¿Mbaʼérepa ijetuʼu jajapo iporãva?

¿MÁVAPA ovyʼa raʼe Saulo ojapórõ guare ivaíva?... Satanás, ha avei umi omoakãva umi hudío rrelihión. Sáulogui oiko vaʼekue Jesús disípulo ha oñepyrũ oñehenói chupe Pablo. Umi kuimbaʼe omoakãva umi hudíope katu oñepyrũ ndochaʼéi Páblore. ¿Rehechápa mbaʼérepa ijetuʼu Jesús disipulokuérape ojapo hag̃ua iporãva?...

Peteĩ jey, pe saserdóte guasu Ananías oinupãka Páblope ijurúrupi. Ha upéi katu oguerahakasemoʼã chupe kárselpe. Haʼe heta ohasa asy oiko rupi chugui Jesús disípulo. Por ehémplo, umi hénte aña ombyepoti ha oñehaʼã voi ojuka Páblope ojapívo chupe umi ita tuichaichávape (Hechos 23:1,2; 2 Corintios 11:24, 25).

Oĩ heta ojapokaséva ñandéve mbaʼe vai. Upévare iporãta ñañeporandu: “¿Ajaposépa che pyʼaite guive umi mbaʼe porã? ¿Ajapónepa oĩramo jepe ndochaʼéiva cherehe?”. Ñandepyʼaguasu vaʼerã upearã, ¿ajépa?...

Ikatu ere: “¿Mbaʼére piko oĩta ndochaʼéiva ñanderehe jajapo haguére iporãva? ¿Ndovyʼái vaʼerã piko hikuái upévare?”. Ha añetehápe upéicha vaʼerã. Por ehémplo, oĩ vaʼekue heta ohayhúva Jesúspe ojapo haguére mbaʼe porã. Peteĩ díape, entéro oikóva peteĩ siudápe ohopaite Jesús oĩháme, haʼe omonguera rupi umi hasývape (Marcos 1:33).

Péro sapyʼánte umi héntepe ndogustái Jesús omboʼéva. Haʼe siémpre heʼi pe añetegua, ha heta ndochaʼéi hese upévare. Péicha oiko vaʼekue hese ohórõ guare pe lugár okakuaa haguépe hérava Nazaret. Upérõ guare, Jesús oho oike sinagógape, pe lugár umi hudío oñembyatyhápe oadora hag̃ua Ñandejárape.

Upépe Jesús oñepyrũ omboʼe chupekuéra Ñandejára Ñeʼẽ. Ñepyrũrã umi hénte ohenduse chupe iporãitereígui umi mbaʼe heʼíva. Haʼekuéra ohecharamoiterei chupe ha ni ndoroviaséi okakuaa hague ipuevlopekuéra.

Péro upéi Jesús heʼi chupekuéra Ñandejára imbaʼeporã hague avei umi ndahaʼéivandi hudío. Ha ohendúvo upéva umi hénte ipochy hendive. ¿Reikuaápa mbaʼérepa?... Umi hudío opensa iñimportanteveha umi ótrogui ha oimoʼã Ñandejára imbaʼeporãha hendivekuéra añónte. Upévare ndochaʼéi Jesús rehe péicha heʼi haguére. ¿Reikuaápa mbaʼépa ojaposemoʼã hikuái?...

La Biblia heʼi: ‘Oguenohẽ hikuái Jesúspe upe siudágui, ha ogueraha peteĩ sérro ruʼãme oity hag̃ua chupe upégui. Péro Jesús ojei chuguikuéra ha ohopa hese’ (Lucas 4:16-30).

Oikóramo nderehe péicha, ¿reho jeýnepa upéi reñeʼẽ chupekuéra Ñandejárare?... Ndepyʼaguasu vaʼerã rejapo hag̃ua upéicha, ¿ajépa?... Jesús oho jey vaʼekue Nazarétpe ohasa rire un áñorupi. La Biblia heʼi: “Og̃uahẽ rire ivállepe oñepyrũ oporomboʼe umi sinagogahárupi”. Oĩramo jepe ndohayhúiva Ñandejárape, Jesús ndokyhyjéi ha omboʼe meme umi héntepe (Mateo 13:54).

