27 Upéi ou Zelofehad rajykuéra.+ Zelofehad hína Manasés trivugua, Héfer raʼy, Galaad raʼy, Makir raʼy, Manasés raʼy, ha Manasés hína José raʼy. Zelofehad rajykuéra héra: Mahlá, Noá, Hoglá, Milcá ha Tirzá. 2 Haʼekuéra ou Moisés ha Eleazar pe saserdóte rendápe, umi kuimbaʼe omoakãva+ umi héntepe, ha avei enterove israelita rendápe pe tavernákulo* entrádape, ha heʼi hikuái: 3 “Ore ru ningo omano vaʼekue pe desiértope, péro haʼe noĩri kuri Coré ha iñirũnguéra+ apytépe opuʼãrõ guare hikuái Jehováre. Haʼe nomanói vaʼekue ijapytepekuéra, síno omano ipekadokuérente. Péro haʼe ndaitaʼýrai vaʼekue. 4 Upéicharõ, ¿opa reíta piko ore túa réra ihentekuéra apytégui ndaitaʼýrai haguérente? Upévare, pemeʼẽna oréve ore yvyrã ore túa ermanokuéra apytépe”. 5 Upémarõ Moisés oho omombeʼu Jehovápe+ mbaʼépa heʼi koʼã kuñataĩ.

6 Ha Jehová heʼi Moiséspe: 7 “Oĩ porã hína Zelofehad rajykuéra heʼíva. Remeʼẽ vaʼerã katuete chupekuéra ijyvyrã, pe yvy otokáva itúape iñermanokuéra apytépe. Ha remoĩ vaʼerã iñakãrekuéra pe itúa yvy.+