Jesús okakuaa Nazarétpe

Jesús okakuaa Nazarétpe, peteĩ siuda michĩva ha naiñimportanteguasúiva. Ko siuda oĩ Galiléape peteĩ alturahápe, nórte gotyo Judéagui. Ha éste gotyo katu opyta pe lágo tuichaitéva, hérava mar de Galilea.

Oiméne Jesús oreko dos áñorupi ova jeýrõ guare hikuái Egíptogui itúva ha isýndi. Ha amalisia upérõ haʼe ího úniko. Péro upe rire onaséma iñermanokuéra, hérava Santiago, José, Simón ha Judas, ha avei iñermanakuéra. Amo ipahápe, Jesús oreko amo seis ermáno ha ermánarupi imitãvéva chugui.

Jesús oreko avei ótro iparientekuéra. Oiméne ñanemanduʼa Elisabet ha imemby Juánre. Haʼekuéra ningo oiko mombyry Jesús oikohágui, sur gotyo, Judéape. Péro oĩ avei umi oikóva ag̃uimie. Por ehémplo, Salomé oiko Galiléapente. Haʼe amalisia María ermána, ha upéicharõ Jesús tia hína. Salomé ména héra Zebedeo, ha imembykuéra katu Santiago ha Juan. Koʼã mitãkariaʼy oiméne Jesús prímo. Ndajaikuaái ningo ohasápa raʼe hikuái heta tiémpo oñondive imitã aja, péro tuicha rire haʼekuéra oñoamigoite, ha oiko chuguikuéra Jesús apóstol.

José heta ifamília, upévare ombaʼapo jejopy vaʼerã omantene hag̃ua chupekuéra. Haʼe ningo peteĩ karpintéro ha omongakuaa Jesúspe itaʼýra teéicha, upévare Jesúspe oñehenói “pe karpintéro raʼy” (Mateo 13:55). José omboʼe Jesúspe karpintería, ha haʼe pyaʼe oaprende pe profesión. Upéicha rupi, tiémpo rire umi hénte ohenói avei chupe “pe karpintéro” (Marcos 6:3).

José ha ifamíliape g̃uarã iñimportanteterei pe adorasión omeʼẽva Jehovápe. José ha María ojapo Ñandejára Léi heʼíva ha omboʼe umi mitãme ojerovia hag̃ua Jehováre. Haʼekuéra ojapo upéva oĩ jave ‘hógape, tapére, oñenonguévo ha opuʼãnguévo’ (Deuteronomio 6:6-9). Nazarétpe oĩ peteĩ sinagóga, ha katuete José oguerahapaite jepi ifamiliakuérape upépe oadora hag̃ua Jehovápe. La Biblia omombeʼu avei Jesús ohómi hague pe sinagógape “sabadokue” (Lucas 4:16). Katuete ningo José ha ifamília ovyʼáne raʼe oho jave Jehová témplope, Jerusalénpe.