SEGUNDA KÁRTA A LOS CORINTIOS

1 Che ningo Pablo, ha Ñandejára oipotágui ajeporavo vaʼekue aservi hag̃ua Cristo Jesús apóstolramo. Che ha ñane ermáno Timoteo+ romondo ko kárta pe kongregasión oĩva Coríntope, ha avei entéro umi ermáno* oĩvape Acáyape.+

2 Aipotaite Ñandejára, haʼéva ñande Ru, ha aipota avei ñande Ruvicha Jesucristo, taimbaʼeporãite penendive* ha tomeʼẽ peẽme pyʼaguapy.

3 Toñembotuicha Ñandejárape, haʼéva ñande Ruvicha Jesucristo+ Túa. Haʼe ningo peteĩ Túa ñanderayhúva ha ñandeporiahuverekóva,+ ha peteĩ Dios omeʼẽva konsuélo+ umi héntepe ohasáva opaichagua situasión vaíre. 4 Haʼe ñanekonsola* jahasa jave opaichagua provlémare.*+ Péicha pe konsuélo jarresivíva Ñandejáragui+ ikatu jaipuru ñakonsola hag̃ua+ avei umi ohasávape opaichagua provlémare.* 5 Ñande ningo Cristo segidór ha upéicha rupi heta jasufri,+ péro avei Cristo rupive jarresivi tuichaiterei konsuélo. 6 Upéicharõ, ore rohasa jave peteĩ provlémare,* upéva penekonsola ha pendesalva. Ha ore rorresivírõ konsuélo upéva penekonsola avei, ha upe konsuélo penepytyvõ peaguanta hag̃ua umi sufrimiénto ore rohasáva avei. 7 Ore rojerovia penderehe ha upéva nokambiamoʼãi ni mbaʼevéicharõ, pórke ore roikuaa avei peẽ pesufriha ore rosufriháicha, ha perresivitaha pe konsuélo ore rorresivíva avei.+

8 Roipota peikuaa ermanokuéra mbaʼéichapa rohasa asy roimérõ guare Asia* distrítope.+ Rohasa heta mbaʼe ijetuʼuetereíva oréve, añetehápe orejehegui rei ndaikatumoʼãi kuri roaguanta umi mbaʼe, ore ropensáma voi ikatuha romano.+ 9 Añetehápe ore roʼéma voi kuri romanotaha. Péro upe oiko vaʼekue oremboʼe ani hag̃ua rojerovia orejehe síno Ñandejárare,+ haʼe hína pe omopuʼãva umi omano vaʼekuépe. 10 Haimetéma ningo romano ha upe situasión ivaietévagui Ñandejára oresalva, ha haʼe oresalva jeýta. Ore rojerovia haʼe osegitaha oresalva.+ 11 Peẽ ikatu avei orepytyvõ pejerure asývo orerehe pene ñemboʼépe.+ Oĩrõ heta oñemboʼéva, ore rorresivíta pe ajúda peẽ pejeruréva oréve g̃uarã. Ha upe rire heta avei oĩta la oñemboʼéva oagradese hag̃ua Ñandejárape upe ojapo vaʼekuére.+

12 Ore roĩ orgullóso pórke ore konsiénsia ipotĩ. Ore orerekopotĩ ha roiko tovamokõiʼỹre ko múndope, ha koʼýte pende apytépe. Ore norodependéi pe arandu oĩvare ko múndope,+ síno rodepende Ñandejárare pórke haʼe imbaʼeporãiterei orendive. 13 Ore roskrivi peẽme umi mbaʼe ifásilva ojelee ha oñentende hag̃ua. Ha ajerovia peẽ pesegitaha pentendepaite koʼã mbaʼe. 14 Unos kuánto pende apytépe ontendéma voi koʼã mbaʼe, oĩ ontendémava peẽ ikatuha peĩ orgullóso ore rojapóvare, ha upéicha avei ore roĩta orgullóso pendereheve ñande Ruvicha Jesús díape.

15 Péicha ajeroviágui penderehe, ahase jey kuri pene rendápe, pevyʼa hag̃ua 2 veseha. 16 Che idéa kuri aha povisita ahakuévo Macedóniape, ha ajukuévo upégui apytase jey kuri penendive, ha upe rire peho hag̃ua chendive tapekuʼa peve aviahávo Judéape.+ 17 Apensárõ guare ajapo upéva, ndahaʼéi añeʼẽmba reíva. Ha napensái avei ajapóvo chejehegui reínte, ha ndaʼéi: “Si, katuete ajapóta”, péro upéi: “No, ndajapomoʼãi”. 18 Ikatuháicha jajerovia Ñandejárare, ikatu avei peguerovia siertoha umi mbaʼe roʼéva peẽme. Roʼéramo: “Si”, norokambiamoʼãi ha upéi roʼe jey: “No”. 19 Silvano,* Timoteo+ ha che roñeʼẽ kuri peẽme Ñandejára Raʼy Jesucristo rehe. Haʼe ndeʼíri primerorã: “Si”, ha upe rire: “No”, síno haʼe heʼírõ: “Si”, upéva nokambiái. 20 Entéro mbaʼe Ñandejára oprometéva oñekumpli* Jesús rupive.+ Upévare hérape avei jaʼe Ñandejárape: “Amén”,* ñambotuicha hag̃ua Ñandejárape.+ 21 Ñandejára hína upe ñandeporavo* vaʼekue, ha haʼe voi ogaranti peẽ ha ore haʼeha Cristo mbaʼe.+ 22 Haʼe omoĩ avei iséllo ñanderehe,+ pe séllo hína pe espíritu sánto oĩva ñane korasõme.+ Péva peteĩ garantía haʼe okumplitaha umi mbaʼe porã oprometéva.

23 Che ndahái Coríntope ani hag̃ua peñeñandu vaive che káusare. Ha che rekovére* ahura peẽme siertoha la haʼéva, ha aipota Ñandejára osẽ chéve de testígo. 24 Che ningo ndaʼéi ore romandaha pende jeroviáre,+ upéva rangue ore rombaʼapo pende ykére roipotágui peẽ pevyʼa. Peẽ ningo pejerovia, upévare pesegi pejepytaso mbarete.

2 Che haʼéma kuri ág̃a aha jey vove pene rendápe, ndaipotaiha mbaʼeve penemoñeñandu vai. 2 Che káusare enterove peẽ peñembyasýramo, ¿máva piko upéicharõ hembyve chembovyʼa hag̃ua? 3 Che askrivi kuri peẽme ani hag̃ua ág̃a aha vove añembyasy pende káusare, síno avyʼa hag̃ua. Che ajerovia peẽme penembovyʼaha umi mbaʼe chéve chembovyʼáva. 4 Che ningo ajepyʼapyeterei ha añembyasy che korasõite guive, upévare askrivi peẽme che resay che rováre.+ Ndajapói upéva aipotágui peñembyasy, síno peikuaa hag̃ua mbaʼeichaitépa pohayhu.

5 Oiméramo oĩ algúno penemoñeñandu vaíva,+ ndahaʼéi chéve la nachembovyʼáiva, síno enterove peẽme. Aikuaa algúnore ojapo vaive hague ko mbaʼe, péro ndaikoséi ambopukueterei ko téma. 6 Peẽ pekorrehíma pe kuimbaʼe opeka vaʼekuépe ha ja ovaléma upéva. 7 Koʼág̃a katu peẽ pyʼaporãme peperdona vaʼerã pe kuimbaʼépe, ha pekonsola chupe.+ Ani ág̃a oñembyasyetereígui oñentrega.+ 8 Upévare ajerure asy peẽme peipytyvõ hag̃ua upe kuimbaʼépe ohechakuaa hag̃ua pehayhuha chupe.+ 9 Ha upévare avei askrivi kuri peẽme, aikuaa hag̃ua pehechaukátapa peneñeʼẽrenduha entéro mbaʼépe. 10 Upe peẽ peperdonávape, che avei aperdona. Añetehápe che aperdona jave peteĩ mbaʼe (oimérõ aperdona raʼe peteĩ mbaʼe), ajapo ideprovécho hag̃ua peẽme, ha ajapo upéva Cristo renondépe. 11 Tekotevẽ ñaperdona ani hag̃ua Satanás ipuʼaka ñanderehe.*+ Ñande ningo jaikuaa porãiterei umi mbaʼe* haʼe oipurúva ñanemoñuhã hag̃ua.+

12 Che ag̃uahẽrõ guare Tróaspe+ aikuaauka hag̃ua umi notísia porã oñeʼẽva Crístore, oñepresenta kuri chéve peteĩ oportunida* ajapove hag̃ua ñande Ruvicha servísiope. 13 Upérõ che ajepyʼapyeterei* ndajuhúi haguére che ermáno Títope.+ Upévare ajedespedi umi ermánogui ha aha Macedonia+ gotyo.

