SEGUNDA KÁRTA A TIMOTEO

1 Che, Pablo, ajeporavo vaʼekue aservi hag̃ua Cristo Jesús apóstolramo Ñandejára oipota rupi, aikuaauka hag̃ua pe promésa oñeʼẽva pe jeikovére, ikatúva ojehupyty Cristo Jesús rupive,+ 2 amondo ko kárta Timotéope, che raʼy ahayhuetévape:+

Aipotaite Ñandejára haʼéva pe Túa ha ñande Ruvicha Cristo Jesús taimbaʼeporãiterei nendive,* tandeporiahuvereko ha tomeʼẽ ndéve pyʼaguapy.

3 Aagradese Ñandejárape, chupe che aservi hína che pyʼaite guive umi che tuakuéra ypykue ojapo haguéicha, ha ajapo upéva konsiénsia potĩ reheve. Che siémpre chemanduʼa nderehe ajerure asy jave Ñandejárape ára ha pyhare, 4 ha chemanduʼa jave umi nde resay reñohẽ vaʼekuére hiʼãite chéve rohecha jey, ikatu hag̃uáicha avyʼaiterei. 5 Chemanduʼa mbaʼéichapa rejerovia tovamokõiʼỹre,+ péicha primeroite ojerovia vaʼekue nde avuéla Loida ha nde sy Eunice, ha che aikuaa porã peichaite avei nde resegiha rejerovia.

6 Upévare romomanduʼa resegi hag̃ua kyreʼỹme reipuru pe rregálo oúva Ñandejáragui, ha rerresivi vaʼekue amoĩrõ guare che po nde ári.+ 7 Pórke pe espíritu sánto Ñandejára omeʼẽva ñandéve nañanembopyʼajúi,+ upéva rangue omeʼẽ ñandéve podér,+ mborayhu ha akãguapy. 8 Upévare, ani retĩ reñeʼẽ hag̃ua ñande Ruvicháre,+ ha ani cheguerotĩ avei chéve, hesehápe che aime hína préso. Nde katu reaguanta vaʼerã umi jehasa asy+ umi notísia porã rehehápe, rejeroviávo Ñandejára podér+ rehe. 9 Haʼe ñandesalva ha ñandeporavo jajeaparta+ hag̃ua Ñandejárape g̃uarã, péro ndahaʼéi ñanerembiapo porã haguére, síno haʼe oipota rupi ha imbaʼeporãitereígui. Haʼe ymaitereíma ohechauka imbaʼeporãitereiha+ ñanendive Cristo Jesús rupive. 10 Péro koʼág̃a upéva ojekuaa porãvéntema ñande Salvadór Cristo Jesús+ ojechauka rupi. Haʼe ohundi pe ñemano,+ ha oikuaauka ñandéve umi notísia porã+ rupive mbaʼéichapa ikatu jahupyty jeikove+ ikatuʼỹva oñembyai.+ 11 Ha ikatu hag̃uáicha aikuaauka umi notísia porã, che ajeporavo vaʼekue apredika hag̃ua, aservi hag̃ua apóstolramo ha aporomboʼe hag̃ua.+

12 Ha ajapo rupi koʼã mbaʼe che ahasa asy+ hína, péro natĩri.+ Pórke che aikuaa porã hína Ñandejárape, upe ajeroviávare, ha ajerovia haʼe ikatutaha oñangareko entéro mbaʼe ameʼẽ vaʼekuére chupe, og̃uahẽ meve upe día ojeporavo vaʼekue.+ 13 Esegíkena umi enseñánsa iporãva*+ oĩva ehémploramo,* umi rehendu vaʼekue chehegui, ha ehechauka nde jerovia ha ne mborayhu reime rupi unído Cristo Jesús ndive. 14 Eñongatu porãkena pe tesóro ojeheja vaʼekue nde kárgope, upearã nepytyvõta pe espíritu sánto oĩva* ñande pype.+

