üttakana aaʼin. 1. Süküjünüin alawaa suluʼu redes sociales, suluʼu noticia otta natuma naʼaleewainyuu. 2. Nnojoluin neʼraajüin sukuwaʼipa wayuu, shiʼiruku wayuu otta sunoula wayuu. 3. Mmoluin saaʼujee shiiʼiratünüin kasa noumainpaʼa, süsütünüin kasa noulia otta tü alatajatkat. 4. Üttüin saaʼin wayuu nanain saalinjee sülerajüin naya, süʼleejüin naya otta mojulaain namüin.

NNOJOISHII NAYAIN NA WAYUUKANA ÜTTÜIN AAʼIN PALAJANA. Chi üttakai aaʼin palajana nia wanee aapiee chapuʼukai sirumatuʼu nümaa Maleiwa. Niʼrüijaapa wayumüin, uwomuyuushi nia. Satanás otta Yolujaa münüshi nia. Nia «kanainjeejachikaʼaya tü alawaakat» otta «niyouktüin tü shiimüinkat». Eesü mojulawaa nünainjee otta üttüsü saaʼin wayuu nutuma (Juan 8:44; 1 Juan 3:11, 12). Süküjain tü Bibliakat mojulaain maʼin nia otta jashichishaatain nia (Job 2:7; Alateetkat Mapeena [Apocalipsis] 12:9, 12, 17).

SUTUMA TÜ KAAINJALAAKAT EESÜ TÜ ÜTTAAKALÜ AAʼIN. Adán chi palajaikai wayuu, nüshatüin nukuwaʼipa Satanás. Sükajee tia, oʼttusü wayuu süpüshuaʼa sünain kaainjalaa sümaa nnojoluin lotuin maʼin nakuwaʼipa (Roma 5:12). Eejachi wanee nüchon Adán, Caín nünülia, nuʼuta aaʼinchi Abel, chi nimüliakai, sutuma üttüin naaʼin nünain (1 Juan 3:12). Aisü wayuu wapüla jee amülialaasü waaʼin naalin. Shiasaʼa sünainjee tü kaainjalaakat, eesü süpüla jülüjain saaʼin wayuu sukuwaʼipa neʼe sümüiwaʼa, kachumüralüin shia jee yaletüin saaʼin. Sutuma tia akooʼomüinraashii na üttakana aaʼin (2 Timoteo 3:1-5).

SÜKA MAMALAIN NÜMÜIN WANEE WAYUU NUKUWAʼIPA WANE, EESÜ SÜPÜLA ÜTTÜIN NAAʼIN NÜNAIN. Mojushaatasü sukuwaʼipa wayuu maaʼulu, aainjashii kasa mojusü namüin na waneinnua. Sünainjee tia, eesü tü üttaakalü aaʼin. Sutuma niain chi Yolujaakai aluwataain naaʼu na manoujainsaliikana, joutsü mojulawaa, müliashii atumawaa na wayuu naatakana akuwaʼipa otta oumain jee meeʼerapalashii naya (1 Juan 5:19).

Nnojotsü neʼe süküjain tü Bibliakat jamakuwaʼipalüin tü üttaakalü aaʼin, süküjainya kasain shipin.