Oñeporandúva jepi

Ohechaukápa Proverbios 22:6 ñahekomboʼe porãramo peteĩ mitãme ndohejamoʼãiha Jehovápe?

Ko téysto heʼi: “Mitãme ehechauka michĩreve haperã, upéicharõ ituja rire jepe ndojeimoʼãi chugui”. Peteĩ yvyra raʼy okakuaa porã hag̃ua ñañangarekovaʼerã hese michĩ guive ani hag̃ua ikarapã. Upéicha avei umi mitã oñehekomboʼe porãva michĩ guive ndohejasemoʼãi Jehovápe tuicha rire. Túva ha sy oikuaa ijetuʼuha oñehekomboʼe mitãnguéra. Heta oñehaʼãvaʼerã hikuái ha oikotevẽ tiémpo upearã. Oipytyvõ hag̃ua ifamiliakuérape oservi hag̃ua Ñandejárape, tuvakuéra ohekomboʼe, oñemoñeʼẽ, omokyreʼỹ ha okorrehi meme vaʼerã mborayhúpe.

Pe mitã tuicha rire ohejáramo Jehovápe, heʼisépa upéva ituvakuéra nohekomboʼeporãihague chupe? Oĩ tuvakuéra ndojapoivaʼekue opa ikatúva ohekomboʼe hag̃ua ifamiliakuérape Jehová oipotaháicha (Efesios 6:4). Péro ko téysto ndeʼíri ñahekomboʼe porãramo peteĩ mitãme ndohejamoʼãiha Jehovápe. Mitãnguéra ningo nosẽmoʼãi ituvakuéra oipotahaichaite. Mitã ha kakuaa ikatu oiporavo ojapótava (Deuteronomio 30:​15, 16, 19). Tuvakuéra oñehaʼãramo jepe, oĩ jepi taʼýra ohejáva Jehovápe. Upéva oiko Salomón rehe, ohaivaʼekue ko téysto. Jehová raʼykuéra apytépe jepe oĩ naiñeʼẽrendúiva chupe.

Upéicharõ ko téysto ndeʼíri ndaiporimoʼãiha mitã ohejáva “haperã”. Péro ohechauka hetavetaha umi osẽ porãva. Ko mbaʼe tuichaiterei omokyreʼỹ tuvakuérape! Ohechauka chupekuéra oñehaʼãramo ohekomboʼe ifamíliape Jehová oipotaháicha, umi mitã osẽ porãtaha. Iñimportanteterei tuvakuéra ojapóva, upévare oñehaʼãvaʼerã ojapo porã hembiapo (Deuteronomio 6:​6, 7).

Taʼyrakuéra ohejáramo jepe Jehovápe, iporãta ituvakuéra ojerovia ikatuha oservi jey chupe hikuái. La Biblia heʼíva ipuʼaka ha taʼyrakuéra ndahesaraimoʼãi péicha rei ituvakuéra ojapovaʼekuégui (Salmo 19:7)