14 Jaagradese Ñandejárape, haʼe ningo ñandegia ñamoirũ hag̃ua Crístope. Jajogua umi soldádo ofestehávape oúvo ogana rire peteĩ gérra. Ñandejára ojevale ñanderehe ojekuaa hag̃ua chupe oparupiete, upéva haʼete peteĩ perfúme hyakuã asýva ha opárupi oñehetũva. 15 Ñande ñañeʼẽva Crístore ñaneryakuã asy peteĩ perfúmeicha Ñandejárape g̃uarã. Ko perfúme ohetũ umi ojesalvátava ha umi oñehundítava. 16 Umi oñehundítavape g̃uarã hyakuã vai ha ohechauka chupekuéra omanotaha.+ Umi ojesalvátavape g̃uarã katu hyakuã porã ha ohechauka chupekuéra oikovetaha. ¿Ha mávapa ikatupyry ojapo hag̃ua koʼã traváho? 17 Ñande ningo ikatu jajapo upe traváho, pórke ndajaikói jakovra ñande rapichápe Ñandejára ñeʼẽre,+ ojapoháicha heta persóna. Ñande Ñandejára enviádo hína ha ñamoirũ Crístope. Ñande japredika pórke jajapose upéva, ha jajapo ko traváho Ñandejára renondépe.

3 ¿Tekotevẽ piko roñepresenta jey peẽme? ¿Tekotevẽ piko roskrivi kárta roñeʼẽ porã hag̃ua orejehe umi hénte ojapoháicha? ¿Térã piko roikotevẽ peẽ peskrivi kárta peñeʼẽ hag̃ua orerehe? No, natekotevẽi. 2 Peẽ voi haʼe ore kárta+ ojeskrivíva ore korasõme, ko kárta oikuaa ha olee entéro umi hénte. 3 Ojekuaa porãiterei peẽ haʼeha peteĩ kárta oúva Crístogui, ore voi roskrivi vaʼekue ore servísio rupive.+ Péro ndoroipurúi tínta, síno Ñandejára oikovéva espíritu, ha ndoroskrivíri itáre,+ síno pene korasõre.+

4 Cristo rupive ore rojerovia Ñandejára omoĩha ore kárgope ko servísio. 5 Ore ningo noropensái orekatupyryha orejehegui reínte rojapo hag̃ua ko servísio, Ñandejára hína upe orepytyvõva rokumpli hag̃ua ore servísio.+ 6 Haʼe orembokatupyry roservi hag̃ua pe kompromíso pyahúpe.+ Ore ndoroservíri pe léipe,+ síno roheja pe espíritu sánto oregia. Pe léi ningo ñanekondena ñamano hag̃ua,+ Ñandejára espíritu katu ñanemoingove.+

7 Pe léi ñanekondenáva ñamano hag̃ua ojeskrivi vaʼekue mokõi itáre,+ ha umíva overa ha omimbipa vaʼekue. Upévare umi israelita ndaikatúi vaʼekue omaña Moisés rováre pórke omimbipa voi.+ Péro nomimbimoʼãi kuri pára siémpre. 8 Pe léi oñemeʼẽ vaʼekue omimbipa vaʼekue, upéicharõ koʼýte umi mbaʼe ojejapóva pe espíritu+ rupive omimbivéta.+ 9 Pe léi okondenáva+ umi héntepe omimbipáramo,+ koʼýte upéicharõ tuichave omimbíta pe tembiapo oipytyvõva umi héntepe ihústo hag̃ua.+ 10 Añetehápe pe léi omimbipáva ndahaʼéi mbaʼevete ñakomparárõ pe kompromíso pyahu omimbi lájare.+ 11 Pe léi oñehundítarõ jepe, omimbi vaʼekue,+ koʼýte upéicharõ pe kompromíso pyahu tuichave omimbíta pórke opytáta pára siémpre.+

12 Jaguereko rupi upe esperánsa+ ñande ndajakyhyjéi ñañeʼẽ hag̃ua. 13 Ha ndajajapói Moisés ojapo haguéicha, haʼe okuvri vaʼekue hova peteĩ páñope,+ ani hag̃ua umi israelita ohecha mbaʼéichapa omimbi pe léi upe rire opátava. 14 Péro haʼekuéra ndaikatúi vaʼekue ontende.+ Ha koʼag̃aite peve haʼete okuvríva chupekuéra peteĩ páño+ ha ndaikatúi ontende pe kompromíso yma guare. Pe páño ikatu ojepeʼa jajeroviárõ Cristo rehe añoite.+ 15 Añetehápe, umi hénte korasõ+ ojekuvri peteĩ páñope koʼag̃aite peve, upévare ndaikatúi ontende umi mbaʼe Moisés oskrivi vaʼekue.+ 16 Péro oĩramo okambiáva ha ou jeýva oadora Jehovápe* upe páño ojepeʼa.+ 17 Jehová* hína pe Espíritu,+ ha oĩháme Jehová* espíritu sánto, oĩ liverta.+ 18 Ñande ndajaguerekovéima pe páño okuvríva ñande rova, upévare peteĩ espéhoicha jahechauka mbaʼeichaitépa Jehová* omimbi. Ñande ñakambia jahávo jajoguave hag̃ua Ñandejárape, ha jahechauka porãve hag̃ua mbaʼeichaitépa haʼe omimbi. Jajapo upéva Jehová* oipotahaichaite, haʼe hína pe Espíritu.+

4 Ñandejára ohechauka oréve oreporiahuverekoha ha omeʼẽ oréve ko tembiapo, upévare noroñentregái. 2 Ore rorrechasa umi mbaʼe vai ojejapóva ñemiháme, umíva ningo oporomotĩ. Ndoroikói rombotavy ótrope, ni ndoroikói rokambia la heʼíva Ñandejára ñeʼẽ.+ Upéva rangue roikuaauka umi enseñánsa verdadéra, ha Ñandejára renondépe romoĩ ehémplo iporãva enterove umi héntepe* g̃uarã.+ 3 Umi notísia porã roikuaaukáva oĩramo ñemiháme,* oĩ hína ñemiháme umi oñehundítavagui. 4 Koʼã hénte ndojeroviái pórke ko múndo* jára+ omohesatũ chupekuéra+ ani hag̃ua opilla mbaʼeve. Péicha umi notísia porã omimbipáva ha oñeʼẽva Crístore, ndohesapéi hesekuéra.+ Cristo hína Ñandejára joguahaite.+ 5 Ropredika jave noroñeʼẽi orejehe, síno romombeʼu Jesucristo haʼeha ñande Ruvicha, ha romombeʼu avei ore haʼeha pende esklávo Jesús rehehápe. 6 Ñandejára hína upe heʼi vaʼekue: “Pe pytũmbýpe ohesape vaʼerã peteĩ lus”.+ Ha Ñandejára ohesape ore korasõme+ Cristo* rupive, ha pe lus iporãitéva orepytyvõ roikuaa porã hag̃ua Ñandejárape.

