2 Samuel
1 David ogana rire umi amalequítape opyta Ziclágpe+ 2 día, upérõ guare Saúl omanóma kuri. 2 Al ótro día oho David rendápe peteĩ soldádo oĩ vaʼekue Saúl kampaméntope. Haʼe omondoro ijao ha omoĩ yvykuʼi iñakãre, og̃uahẽvo David rendápe oñesũ ha oñakãityete henondépe.
3 Ha David oporandu chupe: “¿Moõgui piko reju?”. Haʼe okontesta chupe: “Che akañy ha aju umi israelita kampaméntogui”. 4 David oporandu chupe: “¿Mbaʼe piko oiko pe gerrahápe? Emombeʼúna chéve”. Pe kuimbaʼe heʼi: “Umi soldádo israelita odiparapa ha heta oĩ omanóva. Saúl ha itaʼýra Jonatán jepe omano”.+ 5 Upémarõ David oporandu pe mitãkariaʼýpe: “¿Mbaʼéicha reikuaa Saúl ha itaʼýra Jonatán omano hague?”. 6 Pe mitãkariaʼy heʼi: “Che aime kuri Sérro Guilbóape+ ha upépe oĩ Saúl, ahecha apenaite ojejoko pe ilánsare. Umi soldádo opersegi oúvo chupe kárrope ha kavaju ári, ha haimetéma ohupyty chupe.+ 7 Upéi Saúl cherecha ha cherenói, upémarõ haʼe chupe: ‘¿Mbaʼe reipota ajapo?’. 8 Ha haʼe oporandu chéve: ‘¿Máva piko nde hína?’. Ha akontesta chupe: ‘Che hína peteĩ amalequita’.+ 9 Upémarõ heʼi chéve: ‘Chejukána, pórke aĩ vaietereíma, amano asy hína koʼápe’. 10 Ha che ajapo la heʼíva chéve ha ajuka chupe.+ Haʼe ja oĩ vaietéma kuri ha aikuaáma voi ndojesalvamoʼãiha. Upéi, aipeʼa chugui ikoróna, ha pe adórno orekóva ijyváre ha agueru ndéve che ruvicha”.
11 Upémarõ David ojagarra omondoro ijao, ha enterove umi kuimbaʼe omoirũva chupe ojapo avei upéicha. 12 Haʼekuéra hasẽ, ojaheʼo ha oajuna,+ kaʼaruete peve. Ombyasyeterei ningo omano haguére Saúl ha Jonatán. Hasẽ hikuái Jehová puévlore, hetaiterei israelita omano haguére+ espádape.
13 David oporandu pe mitãkariaʼýpe: “¿Mávaiko nde? ¿Nde piko mbaʼe vallegua?”. Haʼe heʼi chupe: “Che túa ningo peteĩ amalequita, haʼe hína peteĩ extranhéro oikóva Israélpe”. 14 Ha David heʼi chupe: “¿Mbaʼéichaiko nderekyhyjéi rejuka hag̃ua Jehová elehídope?”.*+ 15 Upémarõ David ohenói peteĩ kuimbaʼépe ha heʼi chupe: “Eju koʼápe ha ejuka ñandéve kóvape”. Upémarõ haʼe ojuka chupe.+ 16 David heʼi: “Nde ere kuri rejuka hague Jehová elehídope, upévare nde kúlpare voi remano,* pórke nde juru nekondena”.+
17 Upémarõ David oñepyrũ opurahéi peteĩ músika jaheʼo Saúl ha Jonatán omano haguére.+ 18 Ha heʼi Judá puévlo oaprende vaʼerãha pe músika. Pe purahéi héra: “Pe Árko”. Ko músika oĩ hína pe lívro héravape Jasar,+ ha heʼi kóicha:
19 “Israel, emañamína mbaʼéichapa omano gerrahápe umi kuimbaʼe ipoderosoite vaʼekue,
ndaiporivéima umi omoporã vaʼekue nde siuda, opyta ojepyso pe sérrore.+
20 Ani peho pemombeʼu siuda de Gátpe+
ha ani peikuaauka Asquelón kállere,
ani hag̃ua ovyʼa umi filisteo rajykuéra,
pono umi kuña filistea* oĩ vyʼapópe.
Umi eskúdo oipurúva umi kuimbaʼe ipoderosoitéva hoʼa upépe, ha oñekontamina.
Saúl eskúdo ningo oñembovera asy vaʼekue aséitepe,
péro koʼág̃a ja ndaiporivéima.
22 Jonatán árko ha flécha ndojavýi vaʼekue,+ Saúl espáda núnka ndofallái.
Pe árko ha espáda ojuka umi gerréro ipoderósovape,
umíva ojekuvri iñenemigokuéra ruguýpe.+
23 Umi hénte ohayhu vaʼekue Saúl ha Jonatánpe oikove aja entéro.+
Omanoite peve mokõivéva oĩ vaʼekue oñondive.+
Umi ágila pyaʼe oveve, péro Saúl ha Jonatán ipyaʼeve vaʼekue chuguikuéra.+
Umi león ipoderóso, péro haʼekuéra imbareteve vaʼekue chuguikuéra.+
24 Peẽ kuñanguéra Israelgua, penerasẽkena Saúl rehe,
haʼe omeʼẽ vaʼekue peẽme ao pytã asy iporã ha overapáva,
orekóva adórno de óro.
25 Israel, emañamína mbaʼéichapa omano umi kuimbaʼe ipoderosoite vaʼekue,
Jonatán retekue opyta umi sérrore.+
26 Jonatán, che ermáno, añembyasyete ningo nderehe.
Chéngo rohayhueterei,+ pe mborayhu ñande ñañandúva imbareteterei,
chéve g̃uarã iporãve vaʼekue kuñanguéra mborayhúgui.+
27 Israel, emañamína mbaʼéichapa omano umi kuimbaʼe ipoderosoite vaʼekue.
Ha umi árma ojepuru vaʼekue gerrahápe opytapa rei upérupi”.