15 Nde ningo reikuaa entéro kuimbaʼe oĩva Asia* distrítope+ chereja rei hague. Umíva apytépe Figelo ha Hermógenes. 16 Ñande Ruvicha toiporiahuvereko Onesíforo+ rogayguakuérape, pórke haʼe ningo pyʼỹinte chemokyreʼỹ vaʼekue ha notĩri chereheve añeñapytĩ haguére kadénape. 17 Upéva rangue, haʼe oĩrõ guare Rómape heta chereka vaʼekue opárupi ha chejuhu. 18 Ñande Ruvicha Jehová* toiporiahuvereko chupe upe día ojeporavo vaʼekuépe. Nde reikuaa porã entéro mbaʼe haʼe ojapo vaʼekue cherehehápe Éfesope.

2 Upévare che raʼy,+ tosegi tomeʼẽ ndéve podér pe mbaʼeporã* ohechaukáva Cristo Jesús. 2 Umi mbaʼe rehendu vaʼekue che jurúgui heta hénte+ heʼikuaa siertoha hína umíva, ha koʼã mbaʼe remboʼe vaʼerã umi kuimbaʼe ifiélvape, péicha haʼekuéra ikatupyrýta avei omboʼe hag̃ua ótrope. 3 Nde haʼe rupi Cristo Jesús soldádo teete,+ eaguantákena umi jehasa asy.+ 4 Peteĩ soldádo opyta porãséva pe huvicha ogueraha vaʼekuéndi chupe soldádoramo, ndoikói oñentremete negósiope* ogana hag̃ua pláta. 5 Ha avei peteĩ kuimbaʼe opartisipáva peteĩ karrérape,* noganamoʼãi pe prémio* nohaʼãiramo pe rreglaménto heʼiháicha.+ 6 Pe kokueséro ombaʼapo jejopýva, haʼe raẽ hoʼu vaʼerã pe oprodusíva ikokue. 7 Epensa memékena koʼã mbaʼe haʼévare ndéve, ha ñande Ruvicha ontendekáta ndéve entéro mbaʼe.

8 Nemanduʼákena oñemopuʼã hague Jesucrístope umi omano vaʼekue apytégui,+ ha haʼe hague David familiare.+ Koʼã notísia porã ningo che apredika,+ 9 ha upévare ahasa asy ha añeñapytĩ hína kadénape peteĩ mbaʼe vai apoháicha.+ Upéicharõ jepe, ndaipóri ojoko vaʼerã Ñandejára ñeʼẽ.+ 10 Upéicha rupi che aaguanta entéro mbaʼe umi ojeporavo vaʼekue+ rehehápe, ikatu hag̃uáicha Cristo Jesús rupive Ñandejára osalva chupekuéra, ha oñembotuicha chupekuéra pára siémpre. 11 Ko haʼéva ningo siertoite hína: añetehápe ñamanóramo hendive, jaikovéta avei hendive,+ 12 jasegíramo ñaaguanta, ñagovernáta avei hendive rréiramo,+ ha ñanegáramo chupe, haʼe avei ñanenegáta,+ 13 péro ñande ndajajapóiramo jepe Ñandejára heʼíva, haʼe siémpre ojapóta upe heʼíva, pórke haʼe núnka ndojapomoʼãi mbaʼeve hendapeʼỹ.