7 Ore ningo rojogua umi kambuchi ojejapóvape ñaiʼũgui,+ ha orekóva hyepýpe peteĩ tesóro.+ Upéicha rupi ojekuaa porã ore rorresivi hague pe podér umi ótra hénte ndorekóiva. Ko podér ningo ndahaʼéi orembaʼe, síno ou Ñandejáragui.+ 8 Umi provléma ojeliapa orerehe, péro ndahaʼéi upe haguére ndaikatuvéimava rokuʼe. Sapyʼánte ndoroikuaái mbaʼépa rojapóta, péro siémpre oĩ jey peteĩ tape rosẽ hag̃ua.*+ 9 Oĩ orepersegíva, péro Ñandejára ndaorerejái.+ Oĩ orepetéva yvýre, péro noroñehundíri.+ 10 Rohohápente siémpre rojapeligra ha haimete mete romano, Jesús rehe oiko haguéicha.+ Péva ohechauka umi héntepe ore rosufriha Jesús osufri haguéicha. 11 Ha noromanóiramo jepe, siémpre rojapeligra+ rosegi rupi Jesúspe. Péva ohechauka umi héntepe ore rosufriha Jesús osufri haguéicha. 12 Ore ningo rojapeligra, péro upéicha rupi peẽ ikatu peikove.

13 Péicha heʼi Ñandejára Ñeʼẽ: “Ajerovia rupi ningo añeʼẽ”.+ Ha ore avei rohechauka rojeroviaha upéicha, ha upévare roñeʼẽ. 14 Roikuaa upe omopuʼã vaʼekue Jesúspe, oremopuʼãtaha avei omopuʼã haguéicha chupe, ha ñandegueraháta ñaime hag̃ua Jesús renondépe ore ha peẽ avei.+ 15 Entéro koʼã mbaʼe ningo ideprovécho peẽme, péicha heta hetavéta umi vendisión* Ñandejára omeʼẽva, ha hetave hénte oñemboʼéta Ñandejárape ombotuicha hag̃ua chupe.+

16 Upévare ñande nañañentregái. Ñande rete ikaneʼõ ha ikangýramo jepe ohóvo, umi mbaʼe jarekóva ñane akãme ha ñane korasõme ipyahuve ohóvo káda día. 17 Ñande jarresivíta peteĩ prémio tuicháva ha iporãitereíva ha opytátava pára siémpre. Upévare umi sufrimiénto jahasáva koʼág̃a ivevýi ha sapyʼami g̃uarãnte.+ 18 Upévare ndajaikói ñapensa meme umi mbaʼe ikatúvare jahecha, síno ñapensa umi mbaʼe ndaikatúivare jahecha.+ Pórke umi mbaʼe jahecháva ningo sapyʼami g̃uarãnte, umi mbaʼe ndajahecháiva katu opa ára g̃uarã.

5 Jaikuaa ningo ñande rete ojoguaha peteĩ ógape. Pe óga jarekóva ko yvýpe oñehundíta,+ péro Ñandejára omeʼẽta ñandéve yvágape peteĩ óga. Upe óga opytáta pára siémpre ha ndahaʼéi peteĩ persóna ojapo vaʼekue.+ 2 Jaiko aja ko óga oĩvape yvy ape ári, ñañelamenta jaikóvo pórke jaipotaitereíma oñemeʼẽ ñandéve pe óga yvagapegua. Upe óga ñandekuvríta aóicha.+ 3 Upéicha, og̃uahẽ vove pe tiémpo ñamonde hag̃ua upe ao nañaimemoʼãi opío. 4 Jaiko aja ko óga oĩvape yvy ape ári, ñañelamenta jaikóvo ha ñañekevranta, péro ndahaʼéi jahejaségui ko óga* jaipeʼaramoguáicha peteĩ ao. Ñande ñañeñandu péicha pórke jarresivise pe óga yvagapegua.+ Péicha ñande rete ikatúva omano rekovia, jarresivíta jeikove opaveʼỹva.+ 5 Ñandejára hína upe ñandepreparáva jaiko hag̃ua péicha.+ Haʼe omeʼẽ ñandéve ijespíritu ogaranti hag̃ua omeʼẽtaha ñandéve umi vendisión ñahaʼarõva.+

6 Upéicharõ ñande ni michĩmi ndajadudái, ha jaikuaa jaikove aja ko ñande rete reheve,* ñaimeha mombyry ñande Ruvichágui.+ 7 Ñande jaikuaa upéva pórke ndajahejái ñandegia umi mbaʼe jahecháva, síno jaheja ñandegia ñande jerovia. 8 Ñande ni michĩmi ndajadudái ha hiʼãiterei ñandéve jaheja ko ñande rete jaiko hag̃ua ñande Ruvicha ndive.+ 9 Upéicharõ, tahaʼe jaikóva hendive térã ñaime mombyry chugui, ñañehaʼã jaiko haʼe ñandeguerohory hag̃uáicha. 10 Pórke enterove ñaiméta Cristo trivunál renondépe, ha káda únope ojepagáta umi mbaʼe jajapo vaʼekuére jaikove aja ko ñande rete reheve, tahaʼe iporãva térã ivaíva.+

11 Upéicharõ, ore roikuaa rorrespeta vaʼerãha ñande Ruvichápe, ha upévare roipota umi hénte oguerovia umi mbaʼe romboʼéva. Upéicha rupi siémpre roñehaʼã rokonvense chupekuéra. Ñandejára oikuaa porã mbaʼeichagua persónapa ore ha hiʼãite peẽ* orekuaa porã avei. 12 Ndahaʼéi ningo ore roñepyrũ jeýva roñeʼẽ porã orejehe, pomokyreʼỹnte peime hag̃ua orgullóso orereheve. Péicha ikatúta pembohovái umi oikóvape oñembotuicha ipíntare,+ péro nomañáiva umi mbaʼe orekóvare ipyʼapýpe. 13 Oiméramo rojapo raʼe álgo peteĩ ihuisioʼỹvaicha,+ upéva rojapo Ñandejára rehehápe, ha oiméramo rojapo upéva peteĩ ihuísio porãvaicha, upéva ideprovéchota peẽme. 14 Ore ningo rontende porã ko mbaʼe: enterove oñekondenáma kuri omano hag̃ua, upévare tekotevẽ kuri peteĩ kuimbaʼe omano enterove rehehápe.+ Upévare Cristo mborayhu oreovliga oreñeʼẽrendu hag̃ua chupe. 15 Ha Cristo omano enterove rehehápe ikatu hag̃uáicha umi oikovéva ndojapovéima haʼekuéra oipotávante+ síno ojapo hag̃ua Cristo oipotáva, haʼe omano kuri hesehapekuéra ha oñemopuʼã jey chupe.

16 Upéicharõ, koʼág̃a guive ndajahusgavéima ñande rapichápe umi mbaʼe jahechávarente.+ Ha oimérire yma ñande jahecha Crístope umi hénte ohechaháicha chupe, koʼág̃a ndajajapovéima upéva.+ 17 Upéicharõ, oĩramo peteĩ omoirũva Crístope, Ñandejára ojapo jey chupe.+ Umi mbaʼe tuja ohasáma. Koʼág̃a oĩma umi mbaʼe ipyahúva. 18 Péro entéro mbaʼe ou Ñandejáragui, haʼe ñanepytyvõ jaiko porã jey hag̃ua hendive Cristo rupive.+ Ha Ñandejára voi onkarga ñandéve ñaipytyvõ hag̃ua ótrope oiko porã jey hag̃ua hendive.+ 19 Péva heʼise Ñandejára ojevaleha Crístore umi hénte oiko porã jey hag̃ua hendive,+ péicha haʼe ndorekói enkuénta umi mbaʼe vai ojapóva hikuái.+ Ha ñandéve Ñandejára onkarga jaha hag̃ua ñamombeʼu umi héntepe ikatuha oiko porã jey hendive.+

20 Upéicharõ ñande hína Ñandejára rrepresentánte,+ koʼág̃a jajapo pe traváho Cristo ojapo vaʼekue.*+ Ñandejára ojevale ñanderehe, Cristo vése jajerure asy hag̃ua umi héntepe: “Peiko porã jeýna Ñandejára ndive”. 21 Cristo núnka ndopekái vaʼekue+ ha Ñandejára omeʼẽ chupe sakrifísioramo ñande pekádore, ikatu hag̃uáicha ñandehústo Ñandejára renondépe.+

6 Ñandejára ningo ohechauka imbaʼeporãitereiha penendive,* upévare ore rombaʼapóva Ñandejára ndive,+ rojerure asy peẽme ani hag̃ua peju pedespresia upéva.+ 2 Pórke Ñandejára heʼi: “Che rohendu kuri pe tiémpo amoĩvape aguerohory hag̃ua umi héntepe. Che roipytyvõ kuri pe día amoĩvape aporosalva hag̃ua”.+ Koʼág̃a hína pe tiémpo Ñandejára omoĩva oguerohory hag̃ua umi héntepe. Koʼág̃a hína pe día Ñandejára omoĩva oporosalva hag̃ua.

