2 Reyes
7 Upéi Eliseo heʼi: “Pehendu mbaʼépa heʼi Jehová. Kóicha heʼi Jehová: ‘Koʼẽrõ koʼã órape Samaria rokẽme,* 1 sea* arína iporãvéva ovaléta 11,4 grámo de pláta,* ha 2 sea* seváda ovaléta 11,4 grámo de pláta’”.*+ 2 Upépe pe rréi ajudánte de konfiánsa heʼi Ñandejára siérvope: “Ni Jehová oavríramo pe yvága rokẽ, ndoikoichéne upéva”.+ Upépe Eliseo heʼi chupe: “Ndete rehecháta ág̃a,+ péro ndereʼumoʼãi mbaʼeve upévagui”.+
3 Oĩ vaʼekue 4 kuimbaʼe iléprava oguapýva pe siuda rokẽ entrádape,+ ha heʼi hikuái ojupe: “¿Mbaʼére piko japyta vaʼerã jaguapy koʼápe ñamano meve? 4 Jaháramo jaike pe siudápe oĩ aja ñembyahýi guasu upépe,+ katuete ñamanóta pe siudápe. Ha japytárõ jaguapy koʼápe, ñamanótante avei. Péro jaháramo umi sirio kampaméntope, ikatu mbaʼe nañandejukái hikuái, ha jasegíta jaikove, péro ñandejukáramo, tañamano upéicharõ”. 5 Upémarõ opuʼã hikuái kaʼaruete pytũmbýrupi ha oho oike hag̃ua umi sirio kampaméntope. Ha og̃uahẽ mbotávo pe kampaméntope, ndaiporivéima avavete upépe.
6 Jehová ningo ohenduka kuri umi sirio kampaméntope ku ourõguáicha peteĩ ehérsito tuichaitereíva, ohendu hikuái umi kárro de gérra ha umi kavaju ryapu.+ Upévare heʼi hikuái ojupe: “¡Pe rréi de Israel opaga raʼe umi rréi hitita ha umi rréi de Egíptope ou hag̃ua ñandéve!”. 7 Ha upepete haʼekuéra opuʼã odipara pe kaʼaruete pytũmbýrupi, ha ohejapa umi hóga karpakuéra, umi ikavaju, hymba vúrro, ha entéro mbaʼe oreko vaʼekue pe kampaméntope, ha odipara hikuái ani hag̃ua omano.*
8 Umi lepróso og̃uahẽrõ guare pe kampaméntope, oike peteĩ óga kárpape ha oñemoĩ okaru ha omokõ hikuái. Upéi ogueraha upégui pláta, óro ha ao, ha oho oñongatu hikuái. Upéi haʼekuéra ou jey ha oikéma ótro óga kárpape ha ogueraha avei upégui heta mbaʼe ha oho jey oñongatu.
9 Upéi hasypeve heʼi hikuái ojupe: “Noĩporãi ningo ko jajapóva hína. ¡Ñamombeʼu vaʼerã ko notísia porãite! Pórke ñamakaneáramo ha ñahaʼarõ koʼẽmba pota peve, katuete jajekastigáta. Jaha katu koʼág̃a ñamombeʼu pe rréi palásiope”. 10 Upémarõ oho hikuái ha ohenói umi guárdia oñangarekóvape okẽre ha omombeʼu chupekuéra: “Roho ningo roike umi sirio kampaméntope, péro avavete ndaipóri, norohendúi voi mbaʼevete upépe. Umi kavaju ha hymba vurrokuéra oñeñapytĩ vaʼekuénte oĩ upépe, ha umi hóga karpakuéra katu oĩ ojeheja hagueichaiténte”. 11 Ha pyaʼe porã umi guárdia oñangarekóva okẽre osapukái ha omombeʼu upéva umi héntepe pe rréi palásiope.
12 Upepete pe rréi opuʼã upe pyharépe ha heʼi ikonseherokuérape: “Haʼemíta peẽme mbaʼépa umi sirio okalkula hína ojapo. Haʼekuéra oikuaa ñande ñaneñembyahyipamaha,+ ha upévare oheja hikuái pe kampaménto ha oho okañy pe ñúre, ha heʼi: ‘Osẽta hína hikuái pe siudágui ha jajagarráta chupekuéra ha jaikéta pe siudápe’”.+ 13 Upémarõ peteĩva umi ikonsehéro heʼi chupe: “Tojeporavóna unos kuánto kuimbaʼe ha togueraha 5 kavaju umi hembývagui pe siudápe. Chupekuéra ningo ohaʼarõ la mísma kósa ohaʼarõva umi israelita hembývape koʼápe. Pórke haʼekuéra ohóramo térã opytáramo, lomímonte omanóta umi ótro israelítaicha. Upévare ñamondóna chupekuéra ha jahecha mbaʼépa oiko”. 14 Upémarõ umi kuimbaʼe ojagarra ogueraha mokõi kárro de gérra kavaju reheve, ha pe rréi omondo chupekuéra umi sirio kampaméntope, ha heʼi: “Tapeho pehecha”. 15 Haʼekuéra oho Jordán peve hapykuerikuéra, ha pe tape pukukuére ohecha hikuái atyraite ao ha tembiporu umi sirio omombopa vaʼekue odiparárõ guare oñemondýi rupi. Upéi umi kuimbaʼe ou jey ha omombeʼu pe rréipe la ohecha vaʼekue.
16 Upémarõ pe puévlo osẽ ha oguerahapaite entéro mbaʼe oĩ vaʼekue umi sirio kampaméntope, ha péicha 1 sea* arína iporãvéva ovale 11,4 grámo de pláta,* ha 2 sea* seváda ovale 11,4 grámo de pláta,* heʼi haguéicha Jehová.+ 17 Pe rréi omoĩ kuri iñajudánte de konfiánsape oñenkarga hag̃ua pe siuda rokẽre, péro umi hénte ohasapa hiʼári pe entrádape ha ojuka chupe. Oiko Ñandejára siérvo heʼi hagueichaite pe rréipe ohórõ guare hendápe. 18 Koʼã mbaʼe oiko Ñandejára siérvo heʼi hagueichaite pe rréipe: “Koʼẽrõ koʼã órape Samaria rokẽme, 1 sea* arína iporãvéva ovaléta 11,4 grámo de pláta,* ha 2 sea* seváda ovaléta 11,4 grámo de pláta”.*+ 19 Péro pe ajudánte heʼi kuri Ñandejára siérvope: “Ni Jehová oavríramo pe yvága rokẽ, ndoikoichéne upéva”. Ha upépe Eliseo heʼi kuri chupe: “Ndete rehecháta ág̃a, péro ndereʼumoʼãi mbaʼeve upévagui”. 20 Ha upeichaite oiko, pórke umi hénte ohasakuévo pe okẽrupi opyrũmbaite hese ojuka peve chupe.