Moõ gotyópa oho nde rekove?
• Heta ñande rapicha ojepyʼapy hembiapórente. Upévare hasy oñeporandu hag̃ua moõ gotyópa ohohína hekove.
• La Biblia omombeʼu oĩha ñane renonderã heta mbaʼe iporãitereíva. Avei heʼi ñandéve umi yvyporakuéra institusión oguerekotaha peteĩ kámbio tuichaitereíva ko múndope. Ñañevenefisia hag̃ua ko mbaʼégui ha jajei hag̃ua umi mbaʼe vai oikótavagui, tekotevẽ ñañemonguʼe koʼag̃aitéma voi.
• Oĩ umi oikuaáva la Bíbliape oĩva ha oñehaʼãva ojapo pe heʼíva, péro oheja umi jepyʼapy oguerekóva ogueraha chupekuéra ótro tape rupi.
• Ndépa revyʼa pe tape resegíva reheve? Rejeprepara jave rejapo hag̃ua peteĩ mbaʼe, rehechápa mbaʼe konsekuénsiapa oguerekóta upe rire?
[Taʼanga ha rrekuádro oĩva páhina 7-pe]
Mbaʼépa iñimportanteve ndéve g̃uarã?
Mbaʼe lugárpa oguereko nde rekovépe koʼã mbaʼe jahechátava? Eñepyrũ emohenda mávapa iñimportanteve ndéve g̃uarã.
Iñimportánteramo jepe koʼã mbaʼe ñande rekovépe, ndépa mbaʼe remotenondéta?
... Umi mbaʼe ajapóva vyʼarã
... Tembiapo térã profesión
... Tesãi
... Vyʼa
... Che ména térã che rembireko
... Che tuvakuéra
... Che raʼykuéra
... Peteĩ óga porã ha ao iporãva
... Aikose pe ivalevévaramo
... Aservi Ñandejárape
[Rrekuádro oĩva páhina 10 ha 11-pe]
Nepytyvõpa umi desisión rejapóva rehupyty hag̃ua umi méta reguerekóva?
EJEPYʼAMONGETAMI KOʼÃ PORANDÚRE
UMI MBAʼE AJAPÓVA VYʼARÃ: Aiporavópa umi mbaʼe ikatuvaʼerã chembohetiaʼe jey? Térãpa chegustave umi mbaʼe ipeligrósova ikatúva ojapo vai cherehe térã chereja ndavalevéi? Ahasépa ‘avyʼa’ sapyʼami apytátaramo jepe ambyasy are upe rire? Ndajapóiramo jepe mbaʼeve ivaíva, aiporuetereípa tiémpo vyʼa rapykuéri ha upévare amboyke umi mbaʼe iñimportantevéva?
TEMBIAPO TÉRÃ PROFESIÓN: Ambaʼapópa añemantene hag̃uánte térãpa che traváho cheguereko peteĩ esklávoicha? Ojeʼépa chéve ajapo hag̃ua che mbaʼapohápe umi mbaʼe ojapo vaítava cherehe? Ambaʼaposevépa heta óra aganave hag̃ua, aĩ rangue che rembireko térã che raʼykuéra ndive? Ojeʼéramo chéve ajapo hag̃ua peteĩ mbaʼe ipohýitava che konsiénsiape térã omboykéva umi interés espirituál, ajapópa ani hag̃ua añemosẽ che travahohágui?
TESÃI: Añehaʼãpa añeñangareko cheresãi hag̃ua, térãpa nañangarekoporãi chejehe? Añeʼẽpa upévarente añomongeta jave che rapichándi? Añehaʼãpa añangareko chejehe añatende porã hag̃ua che famíliare?
VYʼA: Haʼépa upéva pe iñimportantevéva chéve g̃uarã? Amotenondépa chéve chembovyʼáva amotenonde rangue che ména, che rembireko térã che famíliape ombovyʼáva? Avyʼasépa Ñandejára oipotaháicha ovyʼa peteĩ oservíva chupe?
CHE MÉNA TÉRÃ CHE REMBIREKO: Ahechápa che ména térã che rembirekópe che irũramo aikotevẽ javénte? Arrespeta ha amombaʼépa chupe omereseháicha? Pe fe aguerekóva rupi, mbaʼépa apensa che ména térã che rembirekóre?
CHE TUVAKUÉRA: Chemitãramo gueteri, cheñeʼẽrendúpa che tuvakuérape arrespetávo chupekuéra? Ajapópa umi tembiapo ohejavaʼekue chéve ogapýpe ajapo hag̃ua? Ajúpa che rógape pe óra haʼekuéra heʼívape? Ajapópa umi mbaʼe naiporãiva chupekuéra térãpa ajeheʼápa umi haʼekuéra ndoipotáivare? Ha oiméramo akakuaapáma, arrespetápa che tuvakuérape ahendúvo pe heʼíva? Aipytyvõpa chupekuéra oikotevẽ jave? Mbaʼéichapa atrata chupekuéra: che aipotaháicha térãpa heʼiháicha Ñandejára Ñeʼẽ?
