AGEO

1 Pe segundo áño ogoverna haguépe rréi Darío,* pe sexto méspe, pe primer día upe méspe, Jehová oñeʼẽ proféta Ageo*+ rupive pe governadór de Judá Zorobabélpe,+ haʼéva Sealtiel raʼy, ha pe súmo saserdóte Josuépe, haʼéva Jehozadac raʼy. Ha Ageo heʼi:

2 “Péicha heʼi Ñandejára Jehová, umi ehérsito yvagapegua ruvicha: ‘Koʼã hénte ningo heʼi hína: “Nog̃uahẽiti pe tiémpo oñemopuʼã* hag̃ua Jehová róga”’”.*+

3 Jehová oñeʼẽ jey proféta Agéope+ ha heʼi: 4 “¿Koʼág̃a piko hína pe tiémpo peẽ peiko hag̃ua umi óga porã porãme,* péro che róga katu oñembyaipa?+ 5 Jehová, umi ehérsito yvagapegua ruvicha, heʼi péicha: ‘Pepensa porãkena* umi mbaʼe pejapóvare hína. 6 Peẽ peñotỹ heta semílla, péro saʼieterei pekosecha.+ Peẽ pekaru péro napeneryg̃uatãi, peʼu víno péro ndapeʼúi peʼuseha peve. Pemonde pende ao, péro lomímonte penderoʼy. Ha upe ombaʼapóva katu omoĩ isuéldo peteĩ vosaʼi ikuapávape’”.

7 “Péicha heʼi Jehová, umi ehérsito yvagapegua ruvicha: ‘Pepensa porãkena* umi mbaʼe pejapóvare hína’.

8 ‘Pejupi pe montáñape ha pegueru umi yvyra+ ha pemopuʼã che róga,+ ikatu hag̃uáicha aguerohory upe óga ha oĩ hag̃ua chemombaʼeguasúva’,+ heʼi Jehová”.

9 “‘Peẽ ningo peipotaiterei kuri osẽ porã peẽme la pende kosécha, péro saʼieterei pekosecha. Ha peguerúrõ guare upéva pende rógape, che aipeju ha ambovevepaite pendehegui.+ ¿Mbaʼérepa oiko upéva?’, heʼi Jehová, umi ehérsito yvagapegua ruvicha. ‘Pórke che róga oñembyaipa hína, ha peẽ katu káda uno peiko ápe ha pépe peñangareko pende rógare.+ 10 Upévare pe yvága oñemboty ha ndokyvéi, ha pe yvy ndoprodusivéi mbaʼeve. 11 Ha amondo peteĩ sekía pende kokuépe ha umi montáñape, upéicha rupi ndaiporivéi trígo, víno pyahu, aséite ni kóga. Peẽ ha umi pene rymbakuéra pehasa asy hína, ha reiete pembaʼapo jejopy’”.

12 Zorobabel+ haʼéva Sealtiel+ raʼy, Josué pe súmo saserdóte haʼéva Jehozadac+ raʼy, ha kompletoite umi ótra hénte pe puevlopegua iñeʼẽrendu Ijára Jehovápe, ha ohendu proféta Ageo heʼi vaʼekue, pórke Ijára Jehová omondo kuri chupe. Ha pe puévlo oñepyrũ okyhyje ha orrespeta Ijára Jehovápe.

13 Upémarõ Ageo, haʼéva Jehová mensahéro, okumpli pe traváho Jehová omeʼẽ vaʼekue chupe ha omeʼẽ ko mensáhe umi héntepe, ha heʼi: “Jehová heʼi: ‘Che aime penendive’”.+

14 Upémarõ Jehová opoko pe governadór de Judá Zorobabel+ korasõre,+ haʼéva Sealtiel raʼy, ha pe súmo saserdóte Josué+ korasõre, haʼéva Jehozadac raʼy, ha avei opoko umi ótra hénte pe puevlopegua korasõre, ha ou hikuái ha oñepyrũ ombaʼapo Ijára Jehová rógare, haʼéva umi ehérsito yvagapegua ruvicha.+ 15 Haʼekuéra oñepyrũ pe día 24, pe sexto méspe, pe segundo áño ogoverna haguépe rréi Darío.+

2 Pe día 21 pe séptimo méspe, Jehová oñeʼẽ proféta Ageo+ rupive ha heʼi: 2 “Eporandumína pe governadór de Judá+ Zorobabélpe,+ haʼéva Sealtiel raʼy, ha pe súmo saserdóte Josuépe,+ haʼéva Jehozadac+ raʼy, ha umi ótra héntepe: 3 ‘¿Mávapa pende apytépe ohecha rakaʼe ko óga* omimbi ha ojajaipárõ guare?+ ¿Ha mbaʼéichapa pehecha koʼág̃a ko óga? ¿Peẽ piko pepensa ndahaʼeieteha voi mbaʼeve oñembojojáramo pe ymave guarére?’.+

4 ‘Péro koʼág̃a Zorobabel, nembaretéke’, heʼi Jehová, ‘ha nembaretékena nde avei súmo saserdóte Josué, haʼéva Jehozadac raʼy’.

‘Ha penembaretékena enterove peẽ hénte peikóva ko lugárpe+ ha pembaʼapo’, heʼi Jehová.

