PÁRTE 5
‘Peju jey pende pastór rendápe, haʼe oñangareko hína penderehe’
¿Ndépa rehasa hína koʼág̃a peteĩ situasión oñemensionáva ko follétope? Oiméramo upéicha, nereiméi neaño, heta oservíva Jehovápe ohasa avei koʼãichagua situasiónre. Péro haʼe oipytyvõ chupekuéra, ha ikatu reime segúro nepytyvõtaha ndéve avei.
Jehová ningo ndegiáta reju jey hag̃ua hendápe
JEHOVÁ ningo ndegiáta reju jey hag̃ua hendápe. Oiméramo oĩ álgo ndepyʼapýva, ndepochy peteĩ ermánondi térã nemolesta ne konsiénsia, Jehová katuete nepytyvõta resupera hag̃ua umíva ha ikatúta reservi jey chupe ikongregasiónpe. Ne situasión ikatu ojogua umi kristiáno síglo primeropegua situasiónpe. Apóstol Pedro oskrivi vaʼekue chupekuéra: ‘Yma peẽ peiko ovecha okañy vaʼekuéicha, péro koʼág̃a peju jey pende pastór rendápe, haʼe oñangareko hína penderehe’ (1 Pedro 2:25).
Eñehaʼãmbaiténa eiko jey Jehová amígoramo, ndaipóri ningo ótra kósa iñimportantevéva upévagui. ¿Mbaʼérepa? Pórke péicha rejapóramo rembovyʼaitereíta chupe (Proverbios 27:11). Jaikuaaháicha, umi mbaʼe jajapóva ikatu ombovyʼa térã omoñeñandu vai Ñandejárape. Péro haʼe nañandeovligái jahayhu ni jaservi hag̃ua chupe (Deuteronomio 30:19, 20). Peteĩ vivlísta heʼi vaʼekue voi: “Ne korasõ haʼete peteĩ okẽ ojeavríva hyepýguio ládonte. Avave ndaikatúi oavri nde vése”. Jehová oipota reservi chupe nde pyʼaite guive, péicha haʼetéta redesidíva reavri chupe ne korasõ. Ha readoráramo chupe haʼe omereseháicha, nde voi revyʼaitereíta (Hechos 20:35; Apocalipsis 4:11).
Avei reju jeývo Jehová organisasiónpe rerresivíta opa mbaʼe reikotevẽva remombarete hag̃ua nde jerovia (Mateo 5:3). ¿Mbaʼérepa iñimportánte upéva? Koʼág̃arupi umi hénte ndoikuaái maʼerãpa oikove ha ndaikatúi ombohovái umi pregúnta iñimportantevéva. Péro ñande jaikuaa porã Jehová ñandekrea hague ñadepende hag̃uáicha hese. Upévare jaservírõ añoite chupe ikatúta javyʼa (Salmo 63:1-5).
Jehová ningo oipotaiterei reñemoag̃ui jey hese. ¿Mbaʼéichapa ikatu reime segúro upévare? Epensamína, ko folléto ningo ojejapo nembaʼerãite, ha heta oñembaʼapo hese. Umi ermáno oñepyrũ mboyve oskrivi oñemboʼe kuri Jehovápe, ohecha hag̃ua mbaʼépa reikotevẽ reñemoag̃ui jey hag̃ua hese. Upéi peteĩ ansiáno térã ótro ermáno kongregasionpegua omeʼẽ ndéve ha nde redesidi relee. Ha oime vaʼerã katuete opoko ne korasõre umi mbaʼe releéva koʼápe. Entéro koʼã mbaʼe ohechauka Jehová ndahesarairiha ndehegui. Haʼe ningo ndegueruseterei jey iñorganisasiónpe (Juan 6:44).
Javyʼaite jaikuaa haguére Jehová ndahesarairiha ijovechakuéra mimígui. Peteĩ ermána hérava Donna omombaʼeterei vaʼekue upéva, haʼe heʼi: “Mbeguekatúpe añemomombyry vaʼekue ahávo Jehovágui, péro pyʼỹinte apensa Salmo 139:23, 24 heʼívare: ‘Ñandejára, ehechamína mbaʼépa areko che pyʼapýpe. Nde reikuaa porã che pensamientokuéra ha umi mbaʼe chekevrantáva. Chepytyvõmína oiméramo aguata hína tape vaíre, ehechaukamína chéve pe tape porã’. Che aikuaa ndaikatumoʼãiha voínte avyʼa Satanás múndope. Jehová organisasiónpente voi la che lugár. Ahechakuaa Jehová núnka ndacherejareíri hague, tekotevẽnte kuri che añemoag̃ui jey hese. ¡Avyʼaite aime jey haguére Jehová puévlope!”.
“Ahechakuaa Jehová núnka ndacherejareíri hague, tekotevẽnte kuri che añemoag̃ui jey hese”
Ore pyʼaite guive rojerure Jehovápe tanepytyvõmi revyʼa jey hag̃ua yma guaréicha (Nehemías 8:10). Ni mbaʼevéicharõ nerembyasymoʼãi redesidíramo reñemoag̃ui jey Jehováre.