CHE RAʼYKUÉRA: Akumplípa che rresponsavilida amboʼévo chupekuéra heko potĩ hag̃ua, térãpa aipota upéva oñemboʼe chupekuéra eskuélapente? Ahasápa tiémpo che raʼykuéra ndive, térãpa aheja umi hugéte, televisión térã komputadóra oñangareko hesekuéra? Akorrehípa chupekuéra ndojapói jave Ñandejára heʼíva térãpa chepochy javénte?
PETEĨ ÓGA PORÃ HA AO IPORÃVA: Mbaʼérepa iñimportánte chéve g̃uarã pe amondéva ha umi mbaʼe aguerekóva? Ajehechauka hag̃ua che vesinokuérape térãpa che família oiko porãve hag̃ua? Térãpa aservígui Ñandejárape?
AIKOSE PE IVALEVÉVARAMO: Iñimportántepa chéve g̃uarã ajapo porã che rembiapo? Añehaʼãpa opáicha rei chevaleve hag̃ua che rapichakuéragui? Ndachegustáipa oĩramo ivalevéva chehegui?
ASERVI ÑANDEJÁRAPE: Mbaʼépa iñimportanteve chéve g̃uarã: Ñandejára aprovasión, che ména térã che rembireko, che raʼykuéra, che tuvakuéra térã che patrón aprovasión? Ambotapykuétapa Ñandejára servísio ikatu hag̃uáicha aiko porã ajepyʼapyʼỹre?
EANALISA PORÃ KOʼÃ KONSÉHO OMEʼẼVA LA BIBLIA
Mbaʼe lugárpa oguereko Ñandejára nde rekovépe?
Eclesiastés 12:13: ‘Ekyhyje Ñandejáragui ha ejapo pe heʼíva. Pórke kóva haʼepaite yvypóra rembiaporã’.
EÑEPORANDU: “Chépa ajapoʼaína ko mbaʼe? Ajapópa aikóvo Ñandejára oipotaháicha umi ovligasión aguerekóva che famíliape, che mbaʼapohápe ha che estúdiope? Térãpa ameʼẽ Ñandejárape pe tiémpo hembýva chéve umi ovligasión ha jepyʼapy aguerekóvaguinte?”.
Mbaʼeichagua rrelasiónpa reguereko Ñandejárandi?
Proverbios 3:5, 6: ‘Ejerovia Jehováre nde pyʼaite guive, ha ani rejevale ne arandúre. Opa umi rejapóvape nemanduʼáke hese, ha haʼe voi omoporãta umi nde rape’.
Mateo 4:10: ‘Jehová nde Járape readoravaʼerã, ha chupe añoite remeʼẽvaʼerã servísio sagrádo’.
EÑEPORANDU: “Aguerekópa peichagua rrelasión Ñandejárandi? Ojehechápa cherehe ajeroviaha ha aadoraha Ñandejárape umi ajapóvare, ha ahechaukápa upéva ambohovái jave umi situasión ijetuʼúva?”.
Mbaʼe importánsiapa remeʼẽ pe léktura ha estúdio vívlikope?
Juan 17:3: ‘Kóva heʼise jeikove opaʼỹva, toguerekove ohóvo hikuái konosimiénto ndehegui, Ñandejára añetegua peteĩetéva, ha upe nde rembouvaʼekuégui, Jesucristo’.
EÑEPORANDU: “Aleéramo Ñandejára Ñeʼẽ ha ajepyʼamongeta hese, ahechaukápa agueroviaha ko téystope heʼíva upe ajapóva rupi?”.
Mbaʼe importánsiapa remeʼẽ umi rreunión kristiánape?
Hebreos 10:24, 25: ‘Ñañehaʼãkena ojuehe ñañomokyreʼỹ hag̃ua mborayhu ha tembiapo iporãvape, jahejaʼỹre rreunión, [...] ha koʼýte koʼág̃a pehechámarõ pe ára hiʼag̃uimaha’.
Salmo 122:1: ‘Avyʼaite ojeʼérõ guare chéve: “Jaha Jehová rógape”’.
EÑEPORANDU: “Ojehechápa cherehe amombaʼeha ko Ñandejára Ñeʼẽ heʼíva? Ndaháiparaʼe peteĩ rreunionhápe pe més ohasavaʼekue amotenondégui ambue mbaʼe?”.
Remombeʼúpa kyreʼỹme nde rapichakuérape mbaʼe propósitopa oguereko Ñandejára?
Mateo 24:14: ‘Koʼã marandu porã rréino rehegua ojekuaaukavaʼerã opa ojeikoha rupi testimoniorã [...] ha upe rire og̃uahẽta pe fín’.
Mateo 28:19, 20: ‘Tapeho, upéicharõ, ha pejapo disípulo tapichakuéragui oĩva opa tetã rupi, [...] pemboʼe chupekuéra ojapo hag̃ua opa umi mbaʼe che haʼevaʼekue peẽme’.
Salmo 96:2: ‘Pepurahéi Jehovápe, pevendesi héra. Káda día ohasáva pemombeʼu umi marandu porã pe salvasión haʼe oguerútavagui’.
EÑEPORANDU: “Amombaʼeguasúpa ko tembiapo? Ahechaukápa pe ajapóvare ko tembiapópe aikuaa porãha mbaʼe tiémpopepa jaiko?”.