Pe Rréino ohupytýva: Jaiporu umi léi ñadefende hag̃ua umi notísia porã

REPREDIKA reikóvo ogahárupi ha rehendu sapyʼa umi polisía ombopu pe siréna. Ha hatã hatãve ipu. Upéi reñepyrũvo repredika pe nemoirũva ojere omaña ohechávo umi polisía opytaha pende ypýpe. Peteĩva oguejy ha oporandu peẽme: “¿Peẽiko hína la peikóva peñeʼẽ la Bíbliare óga ahénorupi? Hetáma oĩ ojekeháva pendehegui”. Péro trankílo porãnte peje chupe peẽ haʼeha testígo de Jehová. ¿Mbaʼépa oikóne upéi?

Odepende mbaʼéichapa otrata ymave pe goviérno ne retãmegua testígo de Jehovápe. ¿Mbaʼépa oiko raʼe ymave? ¿Ikatúpa koʼág̃a pepredika, peho rreunionhápe ha umícha? Oimérõ upéicha, oiméne reikuaa heta oñembaʼapo hague upearã. Ermanokuéra upepegua oime vaʼerã heta áñorema ‘odefende umi marandu porã oiporúvo pe léi’ (Filip. 1:7). Ko pártepe ñahesaʼỹijóta mbaʼéichapa testígo de Jehová ogana heta káso umi trivunalhárupi. Koʼã mbaʼe ni mbaʼevéicharõ ndaikatumoʼãi kuri jahupyty ñandejeheguínte. Upévare, jastudiávo imbaretevéta ñande jerovia ha jahechakuaáta Ñandejára Rréino ogovernamaha.