PÁRTE 12
Konsého ñanepytyvõva jaiko porãve hag̃ua
Proverbios kuatiañeʼẽ ohai Salomón ha ambue kuimbaʼe. Upépe jatopa hetaiterei konsého iporãitereíva oúva Ñandejáragui
IPORÃPA ñañemoĩ Jehová poguýpe? Jaikuaa hag̃ua tekotevẽ jahechami umi konsého omeʼẽva ñandéve Iñeʼẽme. Umíva ñanepytyvõ jaiko porãve hag̃ua. Proverbios kuatiañeʼẽme jatopa hetaiterei konsého opa mbaʼépe g̃uarã. Jahechamína.
Ñaime porã hag̃ua Ñandejárandi. Ñaime porã hag̃ua Jehovándi tekotevẽ jajerovia hese. Salomón heʼivaʼekue: ‘Ejeroviáke nde pyʼaite guive Ñandejárare, ha ani ndejehénte. Nemanduʼáke hese opaite mbaʼépe, ha Haʼe omyesakãta ndéve nde raperã’ (Proverbios 3:5, 6, ÑÑB). Mbaʼéichapa jahechauka jajeroviaha Ñandejárare? Jahejávo haʼe ñanesãmbyhy ha jajapopaite heʼíva. Péicha jajapo mokõi mbaʼe iporãitereíva: ñambopyʼarory ñande Ru yvagapeguápe, ha jahechauka Satanás haʼeha peteĩ tekove japu ha ñeʼẽ rei (Proverbios 27:11).
Ñande rogapy ha ñane amigokuéra. Koʼág̃a rupi entéro família oikotevẽterei Ñandejárare. Upévare Haʼe heʼi menakuérape: “Evyʼa ne rembireko ndive pe kuña remenda hague, nemitãme gueteri”. Péva heʼise ni mbaʼevéicharõ ndovaleiha iguata okára (Proverbios 5:18-20). Proverbios kapítulo 31 ohechauka tembirekokuérape mbaʼépa ojapovaʼerã iména ha imembykuéra omombaʼe ha oguerohory hag̃ua chupekuéra. Upéicha avei mitãnguérape ojeʼe iñeʼẽrendu hag̃ua itúva ha isýpe (Proverbios 6:20). Ko kuatiañeʼẽ ohechauka avei ñanerakateʼỹvaʼerãha ñane amigokuérare, ha ndovaleiha ñapensa ñandejehénte ha ñañemohaʼeño (Proverbios 18:1). Heʼi avei ñañatendevaʼerãha ñane júntare ani ñandegueraha vai (Proverbios 13:20; 17:17).
Ñanderekoporãve hag̃ua. Proverbios oreko hetaiterei konsého ñanepytyvõva ñandepyʼaguapy, ñanekyreʼỹ ha ñandeguápo hag̃ua ñande travahohápe, ha avei ani hag̃ua ñandekaʼu (Proverbios 6:6; 14:30; 20:1). Ohechauka ñandéve ñasẽ vaitaha ñañemoĩramo Ñandejára léi rehe (Proverbios 14:12). Ko kuatiañeʼẽme ojeʼe ani hag̃ua ñamoinge mbaʼeve ivaíva ñande pyʼapýpe, ‘upégui ningo heñói ñande rekove’ (Proverbios 4:23).
Koʼã konsého porãite oipytyvõma hetaiterei ñande rapichápe. Haʼekuéra ojerovia añetehápe iporãveha ñañemoĩ Jehová poguýpe ha nombyasýi ojapo haguére upéva.
(Oñeguenohẽ Proverbios kuatiañeʼẽgui.)