Peteĩ kuimbaʼe ipyʼaguasúva

HETAVÉVO hénte ko Yvy ape ári, hetaitereive oĩ ojapóva mbaʼe vai, Caín ojapohaguéicha. Péro oĩ peteĩ kuimbaʼe idiferénteva. Pe kuimbaʼe héra Enoc. Haʼe ipyʼaguasuvaʼekue. Umi hénte oikóva ijerére iñaña, péro haʼe osegi oservi Ñandejárape.

Ndépa reikuaa mbaʼérepa umi hénte ojapovaʼekue hetaite mbaʼe vai? Epensamína: Mávapa ombodesovedese Adán ha Évape hoʼu hag̃ua pe yva Ñandejára ndoipotaivaʼekue hoʼu? Peteĩ ánhel iñañáva. La Biblia ombohéra chupe Satanás. Haʼe oñehaʼã omoñaña enterovépe.

Peteĩ ára, Jehová omondo Enócpe heʼi hag̃ua umi héntepe peteĩ mbaʼe haʼekuéra nohenduséiva. Enoc heʼi: ‘Peteĩ árape Ñandejára ohundipáta umi iñañávape’. Upéva oiméne ombopochy umi héntepe. Oiméne ojukaserakaʼe hikuái Enócpe. Upévare, Enoc ipyʼaguasuvaʼerã heʼi hag̃ua chupekuéra pe ojapótava Ñandejára.

Ñandejára ndohejái Enoc oikove puku umi iñañáva apytépe. Haʼe oikove 365 áñonte. Mbaʼérepa jaʼe “365 áñonte”? Pórke umi tiémpope yvyporakuéra imbareteve koʼag̃aguágui ha oiko areve. Upéicha; Matusalén, Enoc raʼy, oikove 969 áño!

Ha Enoc omano rire, umi hénte iñañavéntema. La Biblia heʼi haʼekuéra ‘opa árape opensahague ivaívarente’, ha ‘henyhẽhague ko Yvy violénsiagui’.

Ndépa reikuaa mbaʼérepa hetaiterei mbaʼe vai oiko upérõ? Pórke Satanás oiporu peteĩ mbaʼe pyahu ojapouka hag̃ua mbaʼe vai umi héntepe. Jahechami mbaʼépa rakaʼe upéva.