14 Esegíkena emomanduʼa chupekuéra koʼã mbaʼére, ha ere porã chupekuéra Ñandejára renondépe ani hag̃ua oiko vai umi palávrare, upéva ndaideprovéchoi mbaʼeverã, pórke ohundi* umi ohendúva jerovia. 15 Eñehaʼãmbaitéke reime porã hag̃ua Ñandejára renondépe, oiko hag̃ua ndehegui peteĩ kuimbaʼe ombaʼapo jejopýva ha notĩriva umi mbaʼe ojapo vaʼekuére, oipurúva Ñandejára ñeʼẽ* hekoitépe.+ 16 Péro errechasa umi kuénto japu oheja vaíva Ñandejárape,+ pórke umichagua kuénto japu ojapokáta opaichagua mbaʼe vai Ñandejára renondépe. 17 Ha koʼã mbaʼe ojapóva ñeʼẽngue okorréta gangrénaicha.* Himeneo ha Fileto oĩ hína umíva apytépe.+ 18 Koʼã mokõi kuimbaʼe ningo ohejáma umi enseñánsa añeteguáva ha heʼi umi hénte oñemoingove jeýma hague,+ ha péicha ohundíma hetágui ijerovia. 19 Upéicharõ jepe, Ñandejára omoĩma peteĩ simiénto imbaretéva ha opyta hatãva, ha oreko ko séllo heʼíva: “Jehová* oikuaa umi imbaʼévape”,+ ha avei heʼi: “Enterove ojeroviáva Jehová* rérare+ ohejaite vaʼerã umi mbaʼe vai”.

20 Nde ningo reikuaa peteĩ óga guasúpe ndaiporiha mbaʼyru* de óro ha de pláta añónte, síno oĩ avei umi ojejapo vaʼekue madéragui ha ñaiʼũgui, ha oĩ umi mbaʼyru ojepurúva umi mbaʼe iñimportántevape g̃uarã péro umi ótro ojepuru oimeraẽ mbaʼerã. 21 Upévare, umi oñemomombyrýva koʼã mbaʼyrúgui,* ojoguáta umi mbaʼyru ojepurúvape umi mbaʼe iñimportántevape g̃uarã, oñesantifikáta, ideprovéchota ijárape, ha oĩta preparádo ojepuru hag̃ua entéro mbaʼe iporãvape g̃uarã. 22 Upévare, ediparáke umi mbaʼe ogustávagui mitãrusukuérape, upéva rangue eñehaʼã ndehústo, ejerovia, eporohayhu ha ndepyʼaguapy. Rejapo vaʼerã umíva umi ojeroviávandi ñande Ruvicháre, pórke haʼekuéra ikorasõ porã.

23 Avei, ani ni mbaʼevéicharõ rejodiskuti vyroreíre ha umi mbaʼe ndovaléivare mbaʼeverã,+ reikuaágui umíva ñorairõmemante opaha. 24 Pórke ñande Ruvicha esklávo ningo natekotevẽi oñorairõ avavéndi, síno tekotevẽ imbaʼeporã* enterovéndi,+ ikatupyry oporomboʼe hag̃ua ha ojejokokuaa ojetrata vai jave chupe.+ 25 Haʼe ohekomboʼe vaʼerã pyʼaguapýpe porãnte umi nohenduséivape ojeʼéva chupe,+ pórke ikatu hína Ñandejára opermiti chupekuéra oñarrepenti* ikatu hag̃uáicha oikuaa porã hikuái pe añetegua.+ 26 Ha péicha opensa porã jeýta hikuái ha osẽta pe Diablo ñuhãgui, pórke haʼekuéra hoʼa kuri iñuhãme ojapo hag̃ua haʼe oipotáva.+

3 Péro eikuaáke umi ára pahápe+ pe situasión ijetuʼúta ha ipeligrósota. 2 Pórke umi hénte ojepyʼapýta ijehénte, iplatarayhúta, oñembotuicháta, oñemombaʼeguasúta, oñeʼẽ vaíta Ñandejárare ha hapicháre, naiñeʼẽrendumoʼãi ituakuérape, imalagradesídota, ombotavýta hapichápe,* 3 ndohayhumoʼãi ihéntepe, ndoikoporãsemoʼãi avavéndi, oñeʼẽ reíta ótrore, ndojejokokuaamoʼãi, isalváheta, ndaijaʼemoʼãi mbaʼeve iporãvare, 4 itraisionérota, ikaprichósota, ijorgullósota, ojapóta chupekuéra ogustávante ohayhu rangue Ñandejárape, 5 haʼetétavaicha oservíva Ñandejárape, péro hekovére ohechaukáta ndoikoiha upéicha.+ Upévare, aníkena arakaʼeve ejeheʼa koʼãichagua héntere. 6 Ha koʼã hénte apytégui osẽta umi kuimbaʼe oporombotavýva, oikéva umi ógape ha ombotavy umi kuña ikangy ha ipekádo hetávape. Koʼã kuña ningo oñemeʼẽ umi deséo orekóvape ikorasõme, 7 haʼekuéra siémpre ostudia, upéicharõ jepe ndaikatúi voínte ontende porã pe añetegua.

