Números
9 Jehová oñeʼẽ Moiséspe pe desiérto de Sinaípe, pe primer mes+ del segundo áño osẽ rire hikuái Egíptogui, ha heʼi chupe: 2 “Umi israelita omboarete vaʼerã pe Páskua*+ itiempoitépe.+ 3 Hiʼaraitépe oprepara vaʼerã hikuái, ko méspe, pe día 14 kaʼaruete pytũ mboyve.* Haʼekuéra ojapo vaʼerã pe léi heʼiháicha ha oprepara vaʼerã ojejapoháicha jepi voi”.+
4 Upémarõ Moisés heʼi umi israelítape omboarete hag̃ua pe Páskua. 5 Ha haʼekuéra oprepara pe Páskua pe desiérto de Sinaípe, pe día 14 del primer mes kaʼaruete pytũ mboyve. Umi israelita ojapo Jehová heʼi hagueichaite Moiséspe.
6 Upérõ oĩ unos kuánto kuimbaʼe opyta vaʼekue ikyʼa Ñandejára renondépe opoko rupi peteĩ teʼonguére,+ upévare upe díape ndaikatúi vaʼekue oprepara hikuái pe Páskua. Upémarõ upe díape koʼã kuimbaʼe oho Moisés ha Aarón rendápe,+ 7 ha heʼi Moiséspe: “Ore ningo orekyʼa Ñandejára renondépe, pórke ropoko kuri peteĩ teʼonguére. ¿Mbaʼére piko upe haguére noñepermitimoʼãi oréve romeʼẽ itiempoitépe Jehovápe ore ofrénda umi ótro israelítaicha?”.+ 8 Upémarõ Moisés heʼi chupekuéra: “Pecheraʼarõ koʼápe, ha aháta aporandumi Jehovápe aikuaa hag̃ua mbaʼépa ikatu ojejapo pende kásope”.+
9 Upémarõ Jehová heʼi Moiséspe: 10 “Ere umi israelítape: ‘Oĩramo jepe pende apytépe térã pene familiare apytépe peteĩ kuimbaʼe opytáva ikyʼa Ñandejára renondépe opokóvo peteĩ teʼonguére,+ térã ohóva mombyry peteĩ viáhepe, haʼe lomímonte omboarete vaʼerã pe Páskua Jehovápe g̃uarã. 11 Haʼekuéra oprepara vaʼerã pe Páskua pe día 14 del segundo mes,+ kaʼaruete pytũ mboyve. Upévandi hoʼu vaʼerã hikuái pan ilevaduraʼỹva ha verdúra iróva.+ 12 Noñongatúi vaʼerã hikuái mbaʼevete al ótro día peve,+ ha nomopẽi vaʼerã avei ni peteĩ hendápe pe animál kanguekue.+ Haʼekuéra oprepara vaʼerã pe Páskua pe léi heʼiháicha. 13 Péro peteĩ kuimbaʼe ipotĩramo ha ndohói de viáhe mamove ha ndopreparái pe Páskua, upéicharõ ojejuka vaʼerã upe kuimbaʼépe,+ pórke haʼe nopresentái Jehovápe pe ofrénda itiempoitépe. Upe kuimbaʼe opaga vaʼerã hembiapo vaikuére.
14 Oikóramo pende apytépe peteĩ extranhéro, haʼe oprepara vaʼerã avei pe Páskua Jehovápe g̃uarã.+ Ojapo vaʼerã pe léi heʼiháicha, ha oprepara vaʼerã ojejapoháicha jepi voi.+ Peteĩ léinte oĩta umi israelita ha extranherokuérape g̃uarã’”.+
15 Pe día oñemopuʼãrõ guare pe tavernákulo,+ peteĩ arai ojahoʼi pe tavernákulo oĩháme pe Árka del Pákto,* péro kaʼarupytũ katu opyta hiʼári peteĩ tatarendy koʼẽmba peve.+ 16 Pe arai siémpre oĩ vaʼekue de diakue pe tavernákulo ári ha pe tatarendy katu siémpre oĩ pyharekue.+ 17 Pe arai ojupi jave pe tavernákulo árigui, umi israelita ensegída osẽ oho,+ ha pe arai opytahápe, upépe omoĩ hikuái ikampaménto.+ 18 Jehová heʼi vove umi israelítape oho hag̃ua, haʼekuéra osẽ oho, ha Jehová heʼi jave chupekuéra opyta hag̃ua, haʼekuéra opyta upépe.+ Pe arai opyta aja entéro pe tavernákulo ári, haʼekuéra opyta ikampaméntope. 19 Pe arai opytáramo heta día pe tavernákulo ári, umi israelita iñeʼẽrendu Jehovápe ha ndohói upégui.+ 20 Sapyʼánte pe arai opyta unos kuánto día pe tavernákulo ári. Jehová heʼi vove chupekuéra oho hag̃ua, haʼekuéra osẽ oho, ha Jehová heʼi jave chupekuéra opyta hag̃ua, haʼekuéra opyta upépe. 21 Sapyʼánte katu pe arai opyta sapyʼamínte, kaʼaruete guive pyhareve pevénte. Ha pe arai ojupívo, haʼekuéra osẽ oho. Tahaʼe de diakue térã pyharekue, pe arai ojupi vove haʼekuéra osẽ oho.+ 22 Tahaʼe jepe 2 día, un mes térã hetave tiémpo opytáramo pe arai pe tavernákulo ári, upe aja entéro umi israelita opyta ikampaméntope ha ndohói upégui. Péro pe arai ojupi jave katu osẽ oho hikuái. 23 Péicha Jehová heʼi jave umi israelítape oho hag̃ua, haʼekuéra osẽ oho, ha Jehová heʼi jave chupekuéra opyta hag̃ua, haʼekuéra opyta. Umi israelita iñeʼẽrendu Jehovápe, ha ojapo hikuái Jehová heʼíva Moisés rupive.