3 | Nachiki wayuu namaiwajana
AKÜJÜNÜSÜ SULUʼU TÜ BIBLIAKAT: Nachiki waneinnua wayuu wanaawakana akuwaʼipa wamaa (SANTIAGO 5:17, TNM).
¿Jamaluʼulu tia?
Aküjünüsü suluʼu tü Bibliakat nachiki waneinnua wayuu namaiwajana mojukana aaʼin, talatakana aaʼin jee jashichikana aaʼin sutuma tü alatakat namüin. Waashajeʼerapa tü nachikimaajatkat, eeshijaʼa eere waneeshia naʼakajee wanaawakai akuwaʼipa wamaa.
¿Jamüsü jalouika wamüin tü sümakat?
Choʼujaasü wamüin wapüshuaʼa wamüliajünüin aaʼin, shialeekajaʼa nnojoliire anain waya suluʼu wekii. Waashajeʼerapa suluʼujee tü Bibliakat tü nachikimaajatkat na wayuu namaiwajanakana, eesü süpüla wayaawatüin saaʼu wanaawain tü wakuwaʼipakat namaa süchiki jamapuʼuin naaʼin jee süchiki tü jülüjapuʼukat naaʼin. Suluʼujee tia, sümülialeerü waaʼin süka nnojoliin wayain neʼe wamüiwaʼa shapaain maʼin aaʼin jee mojuin maʼin aaʼin.
Aküjünüsü suluʼu tü Bibliakat nachiki waneinnua wayuu outeekana aaʼin jee mojukana maʼin aaʼin. «Mepisai taya, anakajaʼa outule taya», eeshii na makana aaʼin. Mapuʼusü naaʼin Moisés, Elías otta David (Números 11:14; 1 Reyes 19:4; Salmo 55:4).
Aküjünüsü suluʼu tü Bibliakat süchiki wanee wayuu kanüliasü Ana. Mojushaatasü saaʼin sutuma maralüin shia otta sutuma mojulaain wanee wayuu sümüin, suturaain shia waneepia (1 Samuel 1:6, 10).
Aashajaasü tü Bibliakat nüchiki wanee wayuu kanüliashi Job, eesü süpüla wanaawain tü jülüjakat waaʼin sümaa tü jülüjakat naaʼin. «Nnojoluitpa taaʼin sünain katüin toʼu sutuma mojuin maʼin tü takuwaʼipakat», müshi nia mayaainjeʼe niain wanee wayuu kanoulakai maʼin (Job 7:16).
Naya wayuukana nountuin nasünneʼerüin tü kasa mojusü nekiiruʼujutkat. Müshiʼiya wayakana, eesü süpüla wountuin wasünneʼerüin tü kasa mojusü wekiiruʼukat washatüle nakuwaʼipa.