Umi mbaʼe opavave oikuaaséva

“Jaikuaa rire mbaʼéichapa jahupytýta ñane remikotevẽ ha jarekopa rire umi mbaʼe porã yma ni noñeimoʼãivaʼekue, umíva apytépe: yva aju opa árape, aire acondicionado ha umi ekípo de sonído iporãmba jepéva. Upe rire katu jaikuaaséntema maʼerãpa jaikove. Maʼerã piko ñañehaʼãitereíta? Ñañehaʼã rei ningo.” David G. Myers, profesór omboʼéva Psicología peteĩ Universidápe hérava Hope (Holland, Michigan, EE.UU.).

MBAʼÉICHAPA rembohováita koʼã mbaʼe oporanduvaʼekue pe mboʼehára? Oĩtaningo heʼíva natekotevẽiha voi ñañehaʼã ñambohovái koʼã porandu. Péro, ndajaikuaaséiramo koʼã mbaʼe haʼetetahína nañapenáiva peteĩ ita raʼỹi oĩvare ñande sapatúpe. Ha ikatúramo jepe jaguata heseve, jaguata asýta katuete chugui.

Ha oiméramo nde reñeporandúma maʼerãpa jaikove, naneañoihína reikuaaséva upéva. Ojejapókuri peteĩ Encuesta Mundial de Valores, upéva rupi ojehechakuaa hetaiterei tetãme oĩha umi oikuaaséva “mbaʼérepa ha maʼerãpa jaikove”.

Ñandepyʼaguapyséramo ñambohovaivaʼerã mbohapy porandu iñimportantetereíva.

Moõguipa jaju?

Maʼerãpa jaikove?

Mbaʼépa ñaneraʼarõ?

Moõpa rejeporekakuaa rembohovái hag̃ua koʼã porandu iñimportantetéva? Umi artíkulo oúvape Ñandejára Ñeʼẽ rupive oñembohováita koʼã porandu, ha ndahaʼéi yvypóra opensáva rupive. Upévare, iporãitétaningo reiporúramo nde Biblia ha ndete voi rehecha hag̃ua mbaʼépa heʼi koʼã mbaʼére.