Mbaʼeve ndojokói chupekuéra

Peteĩ kuimbaʼe ndaikatúiva oguata, oguapými vaʼerã pe témplo entrádape ha ojerure pláta umi oikévape upépe. Peteĩ kaʼaru ohechávo Pedro ha Juan oiketaha pe témplope, oñepyrũ ojerure avei chupekuéra pláta. Pedro katu heʼi chupe: “Che ikatu ameʼẽ ndéve peteĩ mbaʼe ovalevéva plátagui. ¡Jesucristo Nazaretgua rérape haʼe ndéve, epuʼã eguata!”. Ha upéi Pedro oipytyvõ chupe opuʼã hag̃ua ha pe kuimbaʼe oñepyrũ oguata. Umi hénte ohecharamoiterei pe milágro ha hetágui oiko avei Jesús disípulo.

Umi saserdóte ha umi saduséo ipochyeterei upévare. Ojagarra hikuái Pedro ha Juánpe, oraha chupekuéra pe Sanedrín renondépe ha oporandu chupekuéra: “¿Máva omeʼẽ peẽme podér pemonguera hag̃ua pe kuimbaʼépe?”. Pedro heʼi chupekuéra: “Jesucristo, pe kuimbaʼe peẽ pejuka vaʼekue, haʼe omeʼẽ oréve podér”. Umi oĩva pe Sanedrínpe omanda chupekuéra anivéma hag̃ua oñeʼẽ hikuái Jesús rérape. Péro umi apóstol heʼi chupekuéra: “Ore norokirirĩmoʼãi. Rosegíta roñeʼẽ Jesús rehe”.

Upéi opoi hikuái Pedro ha Juángui, ha haʼekuéra ensegída oho omombeʼu umi ótro disípulope la oiko vaʼekue ha oñondivepa oñemboʼe hikuái Jehovápe: “Orembopyʼaguasumína rosegi hag̃ua roñeʼẽ nderehe”. Jehová omeʼẽ chupekuéra ijespíritu sánto, péicha rupi haʼekuéra osegi opredika ha oporomonguera. Upéicha rupi, hetave héntegui oiko Jesús disípulo. Umi saduséo oenvidiaiterei umi apóstolpe, upévare omoinge chupekuéra kárselpe. Péro upe pyharépe, Jehová ombou peteĩ ánhel ha oavri pe kársel rokẽ umi apóstolpe ha heʼi chupekuéra: “Peho jey pe témplope ha pepredika upépe”.

Al día sigiénte, oñemombeʼu pe Sanedrínpe la oikóva: “Pe kársel oñemboty porã, péro umi kuimbaʼe peẽ pemoinge vaʼekue upépe ndaiporivéima. Haʼekuéra oime omboʼe jeýma hína umi héntepe pe témplope”. Upémarõ ojagarra jey hikuái umi apóstolpe ha ogueraha chupekuéra pe Sanedrín renondépe. Pe súmo saserdóte heʼi chupekuéra: “¡Ndoroʼéi piko raʼe peẽme anivéma hag̃ua peñeʼẽ Jesús rérape!”. Pedro heʼi chupekuéra: “Ore oreñeʼẽrendu vaʼerã Ñandejárape haʼe rupi ore Governánte ha ndahaʼéi peẽme”.

Umi rrelihión omoakãva ipochyeterei ha ojukase voi umi apóstolpe. Upémarõ, peteĩ fariséo hérava Gamaliel oñemboʼy ha heʼi: “Peñatende porãkena la pejapótavare koʼã kuimbaʼére, ikatu oime Ñandejára oĩ hína hendivekuéra. ¿Peẽ piko peñemoĩse mbaʼe Ñandejárare?”. Haʼekuéra ohendu Gamaliélpe. Péro opoi mboyve hikuái umi apóstolgui, ombyepotika chupekuéra ha upéi heʼi jey chupekuéra anivéma hag̃ua opredika. Péro upéva ndojokói umi apóstolpe, haʼekuéra osegi opredika pyʼaguasúpe umi notísia porã oñeʼẽva Jesús rehe, tahaʼe pe témplope térã ogahárupi.