Jeremías
33 Jehová oñeʼẽ jey Jeremíaspe 2 veseha, oĩ aja gueteri préso pe Guárdia Korapýpe,+ ha heʼi chupe: 2 “Péicha heʼi Jehová pe yvy Apohare, Jehová hína upe ojapo vaʼekue pe yvy ha omopyenda porã vaʼekue, haʼe héra hína Jehová, ha haʼe heʼi: 3 ‘Cherenói ha che akontestáta ndéve, ha pyaʼe porã amombeʼúta ndéve umi mbaʼe ndetuichapa jepéva ha noñentendéiva ha nde ni ndereikuaáiva’”.+
4 “Pórke péicha heʼi Israel Jára Jehová umi óga oĩvare ko siudápe ha umi rréi de Judá palasiokuéra ojeitypa vaʼekuére, umíva ojeitypa vaʼekue oñedefende hag̃ua hikuái pe rrámpa oñemopuʼã vaʼekuégui ojeataka hag̃ua pe siuda, ha umi iñenemígo espádagui,+ 5 ha péicha heʼi avei umi kuimbaʼe ou vaʼekuére oñorairõ hag̃ua umi caldeo kóntrape, umíva reʼongue omyenyhẽta umi óga, pórke che voi ahundi umívape chepochy ha arrenegaiterei rupi, ha iñañaiterei rupi umi hénte che aheja rei ko siuda. 6 Péro koʼág̃a péicha heʼi Ñandejára ko siudáre: ‘Che rupive ojerrekuperáta,+ amongueráta chupe ha hesãi jeýta. Ha ameʼẽta chupekuéra tuicha pyʼaguapy ha oikóta hikuái trankílo porã.+ 7 Ha agueru jeýta umi ojegueraha vaʼekuépe prisionéroramo Judágui ha umi ojegueraha vaʼekuépe prisionéroramo Israélgui,+ ha amombarete jeýta chupekuéra oĩ haguéicha voi iñepyrũme.+ 8 Aperdonáta kompletoite ipekadokuéra ha umi mbaʼe vai ojapo vaʼekue che kóntrape,+ ha péicha ipotĩta hikuái.+ 9 Ko siuda chembovyʼáta ahendu vove héra, ha entéro umi nasión ko yvy ape arigua chemombaʼeguasúta ha chembotuicháta ohendu vove umi mbaʼe porã ajapo vaʼekue che puévlore.+ Ha okyhyjéta ha oryrýita hikuái+ ohendúvo ameʼẽ hague ko siudápe heta mbaʼe porã ha pyʼaguapy’”.+
10 “Péicha heʼi Jehová: ‘Ko lugár peẽ pejévare hína haʼeha peteĩ desiérto ndaiporihápe hénte ni animál, ha ndaiporiha mbaʼeve Judá siudakuérape ha Jerusalén kallekuérare, ni hénte ni animál ni avave oikóva pype, upépe oñehendu jeýta 11 umi osapukáiva vyʼágui ha umi ovyʼaitereíva,+ pe nóvio ha pe nóvia ñeʼẽ, ha oñehendúta avei umi heʼívape: “¡Peagradese Jehovápe, umi ehérsito yvagapegua ruvichápe, pórke Jehová ivuenoiterei,+ haʼe siémpre oporohayhueterei!”’.*+
‘Umi hénte oguerúta che rógape umi ofrénda oagradese hag̃ua chéve, Jehovápe,+ pórke che agueru jeýta umi ojegueraha vaʼekuépe ijyvýgui prisionéroramo. Haʼekuéra oiko jeýta yma guaréicha’, heʼi Jehová”.
12 “Péicha heʼi Jehová, umi ehérsito yvagapegua ruvicha: ‘Ko lugár opytávape nandi vera, ndaiporihápe yvypóra ni animál ha entéro umi isiudakuérape, oĩ jeýta umi pastoty pyahu umi pastorkuéra omombytuʼu hag̃ua ijovechakuéra’.+
13 ‘Umi siuda oĩvape montañaháre, umi siuda oĩvape umi yvy ivahovehápe, ha umi siuda oĩvape sur gotyo, Benjamín territóriope, Jerusalén jerére,+ ha umi siuda de Judápe+ umi pastór okonta jeýta umi ijovechakuéra’, heʼi Jehová”.
14 “Jehová heʼi: ‘Og̃uahẽta hína umi día, che akumplitahápe pe promésa porãite ajapo vaʼekue Israel ha Judá rogayguápe.+ 15 Upe tiémpope aiporavóta David familiare*+ apytégui peteĩ ihústova. Haʼe ojapóta umi mbaʼe oĩ porãva ha ojapóta hustísia ko yvy ape ári.+ 16 Upe tiémpope Judá ojesalváta,+ ha Jerusalén oikóta pyʼaguapýpe ha ndokyhyjemoʼãi.+ Ha kóicha oñehenóita chupe: Jehová Rupive Jareko Hustísia’”.+
17 “Pórke péicha heʼi Jehová: ‘Siémpre oĩta David familiare oguapy vaʼerã Israel trónope,+ 18 ha umi saserdóte levita apytégui siémpre oĩta che renondépe peteĩ kuimbaʼe ojapo hag̃ua ofrénda ojehapypaitéva, ohapy hag̃ua umi ofrénda de semílla ha ojapo hag̃ua sakrifísio’”.
19 Ha Jehová oñeʼẽ jey Jeremíaspe, ha heʼi: 20 “Péicha heʼi Jehová: ‘Peẽ ikatúramo pehundi pe kompromíso arekóva pe ára ha pe pyharéndi, ha pejoko pe día ha pe pyhare ani hag̃ua og̃uahẽ itiempoitépe,+ 21 upéicharõ añoite ikatúta oñehundi pe kompromíso arekóva che siérvo David ndive,+ ha péicha haʼe ndorekomoʼãvéima peteĩ itaʼýra ogoverna vaʼerã itrónope rréiramo,+ ha upéicha avei oikóta pe kompromíso arekóvare umi saserdóte levítandi, haʼekuéra che siérvo hína.+ 22 Ha ndaikatuiháicha oñekonta opa mbaʼe oĩva yvágape ha umi yvykuʼi oĩva pe márpe, upéicha avei ambohetáta che siérvo David familiare ha umi levita cheservíva hína’”.
23 Ha Jehová oñeʼẽ jey Jeremíaspe, ha heʼi: 24 “¿Nerehendúi piko umi mbaʼe heʼíva ko puévlo? Haʼekuéra heʼi hína: ‘Jehová orrechasáta umi mokõi família oiporavo vaʼekuépe’. Péicha haʼekuéra ndorrespetái che puévlope, ha ndohechavéima chupekuéra peteĩ nasiónramo.
25 Péicha heʼi Jehová: ‘Che arekoháicha pe kompromíso pe ára ha pe pyharéndi,+ ha amoĩháicha umi léi* yvága ha yvýpe,+ 26 upéicha avei arakaʼeve ndarrechasamoʼãi Jacob ha che siérvo David familiarépe, ha aiporavóta ifamiliare apytégui umi ogovernátava Abrahán, Isaac ha Jacob familiarépe. Pórke che ningo agueru jeýta umi ojegueraha vaʼekuépe prisionéroramo+ ha aiporiahuverekóta chupekuéra’”.+