¿Yapashiche pia süpüla saapünüin pümüin «tü mmakat»?
WAʼATAPAJASHAATAIN shikeraajüin tü nümatüjütkalia Jesús, tü makat: «Anakuwaʼipalii na wayuu anamiakana süka saapüneerüin tü mmakat namüin» (Mat. 5:5, TNM). Aapüneerü tü Mmakat namüin na anoujashii chainjanakana iipünaa naluwataapeena nümaa Jesús chejee iipünaajee (Alat. Map. 5:10; 20:6). Wainma na anoujashii aʼatapajakana saapünüin namüin tü Mmakat sümaa kepieenain naya waneepia suluʼu. Loteerü maʼin nakuwaʼipa, talateena maʼin naya otta jimateerü naaʼin. Süpüla shikeraajüin tia, acheküsü naaʼinrajatüin waneirua aʼyatawaa, maʼaka saaʼin tüü: paʼaraiisüinjatü tü Mmakat natuma, nakaalinjainjana na asoʼiraainjanakana aaʼin süpüla eeinjatüin namaʼana tü kasa choʼujaakat namüin otta nekirajüinjana naya. Wekirajaajeerü süchiki tia aʼyatawaakat sünain pütchikat tüü otta müsia tü waaʼinrajatkat maaʼulu süpüla sütüjaanüin aaʼu waaʼinreein tia suluʼu tü Paʼaraiisükat.
YAPA PIA SÜPÜLA PAʼARAIISÜINJATÜIN TÜ MMAKAT PUTUMA
«Anakaja [...] joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu», müshi Jehová namüin na wayuukana. Wayaawatüin sünainjee tia keeʼireein naaʼin Jehová paʼaraiisüinjatüin tü Mmakat (Gén. 1:28). Na kepiainjanakana suluʼu tü Paʼaraiisükat, naaʼinrüinjatü tü nüküjatüjütkalia Jehová. Süchikijeechon Armagedón, nnojoleerü paʼaraiisüin uwatuwoʼushi tü Mmakat, süka jamüin, yarüttüin maʼin shia natuma na wayuukana. Sutumajee tia, wainmeerü aʼyatawaa süpüla wuleinjatüin shia süchikuaʼa.
Tia meematsü aka saaʼin tü naaʼinrakat na israelitakana naleʼejapa chejee Babiloniajee chamüin noumainpaʼa. 70 juya nnojotka kepiain oʼu wayuu suluʼu tia mmakat. Eepejeʼe süpüla nakumajüin shia süchikuaʼa nükaalinjale naya Jehová. Anuu nünüiki Isaías: «Tü isashiipaʼakat meerü nutuma maʼaka saaʼin tü apainkat Edén otta tü patajatshiikat meerü aka saaʼin naʼapainse Jehová» (Is. 51:3). Nükaalinjain Jehová na israelitakana süpüla anainjatüin süchikuaʼa tü mma eepuʼule kepiain naya. Tia shia tü naaʼinrajatkat Jehová napüleerua na wayuu aapünüinjanakana amüin tü Mmakat süpüla paʼaraiisüinjatüin shia natuma. Eepejeʼe tü kasa eekat süpüla waaʼinrüin müinmaʼa yaa süpüla sütüjaanüin aaʼu waʼyataweein maʼin sünain tia.
Wanee sukuwaʼipa shia wulere watuma tü wepiapaʼakat jee pejepünaa sünain. Waaʼinrajatü tia jaʼitainna meisalain na wayuu kepiakana pejepünaa wanain. Eeshiijaʼa süpüla wakaalinjain sünain epitajaa tü Piichi Outkajaaleekat otta tü piichi eere saainjünüin tü outkajawaakat miyoʼu. Eerejeʼe süpüla, püküja namüin na laülaashiikana pükaalinjeein eere sülatüin kasa namüin na wawalayuukana. Waaʼinrüle tia, atüjaaneerü aaʼu wakaalinjeein na wayuu choʼujaakana amüin kaalinwaa. Püsakira paaʼin sünain tüü: «¿Eeshiche süpüla tekirajaain sünain waneirua kasa süpüla jaloulin taya mapeena nuuʼulaale taya Jehová kepiain suluʼu tü Paʼaraiisükat?».
YAPA PIA SÜPÜLA PÜKAALINJAIN NA ASOʼIRAAINJANAKANA AAʼIN
Nüsoʼirapa saaʼin Jesús tü nüchonkat Jairo, nüküjain choʼujaain saapünüin sümüin wanee kasachon shiyaaluʼu (Mar. 5:42, 43). Nnojotsü kapüleein akaalinjaa tia jintutkat. Jülüjapejeʼe waaʼin sükajee tia wainmeerüin aʼyatawaa nikeraajapa Jesús pütchikat tüü: «Süka sünteerüin wanee kaʼi naapeetka oʼu napüshuaʼa na wayuu outushiikana nünüiki chi Süchonkai Wayuu» (Juan 5:28, 29, TNM). Mayaainjeʼe nnojoluin süküjain tü Bibliakat tü kasa choʼujaweetkat namüin na asoʼiraainjanakana aaʼin, wayaawata aaʼu choʼujaajeerüin namüin eküülü, nepia otta nasheʼin. ¿Eesüche süpüla paaʼinrüin waneirua kasa maaʼulu süpüla sütüjaanüin aaʼu pükaalinjeein naya? Jülüja paaʼin pütchikalüirua tüü.