3 Ni mbaʼevéicharõ ndorojapói mbaʼeve oofendétava ótrope, ani hag̃ua ojetopa mbaʼeve ivaíva ore servísiope.+ 4 Upéva rangue, entéro mbaʼe rojapóvape rohechauka roserviha Ñandejárape:+ ore roaguanta heta mbaʼe, rohasa asy, rohasa heta nesesida, heta situasión ijetuʼúva,+ 5 oĩ orembyepotíva, roho kárselpe,+ roaguanta umi persóna ojapóvape sarambi, rombaʼapo pohýi, avése ndorokéi ha ndoroguerekói roʼu vaʼerã.+ 6 Ore rohechauka roserviha Ñandejárape, pórke orerekopotĩ, roguereko enkuénta umi mbaʼe roaprendéva, orepasiénsia,+ orembaʼeporã,+ roheja pe espíritu sánto oregia, roporohayhu tovamokõiʼỹre,+ 7 ndaorejapúi ha rokonfia Ñandejára podér rehe.+ Rohechauka avei roserviha Ñandejárape rojagarrávo ore derécha ha ore iskiérdape umi árma ojepurúva ojejapo hag̃ua iporãva.*+ 8 Rohechauka avei roserviha Ñandejárape oĩ jave orembotuicháva ha oreapoʼíva, oñeʼẽ vaíva orerehe ha oñeʼẽ porãva orerehe. Umi hénte heʼi orerehe orejapuha, péro ore siertoguánte roʼe. 9 Umi hénte heʼi orerehe avave ndaorekuaaiha, péro Ñandejára orekuaa, heʼi hikuái romereseha romano* péro ore rosegi roikove.+ Umi hénte heʼi rojekastigaha péro ore noromanói.+ 10 Umi hénte opensa roñembyasyha, péro ore siémpre rovyʼa. Opensa hikuái oremboriahuha, péro romeʼẽ heta mbaʼe porã ore rapichápe. Umi hénte opensa ndoroguerekoiha mbaʼeve, péro roguereko entéro mbaʼe.+

11 Ermanokuéra Corintogua, ore roñeʼẽ kuri peẽme kyhyjeʼỹme ha ore korasõ mbytete guive pohayhu.* 12 Ore ndorojejokói rohechauka hag̃ua mbaʼeichaitépa pohayhu,+ péro peẽ katu ndapehechaukái hína orerayhuha. 13 Upévare añeʼẽ peẽme añeʼẽrõguáicha che raʼykuérape. Peẽ ningo oretrata porã vaʼerã ore rojapoháicha. Peẽ orerayhuve vaʼerã.*+

14 Ani peñemoĩ peteĩ júgo* guýpe peteĩ ndoservíriva ndive Ñandejárape.+ ¿Mbaʼéicha piko ojogueraha porãta pe hustísia ha pe inhustísia?+ Térã, ¿mbaʼépe piko ojojogua ára ha pyhare?+ 15 Avei, ¿mbaʼéicha piko oiko porãta Cristo ha Satanás?*+ Térã, ¿mbaʼépepa ojojogua peteĩ ojeroviáva ha peteĩ ndoservíriva Ñandejárape?+ 16 ¿Mbaʼe guaʼu piko ojapóta umi dios raʼanga Ñandejára témplope?+ Ñande hína Ñandejára oikovéva témplo+ ha haʼe heʼi: “Che aikóta ijapytepekuéra ha aiméta hendivekuéra.+ Che haʼéta Ijára ha haʼekuéra haʼéta che puévlo”.+ 17 Jehová* heʼi voi: “‘Upévare, pesẽke ijapyteguikuéra, ha pejeíke chuguikuéra, ha anivéke pepoko pe mbaʼe kyʼa rehe’,+ ‘ha che porresivíta’”.+ 18 “‘Ha che haʼéta pende Ru,+ ha peẽ haʼéta che raʼy ha che rajykuéra’,+ heʼi Jehová* pe Todopoderóso”.

7 Upéicharõ che ermáno ha che ermanakuéra ahayhuetéva, oñepromete rupi ñandéve koʼã mbaʼe,+ ñamopotĩ vaʼerã ñande rete ha ñane korasõ.*+ Jahechaukákena jarrespetaha Ñandejárape ha péicha káda día ñanepotĩvéta henondépe.

2 Pemeʼẽna oréve peteĩ lugár pene korasõme.+ Ore ningo ndorojapói ivaíva avavére, ndoroguerahái ni peteĩ persónape tape vaíre ha ndorojaprovechái avavére.+ 3 Ndaʼéi peẽme koʼã mbaʼe pokondena hag̃ua. Haʼéma haguéicha peẽme, toiko la oikóva peẽ siémpre peiméta ore korasõme. 4 Che ndakyhyjéi añeʼẽ hag̃ua peẽme. Areko heta mbaʼe aĩ hag̃ua orgullóso pendereheve. Tuicha añekonsola, ha avyʼaiterei rohasáramo jepe heta situasión ijetuʼúva.+

5 Rog̃uahẽrõ guare Macedóniape+ ndaikatúi avei orepyʼaguapy, síno rosegi roñekevranta heta mbaʼére. Umi hénte ndoservíriva Ñandejárape oñemoĩ mbarete orerehe ha rojepyʼapy avei umi ermánore. 6 Péro Ñandejára siémpre okonsola umi oñedeprimívape,+ ha haʼe ojevale Títore orekonsola hag̃ua haʼe oúrõ guare orevisita. 7 Péro ndahaʼéi roñekonsoláva haʼe ou haguérente orevisita, síno peẽ voi pekonsola rupi chupe. Haʼe ningo omombeʼu oréve peẽ cherechaseha, peñembyasyetereiha ha omombeʼu avei pejepyʼapyha cherehe. Aikuaávo koʼã mbaʼe avyʼavéntema.

8 Upévare nambyasýi askrivi haguére peẽme pe kárta,+ jepe upéva penemoñeñandu vai kuri. Primerorã ambyasy kuri pórke peñeñandu vai, péro aikuaa sapyʼaiténte hague upéva. 9 Koʼág̃a katu avyʼa, ndahaʼéi peñembyasy haguérente, síno pórke upéva penemomýi peñarrepenti hag̃ua. Peẽ ningo peñembyasy Ñandejára oipotaháicha ha upéva penepytyvõ. Upévare umi mbaʼe roʼe vaʼekue peẽme ndojapovaíri penderehe. 10 Siémpre iporã ñañembyasy Ñandejára oipotaháicha, pórke upéva ñanemomýi ñañarrepenti hag̃ua ñande pekádogui ha upéva ñandesalva.+ Péro ñañembyasýramo ko múndo oipotaháicha, ñamanóta. 11 Ojekuaa porãiterei mbaʼéichapa peñembyasy Ñandejára oipotaháicha ha upévare peñehaʼãmbaite pejapo la iporãva. Peẽ pemopotĩ pende réra, pendepochy upe mbaʼe vai ojejapo vaʼekuére, perrespeta Ñandejárape, peñehaʼã peñarrepenti, peservi Ñandejárape pende pyʼaite guive ha pekorrehi pe ojejapo vaíva.+ Entéro mbaʼe pejapo porã pesolusiona hag̃ua upe provléma. 12 Che askrivi peẽme, péro ndahaʼéi pe opeka vaʼekue káusare ni pe ojeperhudika vaʼekue káusare,+ síno askrivi peẽme ikatu hag̃uáicha ojehecha Ñandejára renondépe mbaʼeichaitépa peneñeʼẽrenduse ore roʼévape. 13 Upévare roñekonsola.

