2 | Puuʼulaa sümülialaiwa paaʼin tü sümakat tü Bibliakat

TÜ SÜMAKAT TÜ BIBLIAKAT: «Süpüshuaʼa tü pütchi ashajünakat sümaiwa paala, ashajünüsü süpüla wekirajünüinjanain sünain. Shia waʼatapajaka weʼrüinjanain kasa anasü sünainjee wachecherüin waaʼin otta sünainjee sümülialaain waaʼin sutuma tü sümakat tü Karaloʼuta Nüchikimaajatkat Maleiwa» (ROMA 15:4, TNM).

¿Jamaluʼulu tia?

Eesü pütchi suluʼujee tü Bibliakat amülialaka waaʼin otta akatchinraka waaʼin wanaa sümaa nnojoluin pansaain tü jülüjakat waaʼin. Watta kaʼi, nnojoleerü mojuin waaʼin piantua saashin tü Bibliakat.

¿Jamüsü jalouika wamüin tü sümakat?

Eesü kaʼi mojuwaika oʼu saaʼin wayuu jee shapaawaika oʼu saaʼin, eepejeʼe na ashutaʼaleekana aaʼu tia. ¿Jamüsü süpüla sümülialüin naaʼin tü sümakat tü Bibliakat?

Wainma pütchi suluʼu tü Bibliakat eeʼiranajeʼeraka waaʼin suulia jülüjakuʼu müin waaʼin kasa mojusü (Filipos 4:8). Sünainjee tia, eesü süpüla wachecherüin waaʼin suulia tü mojuukalü aaʼin (Salmo 94:18, 19).
Tü pütchi suluʼukat tü Bibliakat süchecherüin waaʼin suulia jülüjain waaʼin nnojoluin kasain anain apüla waya (Lucas 12:6, 7).
Aküjünüsü suluʼu tü Bibliakat eein Jehová namaa na mojukana aaʼin otta müsia niyaawata aaʼu jamüin waaʼin (Salmo 34:18; 1 Juan 3:19, 20).
Aküjünüsü suluʼu tü Bibliakat najaʼlajeʼerüinjatüin Maleiwa süpüshuaʼa tü kasa mojusü antajaaka wekiiruʼumüin jee mojuka atuma waaʼin (Isaías 65:17; Alateetkat Mapeena 21:4) Sümülialüin waaʼin tia pütchikat süpüla wachecherüin waaʼin suulia tü kasa mojukalü atuma waaʼin maaʼulu.

Jalouisü tü sümakat tü Bibliakat sümüin Jessica

Takuwaʼipa sutuma tü mojuukalü aaʼin

«Wanaa sümaa 25 touyase, eʼrajeʼetsü taya sutuma mmoluin taya waneepia. Süküjünaka tamüin shiain sutuma mojuin taaʼin waneepia (depresión grave münüsü tia alijunaikiruʼu). Antajaʼalaa müsü tamüin mojuu aaʼin sutuma jülüjain taaʼin tü kasa mojusü alatapuʼukat tamüin. Nnojotsü anain taya suluʼu tekii naashin na tottootkana. Saapünaka tamüin wunuʼu tasajüinjatka. Toʼunaka nümaʼanamüin wanee tottoot atüjakai süpüleerua nakuwaʼipa na mojukana aaʼin, nükaalinjaka taya süpüla tachecherüin taaʼin suulia jülüjain taaʼin waneepia kasa mojusü».

Jalouisü tamüin tü sümakat tü Bibliakat

«Sushutapa maʼin taaʼu tü mojuukalü aaʼin, mmotsü taya, shapaasü maʼin taaʼin otta matunkuinsat taya. Eesü ai eere süntajaain watta saalii kasa tekiiruʼu. Shapaapa maʼin saaʼin wayuu, nümülialüin saaʼin chi Maleiwakai suulia tü mojuukalü aaʼin maʼaka süküjain Salmo 94:19. Suluʼu takuatse eesü wanee Biblia otta wanee karaloʼutachon eere tashajüin tü wetsiikulo atütüleʼerakat taaʼin soʼunnaa mojuin taaʼin. Eesü matunkuinñeere taya, alatapejeʼe tia toulia taashajeʼerapa tü Bibliakat.

»Sütütülüin waaʼin tü sümakat tü Bibliakat süpüla nnojoluin jülüjain waaʼin tü kasa nnojotkat pansaain sümaa tü nümakat Maleiwa. Jamüsüjaʼa paala, tekiiruʼupuʼusü nnojoluin kasain anain apüla taya otta nnojoluin alin taya süpüla wayuu. Tayaawata aaʼu mapa nnojoluin pansaain tü jülüjakat taaʼin sümaa tü sümakat tü Bibliakat. Aküjünüsü yala niain chi Washi aikai apüla waya, amüliajakai waya jee kachipünaakai aaʼin wakuwaʼipa. Mapa, atüjasü taya süpüleerua tachecherüin taaʼin suulia tü kasa mojusü antajaakat tekiiruʼumüin. Tatüjaaitpa aaʼu kojutuin taya nümüin Maleiwa. Tia shia tü tayaawataka aaʼu palajana süpüla nnojoluinjatüin jülüjain taaʼin nnojoluin kasain anain apüla taya.

»Taʼatapajüin maʼin tü kaʼi nnojoluinjatkalü oʼu jülüjain waaʼin tü kasa mojusü alatapuʼukat wamüin otta nnojoleerüin antajaain wekiiruʼumüin wanee kasa mojeetka atuma waaʼin. Tatüjaa aaʼu nnojoleerüin eein wanee wayuu ayuuika mapeena sutuma tü kasa jülüjakat saaʼin. Sümaʼinruʼu taʼatapajüin tia kaʼikat, ayateeria tachecherüin taaʼin suulia mojuu aaʼin».