Peteĩ viúda memby oikove jey

Oúrõ guare pe séka pukuete, Jehová heʼi Elíaspe: “Tereho Saréptape, upépe peteĩ viúda omeʼẽta ndéve ne rembiʼurã”. Oikévo pe siudápe, Elías ohecha peteĩ viúda mboriahumi ombyatýva hína jepeʼa ha heʼi chupe: “Eguerumína chéve michĩmi y haʼu hag̃ua”. Ha pe kuñakarai ohóvo ogueru hag̃ua pe y, Elías heʼi chupe: “Eguerumína avei chéve peteĩ pan pedasomi”. Péro pe viúda heʼi chupe: “Ndarekói ningo la pan. Sólo areko un púño arína ha michĩmi aséite ajapo hag̃ua álgo chéve ha che membýpe g̃uarã”. Elías heʼi chupe: “Rejapóramo chéve peteĩ pan haʼu hag̃ua, Jehová opromete erekotaha aséite ha arína reipuru hag̃ua opa peve ko séka”.

Upémarõ pe viúda oho hógape ha ojapo pan Elíaspe g̃uarã. Ha Jehová opromete haguéicha, haʼe ha imembýpe ndofaltái hoʼu vaʼerã opa peve pe séka pukuete. Pe arína oĩva pe mbaʼyru guasúpe ndopái, ha pe aséite oĩva pe mbaʼyruʼípe ndopái avei chugui.

Péro upe rire oiko peteĩ mbaʼe itristetereíva, pe viúda memby hasykatu ha omano. Upépe pe viúda ojerure asy Elíaspe oipytyvõmi hag̃ua chupe. Upémarõ Elías ojagarra pe mitã ha ogueraha chupe pe koty oĩvape yvate, omoñeno peteĩ tupápe ha ojerure asy Jehovápe: “Jehová, emoingovemi jeýna ko mitãme”. ¿Ndépa reikuaa mbaʼérepa ojehecharamoitereíta kuri Jehová omoingove jeýramo upe mitãme? Pórke upe tiémpope ndaipóri gueteri ni peteĩ persóna oñemoingove jey vaʼekue ha hiʼarive pe viúda ha imemby ndahaʼéi vaʼekue israelita.

Upéi pe mitã oñepyrũ jey orrespira ha oikove jey, ha Elías heʼi pe viúdape: “¡Emañami, ne memby oikove jey!”. Pe viúda ovyʼaiterei ha heʼi Elíaspe: “Koʼág̃a aikuaa porã nde haʼeha Ñandejára siérvo, pórke nde ere umi mbaʼe Jehová heʼíva añoite ndéve ere hag̃ua”.