Péro ndahaʼéi roñekonsolánteva, síno rovyʼaiteve rohechávo mbaʼeichaitépa ovyʼa Tito pórke enterove peẽ pemokyreʼỹ chupe. 14 Che añeʼẽ porã kuri penderehe ha amombeʼu kuri Títope aĩha orgullóso pendereheve, ha peẽ nachemotĩri. Umi mbaʼe ore roʼéva peẽme ningo siertoite, ha umi mbaʼe roʼe vaʼekue Títope penderehe siertoite avei. 15 Tito penderayhuve imanduʼa jave mbaʼéichapa peẽ perresivi chupe ohórõ guare pendevisita. Upérõ enterove pehechauka peneñeʼẽrenduha ha perrespetaitereiha chupe.+ 16 Avyʼaiterei pórke ikatu ajerovia penderehe entéro mbaʼépe.

8 Koʼág̃a romombeʼuse peẽme ermanokuéra mbaʼépa ojapo umi kongregasión Macedoniagua+ Ñandejára imbaʼeporãiterei rupi hendivekuéra.* 2 Haʼekuéra ohasa peteĩ situasión ijetuʼuetereíva ha heta osufri, péro ohechauka osegiha ovyʼa ha ipojeraitereiha. Péicha ojapo hikuái imboriahúramo jepe. 3 Chete ikatu agaranti siertoha ko mbaʼe: haʼekuéra omeʼẽ entéro mbaʼe orekóva,+ ha omeʼẽve voi upe orekóvagui.+ 4 Koʼã ermáno ipyʼaporãiterei, upévare ijeheguiete ojerure asy oréve ikatúpa avei oreko pe priviléhio oporopytyvõ hag̃ua omeʼẽvo irregálo. Haʼekuéra oservise avei umi Ñandejára oiporavo vaʼekuépe.*+ 5 Haʼekuéra ojapove voi pe rohaʼarõ vaʼekuégui. Primerorã oñemeʼẽmbaite hikuái oservi hag̃ua ñande Ruvichápe, ha orepytyvõ avei oréve Ñandejára oipotaháicha. 6 Upévare ore romokyreʼỹ Títope+ ombyatypa hag̃ua umi kontrivusión peẽ pemeʼẽ vaʼekue pyʼaporãme. Pórke haʼe omoñepyrũ kuri upe traváho. 7 Peẽ ningo pejapo porã entéro mbaʼe. Pejerovia mbarete, pendekatupyry peñeʼẽ hag̃ua, peikuaa hetaiterei mbaʼe, ha pejapóva guive peñehaʼã pejapo porã. Peẽ añetehápe pehayhu pende rapichápe ore pohayhuháicha. Upéicharõ, pesegíkena avei peñehaʼã pendepojera hag̃ua.+

8 Ndahaʼéi ningo amandáva peẽme pejapo hag̃ua koʼã mbaʼe, síno aipotánte peikuaa mbaʼeichaitépa ombaʼapo jejopy ha ipyʼaporã umi ótro ermáno. Ha ahechase avei peẽ peporohayhu añetépa. 9 Peẽ ningo peikuaa mbaʼépa ojapo ñande Ruvicha Jesucristo imbaʼeporãiterei rupi: haʼe ningo irríko kuri péro penderehehápe ou imboriahu. Péicha ojapo ikatu hag̃uáicha haʼe imboriahu rupi,+ peẽ penderríko.

10 Haʼéta peẽme mbaʼépa apensa:+ ko traváho ningo peẽme ideprovéchota, ojapóma un áño peñepyrũ hague ko traváho, ha añetehápe ojekuaa kuri pejapose hague upéva. 11 Upéicharõ, kyreʼỹme pemoñepyrũ haguéicha ko traváho, upéicha avei peñehaʼãna kyreʼỹme petermina. Pembyaty vaʼerã káda uno ikatuháicha. 12 Ñandejára oguerohoryeterei umi hénte omeʼẽramo umi rregálo ipyʼaite guive. Pórke haʼe ohaʼarõ peteĩ persóna omeʼẽ pe ikatúva,+ ndahaʼéi pe ikatuʼỹva. 13 Ndahaʼéingo che amoĩséva peẽme peteĩ kárga ha ótrogui katu ambovevýi. 14 Che ningo aipotánte entéro pereko jojapa. Umi mbaʼe hembýva peẽme toñemeʼẽ umi ndorekóivape. Ha umi mbaʼe hembýva chupekuéra ideprovéchota peẽme. Péicha entéro oreko jojapáta. 15 Ñandejára Ñeʼẽme heʼiháicha: “Nahembýi pe heta oreko vaʼekuépe, ha ndofaltái pe saʼi oreko vaʼekuépe”.+

16 Roagradese Ñandejárape Tito ojepyʼapy haguére penderehe ore rojepyʼapyháicha.+ 17 Haʼe ndahaʼéi ojapónteva la ore rojeruréva chupe síno ohose voi pene rendápe. Upéicha rupi ijeheguiete haʼe oho hína pene rendápe. 18 Péro romondo avei hendive pe ñane ermáno ojeguerohoryetéva entéro kongregasiónpe, chupe opárupi ojeguerohory pórke oikuaauka umi notísia porã. 19 Ha ndahaʼéi upévante, umi kongregasión oiporavo ko ermánope oremoirũ hag̃ua ore viáhepe. Haʼe orepytyvõta rorreparti hag̃ua pe kontrivusión. Ko kontrivusión rorrepartíta oñembotuicha hag̃ua ñande Ruvichápe, ha péicha rohechaukáta roipytyvõsetereiha ótrope. 20 Upéicha avave ndeʼimoʼãi ore rorreparti vai hague pe kontrivusión oñemeʼẽ vaʼekue pyʼaporãme ha oñemoĩ vaʼekue ore kárgope.+ 21 Pórke “ore roñehaʼã oreonrrádo entéro mbaʼe rojapóvape, ndahaʼéi Jehová* renondépente, síno avei umi hénte renondépe”.+

22 Avei romondo hendivekuéra ótro ermánope. Heta vése romoĩ ikárgope umi traváho, ha haʼe siémpre ohechauka oñehaʼãha ojapo porã. Upéicharõ koʼýte koʼág̃a ojapo porãta pórke ojeroviaiterei penderehe. 23 Péro oĩramo odudáva Títogui, aipota peikuaa haʼe chemoirũha, ha chéicha avei ombaʼapoha peẽme g̃uarã. Ha oĩramo odudáva umi ótro ermánogui, aipota peikuaa umi kongregasión omondoha chupekuéra.* Haʼekuéra ningo ombotuicha Crístope. 24 Upévare pehechaukákena pehayhuha chupekuéra,+ ha entéro umi kongregasión tohechakuaa mbaʼérepa ore oreorgullóso pendereheve.

9 Natekotevẽi askrivi peẽme peikuaa hag̃ua peipytyvõ* vaʼerãha umi ermánope.*+ 2 Che haʼe umi macedóniope aĩha orgullóso pendereheve, pórke aikuaa penekyreʼỹha peporopytyvõ hag̃ua. Amombeʼu chupekuéra peẽ, Acayapegua, un áñoma pejeprepara hague peporopytyvõ hag̃ua. Ha péicha penekyreʼỹ haguére, umi macedonio apytépe heta oĩ oipytyvõséva avei ótrope. 3 Péro che amondo hína umi ermánope, ikatu hag̃uáicha peẽ peĩma preparádo che haʼéma haguéicha peimetaha. Péicha umi mbaʼe roʼe vaʼekue penderehe ndopytareimoʼãi. 4 Péro ohóramo orendive umi macedonio ha rotopa neʼĩraha peĩ preparádo, ore roñemotĩta rojerovia haguére penderehe ha peẽ avei peñemotĩta. 5 Upévare apensa iporãtaha amondóma púntape pene rendápe umi ermánope. Upéicharõ, ore rog̃uahẽvo upépe peẽ perekopátama pe kontrivusión peje vaʼekue pemeʼẽtaha de rregálo. Péicha ojehecháta pendepojeraha, ha ndahaʼéi pemeʼẽha ore poovliga rupi.