Ótro día, peteĩ sábado, Jesús oĩ jave sinagógape oĩ avei upépe peteĩ kuimbaʼe hasýva, ndaikatúiva omonguʼe ipo. Ñandejára ningo omeʼẽ vaʼekue Jesúspe podér oporomonguera hag̃ua. Péro oĩ únos kuánto kuimbaʼe omoprovlemaséva chupe. ¿Mbaʼépa ojapo pe Mboʼehára Guasu?... Oporandu chupekuéra: ‘Peguerekóramo peteĩ ovecha hoʼáva pendehegui yvykuápe peteĩ sábado ¿napenohẽmoʼãipa upégui?’.

Chupekuéra oñemanda vaʼekue opytuʼu vaʼerãha sabadokue. Péro katuete oguenohẽne hikuái ijovecha tahaʼe jepe raʼe sábado. Upévare Jesús heʼi: ‘Iporãvéntema ñaipytyvõ ñande rapichápe sabadokue, pórke peteĩ kuimbaʼe iñimportanteve peteĩ ovechágui’. Péicha haʼe ohechauka omonguera vaʼerãha pe kuimbaʼépe.

Jesús heʼi pe kuimbaʼe hasývape: “Eipyso nde po”, ha ojapóvo upéva okueraite. ¡Pe kuimbaʼe ningo ovyʼaiterei! Péro, ¿ovyʼápa avei umi ótro?... Nahániri, ndochaʼeivéntema Jesús rehe. Haʼekuéra osẽ upégui ha okalkula mbaʼéichapa ikatu ojuka chupe (Mateo 12:9-14).

Koʼág̃a avei jajapórõ jepe iporãva, lomímonte oĩta ndochaʼéiva ñanderehe. Upévare ñapensa vaʼerã mávapepa ñambovyʼase. Oimérõ ñambovyʼase Jehová ha Jesúspe, jajapo vaʼerã siémpre haʼekuéra heʼíva. Péro, ¿mávapa ndochaʼemoʼãi ñanderehe upévare? ¿Mávapa oipota jajapo umi mbaʼe vai?...

Satanás. ¿Ha oĩvépa ótro?... Avei umi tapicha Satanás ombotavýva ojapo hag̃ua mbaʼe vai. Jesús heʼi vaʼekue umi rrelihión omoakãvape: “Pende ru ningo pe Aña ha peẽ pejapose haʼe oipotáva” (Juan 8:44).

Oĩ heta hénte ojapóva Satanás oipotáva. Jesús ohenói chupekuéra ‘múndo’. ¿Mbaʼépa ndéverõ g̃uarã pe ‘múndo’ Jesús oñeʼẽ hague?... Jahekamína Juan, kapítulo 15, versíkulo 19, upépe Jesús heʼi: “Peẽ peikórire ko múndoicha, haʼekuéra penderayhu vaʼerãmoʼã. Péro peẽ ndapejeheʼái ko múndore, che poiporavóma rupi ko múndogui, upévare haʼekuéra ndaijaʼéi penderehe”.

Upéicharõ, pe múndo haʼe hína umi tapicha ndojapóiva pe Mboʼehára Guasu heʼíva. ¿Mbaʼérepa ndaijaʼéi hikuái Jesús disipulokuérare?... Epensamína: ¿mávapa ko múndo ruvicha?... La Biblia heʼi: “Ko múndo kompletoite oĩ pe aña poguýpe”. Pe aña hína Satanás (1 Juan 5:19).

¿Rehechámapa mbaʼérepa ijetuʼu jajapo umi mbaʼe iporãva?... Satanás ha imúndo oñemoĩ rupi ñane kóntrape. Péro ndahaʼéi upévare añónte. ¿Nemanduʼápa mbaʼérepa avei?... Kapítulo 23-pe jahecha kuri enterovéva ñanaseha pekadór. Javyʼaiténe ndaiporivéi vove pe pekádo ha oñehundívo Satanás ha imúndope, ¿ajépa?...

La Biblia heʼi: ‘Ko múndo ohasa ohóvo’. Upéva heʼise oñehunditaha umi ndahaʼéiva guive pe Jesús disípulo. Péro, ¿mávapa oikóta opa ára g̃uarã?... La Biblia heʼi avei: “Pe ojapóva Ñandejára rembipota opyta opa ára g̃uarã” (1 Juan 2:17). Umi ojapóva Ñandejára heʼíva añoite ikatúta oiko opa ára g̃uarã pe paraísope. Upévare, ijetuʼúramo jepe ikuentave jajapo umi mbaʼe iporãva ¿ajépa?...