8 Janes ha Jambres oñemoĩ haguéicha Moisés rehe, upéicha avei koʼã kuimbaʼe oñemoĩ pe añeteguáre. Koʼã kuimbaʼe iménte kyʼa ha Ñandejára ndoguerohorýi chupekuéra, pórke ndoikói hikuái pe jerovia heʼiháicha. 9 Péro haʼekuéra ndohopukumoʼãvéima, pórke enterove ohechakuaáta itavyraiha hikuái, Janes ha Jambres+ rehe ojekuaa haguéicha avei itavyraiha. 10 Péro nde katu reñatende porã vaʼekue umi mbaʼe che amboʼévare, ha resegi che aiko lája,+ umi mbaʼe che ahupytyséva, ha rehecha mbaʼéichapa che ajerovia, chepasiénsia, aporohayhu ha aaguanta. 11 Avei reikuaa mbaʼéichapa ajepersegi ha ahasa asy vaʼekue Antioquíape,+ Iconio+ ha Lístrape.+ Che aaguanta koʼã jehasa asy ha entéro umívagui ñande Ruvicha chesalva.+ 12 Añetehápe enterove oadoraséva Ñandejárape ipyʼaite guive Cristo Jesús disípuloramo, ojepersegíta+ avei. 13 Péro umi hénte aña ha oporombotavýva oho vai vaive vaʼerã, haʼekuéra ningo ombotavýta ótrope ha chupekuéra avei oñembotavýta.+

14 Péro nde resegi vaʼerã reguerovia umi ótro nemboʼe ha nepytyvõ vaʼekue reguerovia+ hag̃ua. Ha nde reikuaa porã mávaguipa reaprende vaʼekue umíva. 15 Ha nemanduʼa avei nemitã guive+ reikuaa hague Ñandejára Ñeʼẽ,+ ikatúva nemoarandu rejesalva hag̃ua rejerovia rupi Cristo Jesús + rehe. 16 Entéro mbaʼe oĩva Ñandejára Ñeʼẽme ou Ñandejáragui,+ ha ideprovécho ñaporomboʼe hag̃ua,+ ohechauka hag̃ua ñandéve mbaʼépa oĩ vai, jakorrehi hag̃ua entéro mbaʼe, ha ñanemboʼe jajapo hag̃ua umi mbaʼe oĩ porãva,*+ 17 ikatu hag̃uáicha Ñandejára siérvo ikatupyry ojapo hag̃ua entéro mbaʼe, ha oĩ preparádo ojapo hag̃ua opaichagua mbaʼe porã.

4 Ankarga ndéve koʼã mbaʼe Ñandejára renondépe ha Cristo Jesús renondépe, haʼe ohusgáta+ umi oikovéva ha omanóvape+ ág̃a haʼe ojechauka vove+ ha ogoverna vove Irréinope:+ 2 epredikákena Ñandejára ñeʼẽ,+ ha ejapóke upéva kyreʼỹme tahaʼe iporã térã ivai jave la situasión, ehechauka ótrope mbaʼépepa ojavy,+ eñemoñeʼẽ mbarete porã,* emeʼẽ konsého, nepasiénsiakena rejapo hag̃ua entéro koʼã mbaʼe ha ndevaléke reporomboʼe hag̃ua.+ 3 Pórke og̃uahẽta hína pe tiémpo, ha umi hénte ni mbaʼevéicharõ nohendusemoʼãi umi enseñánsa porã.*+ Upéva rangue, ombyatýta hikuái ijerére umi mboʼehára ombojuruheʼẽva chupekuéra omeʼẽ hag̃ua ijupekuéra gústo.+ 4 Haʼekuéra nohendumoʼãi pe añetegua, ha ohendúta umi kuénto japu. 5 Nde katu esegi epensa porã opa mbaʼépe, eaguanta umi mbaʼe vai,+ esegi epredika umi notísia porã,* ha ejapo porã ne rembiapo Ñandejára servísiope g̃uarã.+