6 Péro penemanduʼákena ko mbaʼére: pe saʼi oñotỹva, saʼi okosecháta, ha pe heta oñotỹva, heta okosecháta.+ 7 Káda uno tomeʼẽ odesidiháicha ikorasõme, ndovaléi omeʼẽ tovapukúpe ni ojeovligágui chupe,+ pórke Ñandejára ohayhu pe persóna vyʼápe omeʼẽvape.+

8 Avei Ñandejára ikatu ohechauka peẽme mbaʼeichaitépa imbaʼeporã.* Péicha ndofaltamoʼãi peẽme mbaʼevete, síno hembypáta peẽme umi mbaʼe peikotevẽva pejapo hag̃ua iporãva.+ 9 (Heʼiháicha Ñandejára Ñeʼẽme: “Haʼe omeʼẽ heta mbaʼe* umi imboriahúvape. Haʼe siémpre ojapóta iporãva”.+ 10 Ñandejára omeʼẽ heta semílla pe oñotỹvape, ha omeʼẽ pan umi hénte hoʼu hag̃ua. Upéicharõ haʼe omeʼẽta avei peẽme hetaiterei semílla peñotỹ hag̃ua, ha penepytyvõta pekosecha hag̃ua heta mbaʼe porã umi tembiapo porã pejapo vaʼekuégui). 11 Ñandejára ningo heta penevendesi ikatu hag̃uáicha peẽ pendepojera heta hendáicha umi héntendi. Péicha ore servísio rupive ha peẽ pendepojera haguére, umi hénte oagradeséta Ñandejárape. 12 Ko servísio ndahaʼéi oñemeʼẽ hag̃uánte umi ermánope* umi mbaʼe oikotevẽva,+ síno hetave hag̃ua umi oagradeséva Ñandejárape orresivi rupi ko ajúda. 13 Pemeʼẽvo ko rregálo pehechaukáta mbaʼeichagua persónapa peẽ, ha upévare haʼekuéra ombotuicháta Ñandejárape. Haʼekuéra ojapóta upéva pórke ohecháta peẽ ndahaʼéi peikuaaukánteva umi notísia porã oñeʼẽva Crístore, síno pekumpli voi umíva. Ha avei pórke peẽ pendepojera pemeʼẽvo umi kontrivusión chupekuéra g̃uarã ha enterovépe g̃uarã.+ 14 Haʼekuéra ojerure asýta penderehe Ñandejárape ha ohechaukáta penderayhuha pórke Ñandejára imbaʼeporãiterei penendive.

15 Jaagradese Ñandejárape pe rregálo ijojahaʼỹva omeʼẽvare ñandéve.

10 Che, Pablo, añetehápe aipota pejapo umi mbaʼe haʼéva peẽme. Añeʼẽ jave che asegi Cristo ehémplo, haʼe iñumílde ha imbaʼeporã.+ Aikuaa pende apytépe ojeʼeha chepyʼaguasuha askrivi jave umi kárta,+ péro chekangyha aime jave penendive.+ 2 Aha vove pene rendápe nahiʼãiete chéve akorrehi mbarete umi heʼívape ore rohejaha oregia ko múndope oñepensáva. 3 Ore roikóramo jepe ko múndope, ore noroñorairõi umi hénte ko mundopegua ojapoháicha. 4 Umi árma roipurúva roñorairõ hag̃ua ndoipurúi umi hénte ko mundopegua,+ síno umíva omeʼẽ oréve Ñandejára.+ Umi árma ipoderóso ha ikatu ohundi umi mbaʼe imbaretéva peteĩ tórreicha. 5 Roity yvýre umi pensamiénto japu ha umi mbaʼe ostorváva umi héntepe ha ojokóva chupekuéra oikuaa hag̃ua Ñandejárape.+ Entéro pensamiénto roguereko peteĩ présoicha, ikatu hag̃uáicha iñeʼẽrendu Crístope. 6 Peẽ pehechauka vove peneñeʼẽrenduha entéro mbaʼépe, ore rokastigáta umi hénte naiñeʼẽrendúivape+ pórke rojepreparáma rojapo hag̃ua upéva.

7 Peẽ pehusga entéro mbaʼe ipíntarente. Ha oĩramo opensáva haʼeha Cristo segidór, imanduʼa vaʼerã ko mbaʼére: upe persóna haʼeháicha Cristo segidór, ore Cristo segidór avei. 8 Ñande Ruvicha omeʼẽ oréve autorida romombarete hag̃ua pende jerovia ha ndahaʼéi romokangy hag̃ua,+ ha che aikóramo michĩmi jepe añemombaʼeguasu rorresivi haguére ko autorida, che nañemotĩmoʼãi. 9 Nahiʼãi chéve pepensa che aipotaha pekyhyje peleévo che kartakuéra. 10 Algúno oiko heʼi cherehe: “Ikartakuérape ningo haʼe iñeʼẽkuaa, ojeguerovia hag̃uáicha voi la heʼíva, péro jahechávo chupe ipínta arruinádo, ha oñepyrũ jave oñeʼẽ vyrorei la heʼíva”. 11 Umi heʼíva péicha toikuaa ko mbaʼe: umi mbaʼe ore roskrivíva umi kártape, upeichaite rojapóta rog̃uahẽ vove upépe.+ 12 Ore ndoroikomoʼãi roʼe rojoguaha umi hénte oñembotuichávape, ni ndorojoguaséi voi chupekuéra.+ Haʼekuéra ojehusga jave ijupe, oreko enkuénta umi mbaʼe haʼekuérante heʼíva iporãha, ha péicha ohechauka nontendeiha mbaʼeve.+

13 Ore ndoroikói roñembotuicha umi mbaʼe ndorojapói vaʼekuére, síno roñembotuicha pe traváho Ñandejára omeʼẽ vaʼekuére oréve, ha peẽ peime upe território oñemoĩ vaʼekuépe ore kárgope.+ 14 Rohórõ guare pene rendápe, ore rojapo la Ñandejára oheja vaʼekue ore kárgope, ha ndorojapói mbaʼeve ndojeʼéiva oréve. Ha ore raẽvete roikuaauka peẽme umi notísia porã oñeʼẽva Crístore.+ 15 Ore noroñembotuichái umi mbaʼe oĩvare ohasa rire pe oñeasignáva oréve, ore noroñembotuichái ótro ojapóvare. Roipotaite ningo pejerovia mbareteve pehóvo, ikatu hag̃uáicha pe traváho rojapo vaʼekue okakuaave pende apytépe. Ha péicha ore ikatúta rojapo hetave mbaʼe koʼág̃a rojapóvagui. 16 Ikatúta roikuaauka umi notísia porã umi tetã oĩvare mombyryve pendehegui, ani hag̃ua roñembotuicha umi mbaʼe ojejapóma vaʼekuére território ahénope. 17 “Oiméramo ndeorgullósota, ndeorgullóso vaʼerã Jehová* haʼe haguére nde Jára”.+ 18 Pórke Ñandejára ndoguerohorýi upe oikóvape oñemombaʼeguasu.+ Jehová* hína pe odesidíva mávapepa oguerohorýta.+

11 Ajoguáramo jepe peteĩ ivýrovape, aipotaite peẽ cheaguanta. Ha añetehápe ningo cheaguanta voi hína. 2 Chete voi apromete kuri pontregataha pemenda hag̃ua Crístore, che popresentase chupe peteĩ mitãkuñáicha, haʼéva vírhen.*+ Upévare ajepyʼapyeterei penderehe Ñandejára ojapoháicha. 3 Pórke pe mbói ombotavy haguéicha Évape iletrádo rupi, péicha akyhyje oĩrõ g̃uarã omoingéva pene akãme umi mbaʼe naiporãiva,+ ha penemomombyry pe mborayhu añetegua ha ipotĩvagui peẽ peñandúva Crístore.+ 4 Peẽ napeneprovlemaiete voi peaguanta hag̃ua peteĩ persóna oúramo opredika peẽme ótro Jesús rehe, ndahaʼéiva pe ore roikuaaukáva peẽme, térã pe persóna omeʼẽramo peẽme ótro espíritu pendegia hag̃ua,* ndahaʼéiva pe espíritu* perresivi vaʼekuéicha. Térã oúramo opredikáva peteĩ notísia porã idiferénteva umi peguerovia vaʼekuégui,+ peẽ napeneprovlemaiete voi peaguanta hag̃ua umichaguápe. 5 Chéverõ g̃uarã che ameʼẽma heta pruéva ohechauka porãva ni peteĩ mbaʼépe ndaivaleveiha chehegui umi pende apóstol oñembovaletéva.+ 6 Che ndachekatupyrýiramo jepe añeʼẽ hag̃ua,+ si aikuaa porã Ñandejárape, ha upéva ahechauka porãma peẽme entéro mbaʼépe.

