Moõpa ohohína ko múndo?
Umi notísia oñemeʼẽva ko múndope henyhẽ provlémagui ha heta mbaʼe vaieterei oikóvagui. Mbaʼépa añetehápe heʼise umi mbaʼe?
SEGURIDA PERSONÁL: Oñemoĩ vómba merkadohárupi. Maéstro ha alumnokuéra ojejapipa peteĩ eskuélape. Mitãnguéra ojesekuestra ituvakuéragui peteĩ tesapirĩme. Araitépe ojeasalta kuña ha karai itujávape.
RRELIHIONKUÉRAPE OIKÓVA: Rrelihionkuéra oipytyvõ umi grúpo oñorairõvape. Heta líder rrelihiósore oñemboja jejuka guasu oikovaʼekue. Umi iglésia omoʼã umi saserdóte oavusávape seysuálmente mitãnguérare. Heta iglésiama oñevende mbovyeterei ojehógui upépe.
MÉDIO AMBIÉNTE: Viru rehehápe ojeitypa ohóvo yvyra matakuéra. Hentekuéra imboriahúva oitypa umi kaʼaguy jepeʼarã. Y oĩva yvyguýpe oñekontamina ha ombyai pe y jaʼúva. Péska rehe ojapo vaieterei yty omombóva umi industriakuéra ha umi téknika ojeporúva koʼág̃a oñeguenohẽ hag̃ua pira. Kontaminasióngui ndaikatuvéima jarrespira porã.
JEPOREKA TEMBIʼURÃRE: Pe viru ohupytýva peteĩ oikóva África subsahariana-pe ndohasái 480 dólar un áñope. Oĩ empresário ipláta potágui ohundíva iñempresakuéra ha ohejáva hetaitereípe travahoʼỹre. Inversionistakuérape oñembotavy ha upévare operdepaite ipláta ombyatyvaʼekue.
ÑEMBYAHÝI: Ko múndope, oĩ ochocientos millones rupi oñenóva pyʼa nandi reheve.
GÉRRA: Pe síglo XX-pe oikovaʼekue heta gérra ha umívape oñemano cien millones rupi. Koʼág̃a ojeguereko arma nuclear oñehundi hag̃uáicha heta vése ko múndo. Heta gérra sivíl oiko. Terrorísmo oĩ opárupi.
PÉSTE HA OPAICHAGUA MBAʼASY: Pe 1918 guive gripe española-gui oñemano 21.000.000 rupi. Pe sida haʼe koʼág̃a “pe mbaʼasy tuichavéva oĩva opárupi ha pe ivaivéva ojekuaáva la istóriape”. Pe jehasa asy oguerúva pe cáncer ha umi mbaʼasy korasõ rehegua ndaijokohái.
Eñehaʼã ehecha mbaʼépa ohechauka ñandéve koʼã notísia. Oikópa koʼã mbaʼe peteĩ hendápente? Térãpa oiko oparupiete ha heʼise tuichave mbaʼe?
[Rrekuádro oĩva páhina 5-pe]
Añetehápepa Ñandejára ojepyʼapy ñanderehe?
Oĩ heta ñande rapicha ojepyʼapýva umi mbaʼe vaiete oikóvare ko múndope térã opytavaʼekue mbaʼeveʼỹre. Umíva oñeporandu mbaʼérepa Ñandejára ndojapói mbaʼeve ojoko hag̃ua koʼã mbaʼe.
Ñandejára ojepyʼapy ñanderehe. Haʼe ohechauka ñandéve peteĩ tape iporãva ha omeʼẽ ñandéve tuicha pyʼaguapy (Mateo 11:28-30; 2 Timoteo 3:16, 17). Haʼe ohecháma mbaʼéichapa oipeʼaitéta pe violénsia, mbaʼasy ha ñemano. Upéva ohechauka haʼe ojepyʼapyha la héntere, ndahaʼéi peteĩ tetãmeguáre añónte, síno opavave tetãme oĩvare, trívu ha opaichagua ñeʼẽ oguerekóvare (Hechos 10:34, 35).
Mbaʼeichaitépa ñañeinteresa Ñandejárare? Ndépa reikuaa mávapa pe yvága ha Yvy Apohare? Mbaʼéichapa héra? Mbaʼépa ojapóta yvyporakuérape g̃uarã? Koʼã porandu oñekontesta la Bíbliape. Upépe Ñandejára voi omombeʼu ñandéve mbaʼépa ojapohína oipeʼaite hag̃ua pe violénsia, mbaʼasy ha ñemano. Ha ñande jahupytyséramo koʼã mbaʼe porã, mbaʼépa jajapovaʼerã? Tekotevẽ jaikuaa mávapa ñande Apohare ha mbaʼépa ojapóta, ha avei jajeroviavaʼerã hese (Juan 3:16; Hebreos 11:6). Tekotevẽ avei jajapo umi mbaʼe Ñandejára ojeruréva ñandehegui (1 Juan 5:3). Ndépa rejapose upéva ha rehechauka upéicha reñeinteresaha Ñandejárare?
Jaikuaa hag̃ua mbaʼérepa Ñandejára oheja oiko hetaite mbaʼe vai koʼág̃a rupi, tekotevẽ ñantende porã peteĩ mbaʼe iñimportantetereíva omyesakãva la Biblia. Upéva jatopáta ko follétope páhina 15-pe.