Hentekuéra ojapo peteĩ tórre tuichaitereíva

HETA áñoma ohasa. Noé raʼykuéra hetáma itaʼýra. Ha umi itaʼyrakuéra okakuaapáma, ha oguerekóma avei itaʼyrakuéra. Pyaʼe oĩ jey heta hénte ko Yvy ape ári.

Koʼã hénte apytépe oĩvaʼekue peteĩ Noé visniéto hérava Nemrod. Haʼe iñañavaʼekue; ojagarra ha ojuka animál ha hentekuéra. Nemrod ojapo avei ijehegui rréi, ogoverna hag̃ua hapichakuérape. Ñandejárape g̃uarã noĩporãi pe Nemrod ojapovaʼekue.

Upérõ enterove umi hénte oñeʼẽvaʼekue peteĩ idiómante. Nemrod oipotavaʼekue opyta hikuái oñondivepa ikatu hag̃uáicha ogoverna chupekuéra. Upévare, reikuaa piko mbaʼépa ojapo? Heʼi chupekuéra ojapo hag̃ua peteĩ siuda ha peteĩ tórre tuichaitereíva ipype. Ko taʼangápe ikatu rehecha chupekuéra ojapohápe ladríllo.

Ñandejára Jehová ndoguerohorýi ko tórre ojejapóva. Haʼe oipotavaʼekue umi hénte oho upégui ha oiko opa hendárupi ko Yvy ape ári. Péro haʼekuéra heʼi: ‘Néike! Jajapo peteĩ siuda ha peteĩ tórre ijyvatetereíva og̃uahẽ hag̃uáicha huʼã yvágape. Upéicharõ ñanefamósota!’. Oipotavaʼekue oñemombaʼe chupekuéra, ndahaʼéi Ñandejárape.

Upévare Ñandejára ojoko umi héntegui pe tórre apo. Reikuaápa nde mbaʼéichapa ojapo upéva? Oñepyrũ oñeʼẽ hikuái diferénte idiómape, oñeʼẽrangue peteĩmente. Noñontendevéima hikuái. Upévare pe siuda oñemboheravaʼekue Babel, térã Babilonia, heʼiséva “Konfusión”.

Koʼág̃a umi hénte oñepyrũ oho Babélgui. Umi oguerekovaʼekue peteĩ ñeʼẽ oho oiko oñondive ótro henda rupi ko Yvy ape ári.