Lección 12

Ñamombaʼevaʼerã ñande rekove ha ñande ruguy

Mbaʼéichapa jahechavaʼerã ñande rekove? (1) Ha aborto? (1)

Mbaʼéichapa ohechauka cristianokuéra ojepyʼapyha ijehe? (2)

Ivaípa jajuka mymbakuéra? (3)

Mbaʼe mbaʼépa ojejapo noñemombaʼéigui tekove? (4)

Mbaʼépa heʼi tuguýre Ñandejára ley? (5)

Oiképa avei upépe tuguy ñemoĩ? (6)

1.Jehová haʼe tekove Meʼẽha. Opa tekove oĩva oiko Ñandejára oipotágui. (Salmo 36:10 [36:9, NM].) Pe tekove haʼe tuichaiterei mbaʼe Jehovápe g̃uarã. Mitã rekove neʼĩrava onase, upéva jepe mbaʼe guasu Jehovápe. Ñandejárape g̃uarã ivai ojejuka pe mitã oñeformavahína. (Éxodo 21:22, 23; Salmo 127:3.)

2.Cristiano añetegua ojepyʼapy ha oñangareko ijehe. Oñehaʼã omoĩ porã imbayruguata ha hogakuéra, ani hag̃ua ojehu mbaʼeve ivaíva. (Deuteronomio 22:8.) Ñandejárape oservíva ndojapói mbaʼeve ikatuvaʼerã oapeligra hekove vyʼa rehehápe. Upévare nohaʼãi mbaʼeveichagua deporte oĩháme violencia ikatúva ojapovai hapicháre. Omboyke opaichagua juego omokyreʼỹva violencia. (Salmo 11:5; Juan 13:35.)

3.Ñande Apohare omombaʼeguasu avei mymbakuéra rekove. Cristiano ikatu ojuka mymbakuéra hoʼu hag̃ua, oñemonde térã oñeñangareko hag̃ua mbaʼasy ha ambue pelígrogui. (Génesis 3:21; 9:3; Éxodo 21:28.) Upéicharõ jepe naiporãi oñenupa térã ojejuka mymbakuéra depórtegui rei térã vyʼarãnte. (Proverbios 12:10.)

4.Jepita ha jesuʼu petỹ térã droga ojeporúva vyʼarã ndahaʼéi cristiánope g̃uarã. Koʼã mbaʼe ojejapóva naiporãi 1) ojapógui ñandehegui hembiguái, 2) ombyaígui ñande rete ha 3) ñanemongyʼágui. (Romanos 6:19; 12:1; 2 Corintios 7:1.) Ikatu hasy jaheja koʼã vicio vai, upevére ñambovyʼasérõ Jehovápe tekotevẽ jaheja umi mbaʼe.

5.Pe tuguy haʼe avei tuicha mbaʼe Ñandejárape g̃uarã. Haʼe heʼi pe alma, ñande rekove, oĩha ñande ruguýpe. Upévare tuguy ndojeʼuivaʼerã. Upéicha avei naiporãi jaʼu mymba roʼo ndojehuguyʼóirõ hekopeporã. Oime rire peteĩ mymba ojejuvy térã omano ñuhãme, ndojeʼuivaʼerã. Ojejuka rire kyse térã mbokápe, pyaʼe ojehuguyʼovaʼerã ikatu hag̃ua ojeʼu. (Génesis 9:3, 4; Levítico 17:13, 14; Hechos 15:28, 29.)

6.Oĩ vaípa ñamoĩ tuguy ñande retepýpe? Nemanduʼáke Jehová ojerureha jajejoko hag̃ua tuguýgui. Kóva heʼise ndaikatuiha ñamoĩ ñande retepýpe, mbaʼeveichavérõ, ñande rapicha ruguy, térã ñande ruguy oñeñongatuvaʼekue. (Hechos 21:25.) Upévare cristiano añetéva nomoĩkái tuguy ijupe. Pero ikatu oiporu tratamiento ndoguerekóiva tuguy. Haʼekuéra oikovese, upéicharõ jepe nomboykemoʼãi Ñandejára ley osalvapotávo hekove. (Mateo 16:25.)

[Nóta oĩva taʼanga ndive páhina 25]

Ñambovyʼa hag̃ua Ñandejárape, ñamboykevaʼerã tuguy ñemoĩ, vicio kyʼa ha oimeraẽ mbaʼe ikatúva ojapo vai ñanderehe