‘Pórke che aime penendive’,+ heʼi Jehová, umi ehérsito yvagapegua ruvicha. 5 ‘Penemanduʼákena upe mbaʼe apromete vaʼekuére peẽme pesẽrõ guare Egíptogui,+ ha koʼág̃a peve che pogia gueteri che podér rupive.*+ Aníkena pekyhyje’”.+

6 “Pórke péicha heʼi Jehová, umi ehérsito yvagapegua ruvicha: ‘Koʼẽrõitéma ambokacha jeýta pe yvága ha yvy, pe mar ha pe yvy isékova’.+

7 ‘Ha ambokacháta kompletoite umi tetãnguéra, ha umi mbaʼe iporãva* oĩva entéro tetãme oikéta ko ógape,+ ha amomimbíta ha ambojajaipáta ko óga’,+ heʼi Jehová, umi ehérsito yvagapegua ruvicha.

8 ‘Pe pláta ningo chembaʼe, ha pe óro chembaʼénte avei’, heʼi Jehová, umi ehérsito yvagapegua ruvicha.

9 ‘Ko óga pyahu ojajái ha omimbivéta pe óga ymave guarégui’,+ heʼi Jehová, umi ehérsito yvagapegua ruvicha.

‘Ha ko lugárpe amoĩta pyʼaguapy’,+ heʼi Jehová, umi ehérsito yvagapegua ruvicha”.

10 Pe día 24, pe noveno méspe, pe segundo áño ogoverna haguépe Darío, Jehová oñeʼẽ proféta Agéope+ ha heʼi: 11 “Péicha heʼi Jehová, umi ehérsito yvagapegua ruvicha: ‘Eporandumína umi saserdótepe mbaʼépa heʼi pe léi:+ 12 “Peteĩ kuimbaʼe ogueraháramo soʼo sagrádova ijao ruguáipe, ha pe ijao ojáramo pan rehe térã tembiʼúre térã vínore térã aséitere térã oimehaichagua hiʼupýre, ¿opytáta piko avei sagrádo umi mbaʼe?”’”.

Umi saserdóte ombohovái: “¡Nahániri!”.

13 Upémarõ Ageo oporandu: “Ha peteĩ persóna ikyʼáva opoko vaʼekue peteĩ teʼonguére* ojáramo oimeraẽ koʼã mbaʼére, ¿opytáta piko avei ikyʼa umi mbaʼe?”.+

Umi saserdóte heʼi: “Ikyʼáta”.

14 Upémarõ Ageo heʼi: “‘Péicha avei ko puévlo, ha péicha hína ko nasión che renondépe’, heʼi Jehová, ‘ha péicha hína entéro mbaʼe ojapóva hikuái, oimeraẽ mbaʼe oguerúva hikuái sakrifísioramo ikyʼa hína’.

15 ‘Péro koʼág̃a, koestedía guive peñatende porãmína* ko mbaʼére: pepensamína umi mbaʼe oiko vaʼekuére oñepyrũ mboyve oñemopuʼã jey Jehová témplo,+ 16 ¿mbaʼéichapa rakaʼe upérõ? Oĩ jave peteĩ ohóva oĩháme peteĩ trígo atýra ha oguerahase 20 vosa trígo, otopa oĩha 10 vosánte. Ha oĩramo peteĩ ohóva pe lugár oñepyrũháme umi parrál rehe ha oguerahase 50 hárra víno, otopa oĩha 20 hárrante.+ 17 Che ahundi kuri entéro mbaʼe pejapóva. Amondo peẽme yvytu aku, amandáu ha pende kogakuérape vícho,+ péro ni peteĩ pende apytégui ndojevýi che rendápe’, heʼi Jehová.

18 ‘Peñatende porãmína* ko mbaʼe oikótavare koestedía guive, pe día 24 guive, pe noveno méspe, pe oñemoĩha día guive Jehová témplo simiénto.+ Peñatende porãkena ko mbaʼére: 19 ¿oĩ gueteri piko semílla pe depósitope?*+ Pe parrál, pe ígo, pe granáda ha pe olívo ningo ndahiʼái gueteri, ¿ajépa? Péro koestedía guive che povendesíta’”.+

20 Upéi Jehová oñeʼẽ jey Agéope 2 veseha pe día 24 upe méspe,+ ha heʼi chupe: 21 “Ere pe governadór de Judá Zorobabélpe: ‘Ambokacháta pe yvága ha yvy.+ 22 Ahundíta umi rréino ha aipeʼáta pe podér umi tetãnguéra goviérnogui,+ ha ahundíta katuete pe kárro de gérra ha umi ohóvape pype, ha umi kavaju omanombáta ha umi hiʼarigua katu ojojukapáta espádape’”.+

23 “‘Upe díape’, heʼi Jehová, umi ehérsito yvagapegua ruvicha, ‘ajevaléta nderehe che siérvo Zorobabel,+ haʼéva Sealtiel+ raʼy’, heʼi Jehová, ‘ha ajapóta ndehegui peteĩ kuãirũ iporãitereíva, pórke ndéve che roiporavóma’, heʼi Jehová, umi ehérsito yvagapegua ruvicha”.