Ojesalva hikuái peteĩ íslape

EMAÑAMÍNA! Pe várko oñapymipotaite! Opẽmbaite ohóvo! Rehechápa umi hénte ojepoivaʼekue ýpe? Oĩ umi og̃uahẽmava pe y rembeʼýpe. Oĩ piko Pablo avei ijapytepekuéra? Jahechamína mbaʼépa ojehúraʼe chupe.

Nemanduʼáne Pablo ohasahague dos áño kárselpe Cesaréape. Upéi, Pablo ha umi ótro présope, ojehupi peteĩ várkope ojegueraha hag̃ua Rómape. Ohasávo hikuái pe ísla hérava Creta ypy rupi, ojagarra chupekuéra peteĩ yvytu hatãitereíva ha umi kuimbaʼe ndaikatúi ogueraha porã pe várko. Ndohechái hikuái pe kuarahy ni estrellakuéra. Heta día ohasa rire, umi oviaháva oimoʼãma ndojesalvamoʼãiha.

Upémaramo Pablo oñemboʼy ha heʼi chupekuéra: ‘Ni peteĩ napemanomoʼãi; ko várko añoite oñehundíta. Ange pyhare Ñandejára ánhel ou che rendápe ha heʼi chéve: “Ani rekyhyje, Pablo! Nde reg̃uahẽvaʼerã mburuvicha guasu César rendápe. Ha Ñandejára osalvapaitéta umi nendive oviahávape”’.

Ohasa rire 14 día oñepyrũhague pe torménta pe pyharepyte rupi umi marinéro oñandukuaa sapyʼa pe y ipererĩveha ohóvo! Okyhyjégui ochokárõ g̃uarã itáre pe pytũmbýpe, oity hikuái ánkla. Koʼẽmba rire ohecha hikuái pe y rembeʼy, ha oñehaʼã omog̃uahẽ pe várko upepeve.

Og̃uahẽta jave, pe várko ochoka peteĩ yvykuʼi atýre ha opyta upépe. Pe y opuʼãva ojejapete pe várkore ha oñepyrũ omopẽmbaite. Pe militár oñangarekóva pe várkore osẽ heʼi: ‘Peẽ peʼytakuaáva, pejepoi ha peʼyta peg̃uahẽ hag̃ua pe y rembeʼýpe. Upéi tojepoi umi ndoʼytakuaáiva ha tojejagarra oimeraẽ várko pehenguére ovevúi hag̃ua’. Upéicha ojapo hikuái, ha umi 276 oĩvaʼekue pe várkope ojesalvapaite, heʼihaguéicha pe ánhel.

Pe ísla héra Malta. Umi hénte upépe ipyʼaporãiterei, ha oñangareko hesekuéra. Pe ára iporãve rire, ojehupi Páblope ótro várkope ha ojegueraha Rómape.