7 Che ningo vyʼápe aikuaauka peẽme umi notísia porã oñeʼẽva Ñandejárare ha ndajeruréi peẽme pláta. Avei che voi ajeapoʼi chejupe peẽ peñembotuicha hag̃ua. ¿Apeka piko raʼe ajapórõ guare upéva?+ 8 Che aasepta ajúda ótra kongregasióngui, ha péicha haʼete aipeʼáva* chuguikuéra la orekóva ameʼẽ hag̃ua peẽme.+ 9 Upéicharamo jepe, aĩrõ guare penendive ha ahasa nesesida, ndaikói ajeko penderehe, pórke umi ermáno oúva Macedóniagui omeʼẽmbaite chéve la aikotevẽva.+ Añetehápe, añatende ani hag̃ua oiko chehegui peteĩ kárga peẽme g̃uarã ha asegíta añatende ani hag̃ua oiko upéva.+ 10 Che asegi aja amoirũ Crístope, Acaya tuichakuére amombeʼúta aĩha orgullóso+ ko mbaʼére ha ndaipóri chejoko vaʼerã. 11 Che ndaikoséi peteĩ kárgaramo peẽme g̃uarã, ¿mbaʼérepa? ¿Ndapohayhúigui piko? Ñandejára oikuaa pohayhuha.

12 Oĩ algúno oikóva oñembotuicha ha heʼíva haʼeha apóstol oréicha. Upévare che asegíta ajapo umi mbaʼe ajapóva jepi voi,+ péicha ajurumbotýta chupekuéra anive hag̃ua oiko oñembotuicha. 13 Umi kuimbaʼe ningo apóstol japu, haʼekuéra ombotavy ótrope, ha oiko guaʼu Cristo apóstolramo.+ 14 Péro upéva nachesorprendéi, pórke Satanás voi ojedisfrasa ha oiko peteĩ ánhel ivuénovaramo.*+ 15 Upévare naoresorprendéi avei umi isiérvo oikoha ojapose guaʼu iporãva. Péro ipahápe orresivíta hikuái la omereséva hembiapokuére.+

16 Haʼe jeýta peẽme: ani pepensa chevyroha. Péro peẽ pepensáramo chevyroha, aipota cheaguanta, ikatu hag̃uáicha añembotuicha michĩmi jepe. 17 Koʼág̃a nañeʼẽi ñande Ruvicha ojapo haguéicha, síno peteĩ ivýrova ojapoháicha, ojeroviáva ijehe ha oñembotuicháva. 18 Oĩ ningo heta oñembotuicháva umi mbaʼe ko mundopeguáre, upévare che añembotuicháta avei. 19 Peẽ ningo penearanduete guaʼu ha upévare napeneprovlémai peaguanta hag̃ua umi ivýrovape. 20 Añetehápe peẽ peaguanta oimeraẽ pendeguerekóvape ijesklávoramo, oimeraẽ ojaprovechávape penderehe, oimeraẽ oguerahapávape la perekomíva, oimeraẽ oñembotuicha ha pendeapoʼívape, ha oimeraẽ penderovapetévape.

21 Rotĩ ningo roʼe hag̃ua koʼã mbaʼe pórke ikatu oĩ opensáva ore orekangyha ha ndoroipuruporãiha ore autorida.

Péro oĩ pende apytépe ndokyhyjéiva oñemombaʼeguasu hag̃ua, upéicharõ che ndakyhyjemoʼãi avei añemombaʼeguasu hag̃ua, oĩramo jepe opensáva chevyroha. 22 ¿Haʼekuéra piko hebreo? Che avei.+ ¿Haʼekuéra piko israelita? Che avei. ¿Haʼekuéra piko Abrahán familiare? Che avei.+ 23 ¿Haʼekuéra piko oservi Crístope? Akontesta itarovávaicha. Che aservi porãiteve Crístope chuguikuéra, pórke hetave ambaʼapo,+ hetave vése aha kárselpe,+ hetave vése añembyepoti, ha hetave vése haimete mete amano.+ 24 Umi judío 5 vése chembyepoti, ha káda vuélta chenupã hikuái 39 vése.+ 25 Chegarrotea hikuái 3 vése,+ una ves chejapi hikuái itápe,+ 3 vése ore várko oñehundi,+ ha apyta mar mbytépe peteĩ pyhare ha peteĩ día pukukue. 26 Pyʼỹi ajapeligra aviaha jave, ajapeligra rríope, ajapeligra mondaha káusare, ajapeligra che retãygua káusare,+ ajapeligra umi ótro tetã káusare,+ ajapeligra siudápe,+ ajapeligra desiértope, ajapeligra márpe, ajapeligra umi ermáno guaʼu apytépe. 27 Ambaʼapo pohýi ha chekaneʼõ, heta vése ni ndakéi,+ cheñembyahýi ha cheuhéi,+ pyʼỹinte ndarekói haʼu vaʼerã,+ cheroʼy ha ndacheaói.

28 Ha ndahaʼéi koʼã mbaʼe añónte la ahasáva, síno káda día aiko ajepyʼapy entéro umi kongregasiónre.+ 29 Añeñandu vai oĩ jave ikangýva. Ha chepochy voi algúno kúlpare ótro oúramo ndojeroviavéi.

30 Ha tekotevẽramo añembotuicha, añembotuicháta umi mbaʼe ohechaukávare chekangyha. 31 Ñandejára oikuaa ndachejapuiha, chupe oñemombaʼeguasu vaʼerã opa ára g̃uarã, haʼe hína ñande Ruvicha Jesús Túa. 32 Damáscope, pe governadór oĩva rréi Aretas poguýpe, omoĩ guárdia pe siuda rokẽme chejagarra hag̃ua. 33 Péro umi ermáno chemboguejy peteĩ kanásto guasúpe peteĩ ventána oĩvarupi pe murállare.+ Ha péicha ajesalva chuguikuéra.

12 Añembotuicha vaʼerã, upévare añeʼẽta umi visión+ ha umi mensáhe ñande Ruvicha omeʼẽvare chéve.+ Ajapóta upéva ndaideprovéchoiramo jepe chéve. 2 Che aikuaa peteĩ kuimbaʼe haʼéva Cristo disípulo, ojegueraha hague pe yvága mbohapyhápe. Upéva oiko hague ojapóma 14 áño. (Che ndaikuaái ojeguerahápa chupe ikuérpo reheve, térã ikuerpoʼỹ reheve, péro Ñandejára si oikuaa). 3 Añetehápe aikuaa upe kuimbaʼépe. Ñande Ruvicha ogueraha chupe pe paraísope. (Che ndaikuaái ojeguerahápa ikuérpo reheve, térã ikuerpoʼỹre, péro Ñandejára si oikuaa). 4 Ha oĩ aja pe paraísope, haʼe ohendu palávra ndaikatúiva ñamombeʼu ha ndovaléiva peteĩ persóna heʼi. 5 Che añembotuicháta upe kuimbaʼére, péro nañembotuichamoʼãi chejehe, ndahaʼéima guive umi mbaʼe ohechaukávare chekangyha. 6 Ha peichahágui añembotuichaséramo, nañekomportamoʼãi peteĩ ivýrovaicha pórke haʼéta siertoguánte. Péro nañembotuichamoʼãinte, ani hag̃ua avave opensa ikatuha ajapo hetave mbaʼe pe ikatúvagui, térã hetave mbaʼe pe haʼévagui. 7 Avave ndovaléi opensa péicha cherehe arresivi haguérente umi visión iporãitereíva.