6 Pórke che ajogua hína pe ofrénda líkidape+ oñeñohẽva pe altárpe, ha og̃uahẽmbaitéma pe tiémpo areko hag̃ua liverta.+ 7 Che añorairõ pe ñorairõ iporãva,+ adipara pe karréra amohuʼã meve,+ asegi ajerovia Ñandejárare. 8 Ko tiémpo guive ñande Ruvicha oporohusgáva hustísiape,+ oapartáma chéve g̃uarã peteĩ koróna. Ko koróna oñemeʼẽta umi ihústovape.+ Haʼe omeʼẽta chéve upéva peteĩ prémioicha upe díape.+ Ha ndahaʼéi chéve añónte la oñemeʼẽtava, síno enterove umi oipotaitereímavape haʼe ojechauka.

9 Ejapókena ikatumíva guive pyaʼe porã reju hag̃ua che rendápe. 10 Pórke Demas+ chereja rei vaʼekue ohayhu rupi ko múndo* ha oho Tesalónicape, Crescente katu Galáciape, ha Tito Dalmáciape. 11 Lucas añoite oĩ chendive. Eguerúna nendive Márcospe, pórke haʼe tuichaiterei chepytyvõta aservi hag̃ua Ñandejárape. 12 Péro Tíquicope+ amondo kuri Éfesope. 13 Ág̃a reju vove egueru pe ao aku aheja vaʼekue Tróaspe, Carpo rógape. Egueru avei umi kuatiañeʼẽ,* espesiálmente umi ojeskrivi vaʼekue animál pirekuére.*

14 Alejandro, pe ombaʼapóva kóvre rehe, ojapo vaʼekue cherehe heta mbaʼe vai. Jehová* okovráta chupe umi mbaʼe ojapo vaʼekuére.+ 15 Ha nde rejekuida vaʼerã avei chugui, pórke haʼe oñemoĩ mbarete hína pe mensáhe jaikuaaukávare.

16 Añedefende ypýrõ guare pe trivunál renondépe, avave ndoúi chedefende hag̃ua, enterove chereja rei vaʼekue (ajerure Ñandejárape ani hag̃ua okulpa chupekuéra upévare). 17 Péro ñande Ruvicha ojepytaso kuri che ykére ha chemombarete, ikatu hag̃uáicha che rupive pe mensáhe ojepredika oparupiete ha entéro nasión ohendu hag̃ua upéva.+ Ha ñande Ruvicha chesalva pe león jurúgui.+ 18 Ñande Ruvicha ningo chesalváta entéro mbaʼe vaígui, ha chesalváta chegueraha hag̃ua Irréino yvagapeguápe.+ Chupe toñembotuicha pára siémpre ha opa árare. Amén.*

19 Saludomi Prisca* ha Áquilape,+ avei Onesíforo+ rogayguakuérape.

20 Erasto+ opyta kuri Coríntope, péro Trófimope+ aheja Milétope pórke hasykatu. 21 Ejapókena ikatumíva guive reg̃uahẽ hag̃ua inviérno mboyve.

Eubulo oguerahaka ndéve salúdo, avei Pudente, Lino, Claudia ha enterove ermanokuéra.

22 Hiʼãite chéve ñande Ruvicha mbaʼeporãite* ovendesi pe espíritu porã pehechaukáva.