Job
41 “¿Ikatúta piko nde reipuru peteĩ pinda reguenohẽ hag̃ua peteĩ jakare?*+
Térã, ¿ikatúne piko remosã ijurúgui rejoko hag̃ua chupe?
2 ¿Eñanimáta piko remosã chupe itĩgui,
térã remosaingo chupe hañykãgui peteĩ gánchore?
3 ¿Haʼe piko oñeʼẽta ndéve amávlemente,
térã ojeruréta ndéve reiporiahuverekomi hag̃ua chupe?
4 ¿Ikatúta piko rejapo hendive peteĩ kompromíso
ndeservi hag̃ua pára siémpre?
5 ¿Rehugáta piko hendive rehugaháicha peteĩ guyraʼi ndive?
Térã, ¿remosãta piko chupe ohuga hag̃ua hendive nde rajykuéra?
6 ¿Onegosiáta piko hese umi peskadór,
térã ombojaʼóta piko hikuái ovende hag̃ua?
8 Epokomína hese ha rehecháta mbaʼeichaitépa oñemoĩ nderehe.
Upéi siémpre nemanduʼáta upévare ha nderejapomoʼãvéima arakaʼeve.
9 Repensa reíta ningo rejagarra chupe.
Remaña haguénte hese rekyhyjétama chugui.
10 Avave noñanimái ombopochy pe jakarépe.
Upéicharõ, ¿máva piko oñanimáta oñemoĩ cherehe?+
11 ¿Máva piko omeʼẽ chéve álgo che apaga jey hag̃ua chupe?+
Opa mbaʼe oĩva ko yvy ape ári ningo chembaʼénte voi.+
12 Koʼág̃a añeʼẽta pe jakare retymáre,
ha mbaʼéichapa imbarete ha pe hete ojejapo porãiterei.
13 Pe ipire ningo haʼete peteĩ ao omoʼãva chupe,
¿máva piko ikatu oipeʼa chugui? ¿Máva piko oñanimáta opoko ijurúre?
14 Umi hãi ningo oporomongyhyjeterei, ojurupeʼávo haʼete voi peteĩ okẽ guasu ojeavríva.
¿Reñanimáta piko reho reavri upe okẽ?
15 Pe ilómore haʼete orekóva pira platakue ojapáva ojuehe,
upéva oprotehe chupe peteĩ eskúdoicha.
16 Naipaʼũi ni peteĩ hendápe,
ha ni yvytu ndoikéi hese.
17 Ojoaju porãiterei ningo ojuehe.
Ndaipóri oipeʼa vaʼerã ojuehegui.
18 Opoívo y itĩrupi, pe kuarahy ojope pe ýre ha omimbipa.
Hesa rendy katu ojogua kuarahýpe koʼẽ jave.
19 Ijurúgui haʼete osẽva tatarendy
araveráicha omimbipáva.
20 Ipytuhẽvo otimbo pe itĩ,
haʼete peteĩ tatakua hakuetereíva.*
21 Ipytúpe ombojepota umi karvón,
ha ijurúgui opoi tatarendy.
22 Pe ijajúra imbarete porã,
ha oimeraẽ ohecháva chupe opyta okyhyjeterei.
23 Pe hye pire hatã ha imbarete,
haʼete iérro.
24 Ikorasõ katu hatã peteĩ itáicha,
haʼete pe ita ojepurúva oñemonguʼi hag̃ua semillakuéra.
25 Haʼe opuʼãvo, umi iñenemígo imbaretevéva jepe okyhyje.
Enterovénte oryrýi osusũ haʼe oñemonguʼévo ápe ha pépe.
26 Ndaipóri ipuʼaka vaʼerã hese,
tahaʼe lánsa, flécha térã oimeraẽ ótro árma.+
27 Chupe g̃uarã pe iérro haʼete kapiʼi reínte,
ha pe kóvre katu yvyra tujukue.
28 Umi flécha nomondýiri voi chupe,
umi ita ojepoíva hese, chupe g̃uarã haʼete ñana pirukue.
29 Umi garróte katu chupe g̃uarã haʼete kapiʼínte,
ha pe lánsa opararãnte ombetívo ijapére, ha ni nomokyrỹiri chupe.
30 Pe hye pire ikorócho, haʼete kambuchi jekakue haimbepáva.
Haʼe ohóvo pe tujúre haʼete peteĩ tavlón ojepurúva oñemopotĩ hag̃ua semílla.+
31 Oikévo pe márpe pe y hyjuipa,
haʼete voi peteĩ ólla opupuhápe aséite.
32 Haʼe oikévo pe rríope oikytĩ ohóvo pe y,
ha hapykuere hyjúi morotĩ asy, haʼete umi akãrangue morotĩ.
33 Ndaipóri mbaʼeve ko yvy apére ikatúva ñakompara hese.
Haʼe peteĩ animál ndokyhyjéiva mbaʼevetégui.
34 Haʼe ningo peteĩ rréi umi ótro animál apytépe.
Ni umi animál imbaretevéva nomongyhyjéi ni nomboguevíri chupe”.