Lección 8

Peteĩ familia Ñandejára oguerohorýva

Mbaʼe lugárpa oguereko ména ogapýpe? (1)

Mbaʼéichapa oguerekovaʼerã ména hembirekópe? (2)

Mbaʼe responsabilidad piko oguereko túva? (3)

Mbaʼépa ojapovaʼerã ogapýpe tembireko? (4)

Mbaʼépa Ñandejára ojerure túva, sy ha taʼyrakuéragui? (5)

Mbaʼépa heʼi la Biblia separación ha divórciogui? (6, 7)

1. La Biblia heʼi ména omoakãvaʼerãha ifamília. (1 Corintios 11:3.) Kuimbaʼe oguerekovaʼerã peteĩ tembirekónte, ha omendavaʼerã ley heʼiháicha. (1 Timoteo 3:2; Tito 3:1.)

2. Ména ohayhuvaʼerã hembirekópe haʼe ojehayhuháicha. Oguerekovaʼerã chupe Jesús oguerekoháicha hemimboʼekuérape. (Efesios 5:25, 28, 29.) Mbaʼeveichavérõ noinupãivaʼerã ha ndoguereko vai vaʼerãi chupe. Upéva rangue omombaʼe ha orrespetavaʼerã hembirekópe. (Colosenses 3:19; 1 Pedro 3:7.)

3. Túva ombaʼapo mbarete vaʼerã oñangareko hag̃ua ifamíliare. Omoĩvaʼerã tembiʼu, ao ha óga hembireko ha itaʼyrakuérape. Oñangarekoʼarã avei pe necesidad espiritual oguerekóva ifamília. (1 Timoteo 5:8.) Haʼe oñemotenondevaʼerã oipytyvõ hag̃ua ifamíliape oikuaave hag̃ua hikuái Ñandejára ha ipropósitogui. (Deuteronomio 6:4-9; Efesios 6:4.)

4. Tembireko oipytyvõkuaavaʼerã iménape. (Génesis 2:18.) Oipytyvõvaʼerã chupe omboʼévo ifamiliakuérape. (Proverbios 1:8.) Jehová oipota tembireko oñangareko ifamíliare mborayhúpe. (Proverbios 31:10, 15, 26, 27; Tito 2:4, 5.) Kuña oguerekovaʼerã tuicha respeto iménare. (Efesios 5:22, 23, 33.)

5. Ñandejára ojerure taʼyrakuérape iñeʼẽrendu hag̃ua itúva ha isýpe. (Efesios 6:1-3.) Haʼe ohaʼarõ avei tuvakuéra omboʼe ha ombohekoporã taʼyrakuérape. Tuvakuéra ohasavaʼerã tiempo taʼyrakuérandi ha ojapo estudio bíblico hendivekuéra, ha upéicha oñangareko hesekuéra espiritual ha emocionalmente. (Deuteronomio 11:18, 19; Proverbios 22:6, 15.) Mbaʼeveichavérõ ndodisciplinaiʼarã taʼyrakuérape pyʼahatãre térã mbaretépe. (Colosenses 3:21.)

6. Umi omendáva ikatuʼỹva ojogueraha porã, oñehaʼãvaʼerã oiporu consejo oĩva Bíbliape. La Biblia oipota japorohayhu ha japoroperdona. (Colosenses 3:12-14.) Ñandejára Ñeʼẽme ndojehechaporãi pe separación ojerresolve hag̃ua umi problema saʼi. Upevére, tembireko ikatu oheja iménape koʼã mbaʼére: 1) nomanteneséigui ifamíliape, 2) oiporuetereígui violencia ikatu ombohasy térã ojuka chupe ha 3) oñemoĩ mbarete hembirekóre ha upévagui haʼe ndaikatúi omeʼẽ adoración Jehovápe. (1 Corintios 7:12, 13.)

7. Omendáva ojeroviavaʼerã ojuehe. Ñemoakãratĩ haʼe peteĩ pecado Ñandejárare ha ména térã tembirekóre. (Hebreos 13:4.) Oĩro ñemoakaratĩ añoite ikatu ojejapo divorcio oñemenda jey hag̃ua (Mateo 19:6-9; Romanos 7:2, 3.) Jehová ohecha vaieterei oĩrõ ojedivorcia ha omenda jeýva ndaipórirõ base Bíblica. (Malaquías 2:14-16.)

[Nóta oĩva taʼanga ndive páhina 16 ha 17]

Ñandejára ohaʼarõ tuvakuéra omboʼe ha omboheko porã taʼyrakuérape

[Nóta oĩva taʼanga ndive páhina 17]

Túva oporohayhúva omoĩmbaite oñekotevẽva hogapýpe: material ha espiritual