Oho Nazaret sinagógape

Jesús og̃uahẽvo Nazarétpe oiko peteĩ guyryry pe siudápe. Ojapo un áño rasami haʼe oĩ hague upépe, ha upégui oho Juan rendápe ikatu hag̃uáicha ojevautisa. Upe tiémpope Jesús haʼe vaʼekue karpintéro, péro koʼág̃a opárupi ojekuaa chupe ojapo haguére milágro.

Umi hénte upepegua ohaʼarõitereíma umi milágro, koʼýte ohechávo Jesús ohoha pe sinagógape oĩva upe siudápe. Upépe ningo oñeñemboʼe ha ojelee umi lívro Moisés oskrivi vaʼekue, ojejapoháicha “umi sinagógape káda sábado” (Hechos 15:21). Avei upépe ojelee umi lívro profetakuéra oskrivi vaʼekue. Upéi Jesús oñemboʼy olee hag̃ua, ha oiméne ohecha heta ikonosídope, haʼe oikuaáva ymaite guive oho rupi upe sinagógape. Upéi oñemeʼẽ chupe proféta Isaías kuatiañeʼẽ. Haʼe oavri oñeʼẽhápe pe unhído Jehová oiporavóvare ijespíritu rupive. Koʼág̃a ñande Bíbliape upe profesía oĩ Isaías 61:1, 2-pe.

Jesús olee pe párte heʼihápe oĩtaha peteĩ oanunsiáva ojeliverataha umi oñeñapytĩva, ohecha jeytaha umi ohechaʼỹva ha ojekuaaukataha pe áño Jehová oguerohorýva. Upéi Jesús omeʼẽ jey pe lívro pe kuimbaʼe oñatendévape upépe, ha oguapy. Enterove oĩva pe sinagógape omaña hína hese, ha upéi haʼe oñepyrũ oñeʼẽ. Oiméne omyesakã mbykymi pe olee vaʼekue ha omohuʼã heʼívo: “Koestedía oñekumpli pe aleéva angete” (Lucas 4:21).

Umi hénte oñesorprende ohendúvo “umi ñeʼẽ porãite oiporúva”, ha heʼi ojupe hikuái: “¿Kóva piko José raʼy jepe?”. Péro Jesús ohechakuaa haʼekuéra ohechaseha milágronte, upévare heʼi: “Katuete peiporúta cherehe ko ñeʼẽnga: ‘Doktór, eñepohãnóna ndejupe. Ha pejéta chéve: Ejapóna avei ko nde vállepe umi mbaʼe rohendúva oikoha Capernáumpe’” (Lucas 4:22, 23). Oiméne Jesús vesinokuéra opensa haʼe oñepyrũ vaʼerãha oporomonguera ipuévlope raẽ, ikatu hag̃uáicha ideprovécho ivalleguakuérape raẽvete. Péro Jesús ndojapói rupi upéicha, haʼekuéra opensa haʼe oapoʼiha chupekuéra.

Jesús oikuaa mbaʼépa opensa hikuái, upévare oñeʼẽ chupekuéra peteĩ mbaʼe oiko vaʼekuére Israélpe. Haʼe imanduʼa Elías tiémpope upépe oĩ hague heta viúda, péro noñemondói ko profétape ni peteĩva umi viúda rendápe. Upéva rangue, oñemondo chupe peteĩ viúda ndahaʼéiva isrraelíta rendápe, oikóva Saréptape, peteĩ puévlo opytáva namombyrýi Sidóngui. Ha upépe Elías ojapo peteĩ milágro tuichaitereíva (1 Reyes 17:8-16). Proféta Eliseo tiémpope avei oĩ vaʼekue heta lepróso Israélpe, upéicharamo jepe Eliseo omonguera Naamánpe añoite, peteĩ karai Siriagua (2 Reyes 5:1, 8-14).

Koʼã ehémplo rupive, Jesús ohechauka umi héntepe haʼekuéra opensaha ijehénte ha ojeroviaʼiha. Upévare, umi oĩva pe sinagógape ipochyeterei ha pyaʼe oguenohẽ Jesúspe upe siudágui. Nazaret oĩ vaʼekue peteĩ sérro ári, ha umi hénte oityse Jesúspe upe sérrogui. Péro haʼe ojetyvyro chuguikuéra ha okañy upégui. Upe rire Jesús oho Capernáumpe, opytáva mar de Galilea kóstare, noroéste gotyo.