Páblope ojegueraha Rómape

Pe tercer viáhe de predikasión Pablo ojapo vaʼekue omohuʼã Jerusalénpe. Upépe ojejagarra kuri chupe ha oñemoinge kárselpe. Peteĩ pyhare, oĩ aja pe kárselpe, Jesús heʼi chupe peteĩ visiónpe: “Rehóta Rómape ha repredikáta avei upe siudápe”. Upéi ojegueraha Páblope pe kársel oĩvape Cesaréape ha opyta upépe 2 áño. Peteĩ día, Pablo oĩrõ guare pe trivunálpe heʼi pe governadór Féstope: “Ajerure pe César chehusga hag̃ua Rómape”. Festo heʼi chupe: “Oñemeʼẽta ndéve la rejeruréva. Reipotáramo César ndehusga, romondóta upépe”. Upéi ohupi hikuái Páblope peteĩ várko ohóvape Rómape ha oho hendive Lucas ha Aristarco.

Oviaha aja hikuái, pe márpe ojagarra chupekuéra peteĩ torménta vai heta díare. Enterovéva oimoʼã omanombataha hikuái. Péro Pablo heʼi chupekuéra: “Peteĩ ánhel heʼi chéve che suéñope: ‘Ani rekyhyje Pablo, reg̃uahẽta Rómape ha entéro umi oĩva nendive ko várkope ojesalváta avei’. Upévare, ani pekyhyje pórke nañamanomoʼãi”.

Catorce día oaguanta rire hikuái pe torménta, ohecha sapyʼa hikuái peteĩ ísla. Upéva hína pe ísla de Malta. Upévo pe várko ombeti peteĩ yvykuʼi aty oĩvare pe márpe ha oñepyrũ ojedespedasa, péro umi 276 pasahéro ojesalva ha og̃uahẽ pe oríllape. Algúno og̃uahẽ oytahápe ha ótro katu ojejagarra umi távlare térã ótra kósare ani hag̃ua ojahoga. Umi hénte Maltagua okuida hesekuéra ha ojatapy chupekuéra ojepeʼe hag̃ua.

Tres mése oiko haguépe upéva, umi soldádo oraha Páblope Rómape peteĩ várkope. Umi ermáno upepegua oho orresivi chupe ha Pablo ohechávo chupekuéra oagradese Ñandejárape ha tuichaiterei ikyreʼỹ. Pablo haʼéramo jepe peteĩ prisionéro, oñepermiti chupe oalkila peteĩ óga oiko hag̃ua ha oñemoĩ peteĩ soldádo ovihila hag̃ua chupe. Pablo opyta oiko upépe 2 áñore. Umi hénte oho ovisita Páblope ha haʼe opredika chupekuéra umi notísia porã oñeʼẽva Ñandejára Rréinore ha Jesúsre. Pablo oskrivi vaʼekue avei heta kárta umi kongregasión oĩvape Asia menór ha Judéape. Jahechakuaa Jehová ojevale hague Páblore oraha hag̃ua umi notísia porã heta paíspe.