¿Kasa paaʼinrajatka süpüla sütüjaanüin aaʼu kepieein pia suluʼu tü Paʼaraiisükat?
Nülapalaapa waaʼu chi wawala alapalaaikai waaʼu, ¿wounejaainche nia sünain ekawaa wepialuʼu? Nujuʼitüle wanee wawala suluʼujee Weteet süpüla pürekutsoolin nia jee shiale kettaain nutuma wanee wawala tü niʼyataainkat sünain alapalawaa naaʼu na wawalayuukana, ¿eeshiiche süpüla wakaalinjain naya süpüla nousütüin anain wanee piichi nepiainjatka? Saainjünüinjatüle wanee outkajawaa miyoʼu jee shiale wanee outkajawaa miyoʼu anaka maʼin eere kepiain waya, ¿eeshiiche süpüla wakaalinjain sünain epitajaa tia piichikat süpülapünaa tü outkajawaakat jee süchikijee sajaʼttüin jee shiale wasaküin na wawalayuu antakana wattajee?
YAPA PIA SÜPÜLA PIKIRAJÜIN NA ASOʼIRAAINJANAKANA AAʼIN
Sünainjee tü sümakat Aluwataaushikana 24:15, wayaawata aaʼu wainmeenain na wayuu asoʼiraainjanakana aaʼin. Wainma na nnojoliikana eʼraajüin Jehová kataiwaʼaya noʼu. Eepejeʼe süpüla neʼraajüin nia nasoʼiraapa aaʼin suluʼu tü mma jeketükat.a Na kakaliainnakana aʼyataain nümüin Jehová sümaa waneepiain naya nümaa, aʼyataweena naya sünain ekirajaa naya wayuukana (Is. 11:9). Wanee wawala kanüliasü Charlotte shiʼree amüinrü süntüin tia kaʼikat. Aküjapuʼusü shia pütchi chaa Europa, Sudamérica otta müsia chaa África. Anuu sünüiki sümaa talatüin maʼin saaʼin: «Tekirajeein maʼin na asoʼiraainjanakana aaʼin. Taashajeʼerapa tü nüchikimaajatkat wanee wayuu nümaiwajachi, müsü taaʼin taleʼeruʼu: ‹Nnojotsüjeʼe müin nukuwaʼipa chia wayuukai niʼraajatüjüire Jehová›. Taküjeein maʼin nüchiki Jehová namüin na asoʼiraainjanakana aaʼin jee süchiki aneerüin maʼin nakuwaʼipa naʼyataale nümüin».
Jaʼitakajaʼa na wayuu aʼyataakana nümüin Jehová sümaiwa paala nnojoluiwaʼaya nüntüin Jesús yaa mmapaʼa, wainma kasa ekirajüneenaka anain naya. Anashaateerü maʼin wekirajapa Daniel süchiki tü pütchi nüküjatüjütkalia, tü nnojotkat niyaawatüin maʼin aaʼu (Dan. 12:8). Otta anashaateerü maʼin wakaalinjapa Rut sümaa Noemí süpüla nayaawatüin saaʼu niain chi Mesíaskai noʼutku na naikeyuukana. Anashaateerü maʼin tü waʼyataainkat sünain ekirajaa wayuu sainküinpünaa mmakat süpüshuaʼa. Otta anashaateerü süka nnojoleenain na wayuu eʼrüliikana wayumüin wamüin jee nnojoleerü eein tü kasa nnojotkat waaʼinmaain atuma waʼyataain nümüin Jehová.
¿Kasa paaʼinrajatka süpüla sütüjaanüin aaʼu pikirajeein maʼin wayuu suluʼu tü Paʼaraiisükat? Anasü püchajaale sukuwaʼipa süpüla pütüjain ekirajaa wayuu otta püküja pütchi semaanawai (Mat. 24:14). Mayaainjeʼe nnojolin püküjain pütchi maʼakaapuʼu paala sutuma laülaaichin pia jee sutuma waneirua kasa, atüjaaneerü aaʼu pikirajeein na wayuu asoʼiraainjanakana aaʼin ayatüle püküjain pütchi maaʼulu wanaapünaa sümaa pukuwaʼipa.
Anasü püsakirüle paaʼin sünain pütchikat tüü: ¿keeʼireesüche taaʼin kepiain taya suluʼu tü Paʼaraiisükat?, ¿keeʼireesüche maʼin taaʼin takaalinjain süpüla paʼaraiisüinjatüin tü Mmakat?, ¿takaalinjeeinche na wayuu asoʼiraainjanakana aaʼin sümaa tekirajeein naya nüchiki Maleiwa? Atüjaaneerü aaʼu yapain pia süpüla tia, piʼyataale maaʼulu sünain waneirua kasa aainjünüinjatka paʼaraiisüpa tü Mmakat.
a Paashajeʼera tü pütchikat «Wainma wayuu antinnakana süpüla lotuinjatüin nakuwaʼipa», ojuʼitaka suluʼu Aapiria Wayuu settienpüroʼu 2022.