Jeremías oñeʼẽ meme Jehováre ijetuʼúramo jepe

Sapyʼánte umi hénte opukapa ñanderehe ñañeʼẽvo chupekuéra Jehováre. Ikatu upéi japyta nañañeʼẽsevéi hese. ¿Ndépa reñeñandúmava péicha?... La Biblia omombeʼu oĩ hague peteĩ mitãrusu ohayhuetereíva Jehovápe, péro upéi ou noñeʼẽsevéi hese. Héra Jeremías. Jahechamína ijistória.

Jeremías imitárõ guare Jehová omanda chupe heʼi hag̃ua umi héntepe anivéma hag̃ua ojapo ivaíva. Jeremías okyhyje ojapo hag̃ua upéva ha oñandu oforsataha chupe. Upévare heʼi Jehovápe: “Ndaikuaái mbaʼépa haʼéta. Chéngo chemitãiterei”. Péro Jehová heʼi: “Ani rekyhyje. Che roipytyvõta”.

Upémarõ Jeremías oñepyrũ heʼi umi héntepe ojekastigataha chupekuéra nokambiáiramo. ¿Mbaʼépa nde ere? ¿Openánepa hese umi hénte?... Nahániri, oĩ umi oñembohorýva hese, ótro katu ipochy hendive. Oĩ voi ojukaséva chupe. ¿Mbaʼéichapa oñeñandúne Jeremías?... Haʼe okyhyje ha heʼi: “Núnka nañeʼẽvéima Jehováre”. ¿Ndépa ere noñeʼẽvéima hague hese?... Nahániri. Jeremías ohayhueterei Jehovápe ha upévare oñeʼẽmante hese umi héntepe. Osegi rupi ojapo upéva Jehová oñangareko hese.

Por ehémplo, peteĩ jey umi kuimbaʼe iñañáva opoi Jeremíaspe peteĩ pósope. Upe póso tuju memete. Upépe haʼe ndorekói tembiʼu ni y. Umi kuimbaʼe ohejase Jeremíaspe upépe omano hag̃ua. Péro Jehová oipytyvõ rupi chupe, osẽ jey upégui.

¿Mbaʼépa nemboʼe Jeremías ehémplo?... Jepe haʼe heta vése okyhyje, osegi oñeʼẽ Jehováre. Nde reñeʼẽ jave Jehováre ikatu oĩ oñembohorýva nderehe térã ipochýva nendive. Ikatu voi retĩ repytávo térã rekyhyje. Péro ani reheja mbaʼeve ndejoko reñeʼẽ hag̃ua Jehováre. Haʼe siémpre nepytyvõta, oipytyvõ haguéicha Jeremíaspe.