Jehová ombou peteĩ ánhel oprotehe hag̃ua Ezequíaspe

Asiria ojagarra vaʼekue umi 10 trívu oĩva Israélpe. Upéi Senaquerib, pe rréi de Asiria, ojagarraséma avei umi 2 trívu oĩva Judápe. Mbeguekatúpe haʼe ojagarra ohóvo peteĩteĩ umi siuda oĩva upépe. Pe siuda haʼe oipotavéva haʼe vaʼekue Jerusalén. Péro Senaquerib ndoikuaaiete Jehová oproteheha upe siuda.

Ezequías, pe rréi de Judá, omeʼẽ Senaqueríbpe hetaiterei pláta ani hag̃ua oataka Jerusalén. Senaquerib ojagarra chugui upe pláta, péro lomímonte omondo jey pe ijehérsito ipoderosoitéva oataka hag̃ua Jerusalén. Umi hénte okyhyjeterei ohechávo mbaʼéichapa pe ehérsito asirio oñemoag̃ui oúvo. Upémarõ Ezequías heʼi chupekuéra: “Ani pekyhyje. Umi asirio ningo ipoderóso, péro Jehová ñanemombaretevéta chuguikuéra”.

Upéi Senaquerib omondo pe rabsaquépe oñembohory hag̃ua umi hénte oikóvare Jerusalénpe. Pe rabsaqué oñemboʼy pe siuda ypýpe, osapukái ha heʼi: “Jehová ningo napenepytyvõmoʼãi, ani peheja Ezequías penembotavy. Ndaipóri ni peteĩ dios ikatu vaʼerã pendesalva orehegui”.

Ezequías oporandu Jehovápe mbaʼépa ikatu ojapo, ha Jehová heʼi chupe: “Ani reheja nemongyhyje la heʼíva pe rabsaqué. Senaquerib ndojagarramoʼãi Jerusalén”. Senaquerib omondo kárta Ezequíaspe ha heʼi chupe: “Peñentregántemana. Jehová ningo napendesalvamoʼãi”. Upémarõ Ezequías oñemboʼe jey Jehovápe ha heʼi chupe: “Ore Jára Jehová, oresalvamína chugui ikatu hag̃uáicha enterovéva oikuaa nde añoite haʼeha pe Dios verdadéro”. Ha Jehová heʼi chupe: “Pe rréi de Asiria ndoikemoʼãi Jerusalénpe, che adefendéta ko siuda”.

Senaquerib opensa kuri ensegídantema ojagarrataha avei Jerusalén. Péro peteĩ pyhare, Jehová ombou peteĩ ánhelpe umi asirio kampaméntope ha pe ánhel ojuka 185.000 soldádope voi. Omanombaite umi soldádo ipoderosovéva oreko vaʼekue Senaquerib, upémarõ haʼe oñentregántema ha oho jey hógape. Péicha, Jehová opromete haguéicha, oprotehe Ezequíaspe ha entéro umi oikóvape Jerusalénpe. Nde reimérire Jerusalénpe, ¿rejeroviátapa avei kuri Jehováre?