Süsakiraka anain wayuu
Wanaa sümaa nüshajüin David nuʼwaajeechin Maleiwa süpüla kaʼikat süpüshuaʼa suluʼu Salmo 61:8, ¿shiache nüküjeeka achiki nnojoleechin outuin nia?
Nnojo, nnojotsü shiain nüküjeein achiki tia.
Anuu tü nüshajakat suluʼu tia wetsiikulokot otta suluʼu waneirua makalü aka saaʼin tia: «Shiimainshaana teeʼirajeechin pümüin süpüla kaʼikat süpüshuaʼa süpüla tekeraajüin tanüiki pümüin waneepia». «Tamaleiwasekai Jehová, taʼwaajüin pia süka süpüshuaʼa taaʼin. Taʼwaajeerü tü pünüliakat süpüla kaʼikat süpüshuaʼa» (Sal. 61:8; 86:12; 145:1, 2).
Soʼunnaa nüshajüin David tia pütchikat, nnojotsü jülüjain naaʼin nnojoleechin outuin nia. Nütüjaa aaʼu outeechin nia soʼu wanee kaʼi, jama outajatüin wayuu sünainjee saainjala. Otta nütüjaa aaʼu nüleʼeruʼuin süchiki kaainjalaa (Gén. 3:3, 17-19; Sal. 51:4, 5). Nütüjaa aaʼu outuin waneinnua wayuu anakana akuwaʼipa noʼuluʼu Jehová maʼaka naaʼin Abrahán, Isaac otta Jacob. Nütüjaakalaka saaʼu David outuinjachin nia (Sal. 37:25; 39:4). Tü nüküjeekalü achiki suluʼu Salmo 61:8 shia nuʼwaajeechin Maleiwa süpüla kaʼikat süpüshuaʼa sümaʼinruʼu katüin noʼu (2 Sam. 7:12).
Soʼutku tü nüshajakat David sünainpünaasü nukuwaʼipa maʼaka weʼrüin shia suluʼu sünülia Salmo 18, 51 otta 52. Nütüjaa aaʼu David tü naaʼinrakat wanee arüleejüi, jama nürüleejapuʼuin. Nüshajüinjeseʼe suluʼu Salmo 23 niain Jehová wanee arüleejüi süka nuʼunirüin wakuwaʼipa, naapüin anaa wamüin otta naaʼinmajüin waya. Müshijeseʼe niʼyataweein nümüin Maleiwa süpüla kaʼikat süpüshuaʼa (Sal. 23:6).
Sotuinjatü waaʼin niain Jehová kashajiralain David tü nümakat. Tü nüshajakat sünainpünaasü tü ekeraajüinjatkat watta kaʼi. Jamüsüjaʼa suluʼu Salmo 110 nüküjain David nüikalaainjachin chi Señotkai nikialuʼujee chi Maleiwakai chaa iipünaa jee saapüneerüin nümüin laülawaa. ¿Jamüsü saapünüinjatka nümüin tia? Tia süpülajatü süsalain naainjala nutuma na nüʼünüükana Maleiwa otta na sülaülashiikana mma. Nia David wanee nüpüshi chi Mesíaskai, chi aluwataainjachikai chaa iipünaa jee chi sacerdoteinjachikai süpüla kaʼikat süpüshuaʼa (Sal. 110:1-6). Naashin Jesús tü pütchi ashajünakat suluʼu Salmo 110 sünainpünaasü nukuwaʼipa otta ekeraajeerü shia mapeena (Mat. 22:41-45).
Niʼitaain Maleiwa nikiiruʼu David süpüla nüshajüin tü kaʼi kepiakalü oʼu nia otta süchiki tü alateetkat mapeena süsoʼireʼennapa naaʼin süchikijee outaa süpüla nuʼwaajüinjachin Jehová süpüla kaʼikat süpüshuaʼa. Wayaawata aaʼu sünainjee Salmo 37:10, 11, 29 shikeraajüin tia pütchikat nanain na israelitakana sümaiwa otta müsia ekeraajeerü tia nikeraajapa Jehová tü nümakat (paashajeʼera suluʼu rewiisütakat tüü tü pütchikat «Eejeechiaʼaya pia tamaa suluʼu tü Paʼaraiisükat», suluʼuka pütchi 8).
Wayaawata aaʼu sünainjee tü nüshajakat David suluʼu Salmo 61:8 otta suluʼu waneirua wetsiikulo, nuʼwaajeein Jehová chaa Israel sümaʼinruʼu katüin noʼu otta eein süpüla ayatüin naaʼinrüin tia süpüla kaʼikat süpüshuaʼa katapa noʼu nutuma Jehová.