Ani hag̃ua añemombaʼeguasueterei, areko álgo chemolestáva kontinuadoite, peteĩ ñuatĩ chekutúva che retépe,+ peteĩ Satanás ánhel. Ko mbaʼe tódo el tiémpo chekutu rasy* ani hag̃ua añembotuichaiterei. 8 Upéicha rupi, 3 vése ajerure asy ñande Ruvichápe oipeʼami hag̃ua chehegui ko ñuatĩ. 9 Péro haʼe heʼi chéve: “Che chembaʼeporãitereíma nendive,* ha upéva ovaléma ndéve g̃uarã. Che podér ojekuaa porãve nde nekangy jave”.+ Upévare, che vyʼápe añembotuicháta chekangy jave, ikatu hag̃uáicha Cristo podér opyta che ári.* 10 Upéicha rupi che avyʼa chekangy jave, oĩ jave cheofendéva, ahasa jave nesesida, oĩ jave chepersegíva, ha ahasa asy jave Cristo rehehápe. Pórke chekangy jave, chepoderóso hína.+

11 Pende káusare aiko añeʼẽ ivýrovaicha. Péro peẽ peñeʼẽ porãrire cherehe, che nañeʼẽmoʼãi kuri upéicha. Che ningo ndahaʼéi mbaʼeve, upéicharõ jepe, umi pende apóstol oñembovaletéva ni peteĩ mbaʼépe ndaivalevéi chehegui.+ 12 Añetehápe chepasiénsia ha ameʼẽ peẽme heta pruéva ohechauka porãva che haʼeha apóstol:+ ajapo milágro, señál ha hetave mbaʼe iporãitereíva.+ 13 Che ningo ndahaʼéi peteĩ kárga peẽme g̃uarã, upévape añoite peẽ penediferénte umi ótra kongregasióngui.+ Chediskulpa la oiméramo upéva la peneofendéva.

14 Koʼág̃a 3 veseháma ajeprepara aha hag̃ua pene rendápe, péro che ndahaʼemoʼãi peteĩ kárga peẽme g̃uarã. Chéngo ndahái pene rendápe aipotágui umi mbaʼe peguerekóva,+ síno aha pohechami hag̃ua. Pórke tuakuéra la ombyaty vaʼerã pláta* umi taʼýrape g̃uarã,+ ndahaʼéi taʼyrakuéra la ombyaty vaʼerã pláta tuakuérape g̃uarã. 15 Che ningo vyʼápe agastapaitéta la aguerekóva ha añemeʼẽmbaitéta penderehehápe.*+ Peichaite peve pohayhuetereíramo, ¿mbaʼéicha piko peẽ saʼive cherayhúta? 16 Tahaʼe haʼeháicha, namoĩri pende ári ni peteĩ kárga.+ Upéicharamo jepe, peẽ peje “aletradea” hague penderehe ha “poity hague ñuhãme”. 17 ¿Che piko aipuru umi ermáno amondo vaʼekuépe pene rendápe ajaprovecha hag̃ua penderehe? 18 Ajerure jey jey Títope oho hag̃ua pene rendápe ha amondo hendive peteĩ ermánope. Tito ningo ni mbaʼevéicharõ ndojaprovechái penderehe, ¿ajépa?+ Oréngo roĩ peteĩ ñeʼẽme ha rosegi peteĩ tapénte, ¿ajépa?

19 Peẽ ningo oiméne pepensa ore roñedefendeha hína, péro ndahaʼéi upéicha. Ore ningo Cristo segidór, upévare siémpre roʼe siertoguáva Ñandejára renondépe. Che ermanokuéra pohayhuetéva, entéro mbaʼe rojapóva ningo pomombarete hag̃uánte. 20 Péro akyhyje ág̃a ag̃uahẽ vove pene rendápe atopárõ g̃uarã álgo ndachegustáiva, ha peẽme napendegustáirõ g̃uarã che arreaksiona lája. Akyhyje oĩrõ g̃uarã oñorairõva, iñenvidiósova,* ipochýva, ojoavýva, oofendéva ótrope, ichismósova, oñemombaʼeguasúva ha okreáva provléma. 21 Ikatu ningo aha jey vove povisita ha aĩ pende apytépe, atĩ Ñandejára renondépe. Pórke ikatu pende apytépe oĩ heta noñarrepentíriva umi mbaʼe vai ojapo vaʼekuére yma. Ikatu oĩ nokambiáiva opensa lája umi mbaʼe ikyʼávare, tekovaíre,* ha notĩriva hembiapo vai hag̃ua.*

13 Koʼág̃a 3 veseháma ajeprepara aha hag̃ua pene rendápe. “Katuete oĩ vaʼerã mokõi térã mbohapy testígo omombeʼúva mbaʼépa la oiko vaʼekue ojekuaa hag̃ua siértopa entéro mbaʼe ojeʼéva”.+ 2 Che naiméiramo jepe penendive koʼág̃a haʼete chéve aime jeýva upépe. Upévare aavisa umi opeka vaʼekuépe ha enterove peẽme ko mbaʼe. Che aha jeýramo pene rendápe akorrehíta umi hembiapo vaívape ha ni peteĩva ndopytareimoʼãi. 3 Péicha ahechaukáta peẽme Cristo oñeʼẽha che rupive. Cristo ndohechaukái peẽme ikangyha, síno ohechauka peẽme ipodér tuichaitéva. 4 Añetehápe Cristo oikórõ guare yvypóraicha ikangy, ha umi hénte oklava chupe pe yvyráre. Péro haʼe koʼág̃a oikove jey Ñandejára podér rupive.+ Añetehápe ore orekangy avei haʼe ikangy haguéicha, péro ore roikóta hendive+ Ñandejára podér rupive, pe podér peẽ avei perekóva.+

5 Pesegíkena peñatende pendejehe pehecha hag̃ua pejerovia mbaretépa hína. Pesegíkena pehecha mbaʼeichagua persónapa peẽ.+ ¿Ndapehechakuaái piko Jesucristo oĩha penendive? Ñandejára napendeguerohorýiramo, Jesucristo noĩmoʼãi penendive. 6 Añetehápe Ñandejára oreguerohory. Hiʼãite chéve peẽ pehechakuaa upéva.

7 Koʼág̃a roñemboʼe Ñandejárape ani hag̃ua peẽ pejapo ivaíva. Noroñemboʼéi umi hénte opensa hag̃ua Ñandejára oreguerohoryha, síno peẽ pejapo hag̃ua iporãva oĩramo jepe ndaoreguerohorýiva. 8 Pórke ore ndaikatúi rojapo mbaʼeve pe añetegua kóntrape, síno pe añetegua rehehápente. 9 Añetehápe ore orekangýramo jepe, rovyʼa peẽ penembaretéramo. Roñemboʼe jave ore rojerure peẽ pekambia* hag̃ua tekotevẽhápe. 10 Upévare askrivi peẽme koʼã mbaʼe aha mboyve pene rendápe, upéicha ág̃a aime vove penendive natekotevẽmoʼãi chepo pohýi aipurúvo pe autorida omeʼẽ vaʼekue chéve ñande Ruvicha.+ Haʼéngo omeʼẽ chéve pe autorida pomombarete hag̃ua ha ndahaʼéi poity hag̃ua yvýre.

11 Ipahápe che ermanokuéra, pesegíkena pevyʼa, pekambia* tekotevẽhápe, peñokonsola,+ peñemoĩ peteĩ ñeʼẽme+ ha peiko pyʼaguapýpe,+ ha Ñandejára oporohayhúva ha omeʼẽva pyʼaguapy+ oĩta penendive. 12 Pejosaludákena ha peñoañuã.* 13 Opavave umi ermáno* oguerahaka peẽme salúdo.

14 Añemboʼe ningo ñande Ruvicha Jesucristo osegi hag̃ua imbaʼeporãiterei penendive,* ha Ñandejára osegi hag̃ua penderayhu. Añemboʼe avei oĩ hag̃ua penendive pe espíritu sánto entéro jarresivíva.